ଦୁବାଇ,୨୩।୬: ସମୟ ଯେତେ ବଢ଼ୁଛି ଟାଇଟାନିକ୍ ଜାହାଜ ଦେଖିବା ପାଇଁ ବୁଡ଼ା ଜାହାଜରେ ସମୁଦ୍ର ମଧ୍ୟକୁ ଯାଇଥିବା ୫ ଜଣଙ୍କ ଜୀବିତ ରହିବା ସମ୍ଭାବନା ସେତେ କମୁଛି। ବୁଡ଼ାଜାହାଜ ଟାଇଟାନରେ ୯୬ ଘଣ୍ଟାର ଅମ୍ଳଜାନ ରହିଥିବାବେଳେ ଗୁରୁବାର ଏହା ସମ୍ପୂର୍ଣ୍ଣ ଭାବେ ଶେଷ ହୋଇଯାଇଛି। ଅନ୍ୟପକ୍ଷେ ଟାଇଟାନିକ୍ ଭଗ୍ନାବଶେଷ ନିକଟରେ ଡେବ୍ରିସ୍ ଫିଲ୍ଡ (ଆବର୍ଜନା କ୍ଷେତ୍ର) ରେସ୍କ୍ୟୁଟିମ୍ ଚିହ୍ନଟ କରିଛି। ରବିବାର ଠାରୁ ଓସେନ୍ଗେଟ୍ର ବୁଡ଼ାଜାହାଜ ଟାଇଟାନ ନିଖୋଜ ହେବା ପରେ ଉଦ୍ଧାର କାର୍ଯ୍ୟରେ ବହୁ ଦେଶର ଟିମ୍ ନିୟୋଜିତ ହୋଇଛନ୍ତି।
ଟାଇଟାନର ଉଦ୍ଧାର କାର୍ଯ୍ୟରେ ଏକାଧିକ ବୁଡ଼ାଜାହାଜ ବ୍ୟବହାର କରାଯାଉଥିବାବେଳେ କାନାଡାର ଏକ ଜାହାଜ ନିର୍ମାଣକାରୀ କମ୍ପାନୀ ଅଣ୍ଡରସି ରୋବୋକୁ ରେସ୍କ୍ୟୁ ଅପରେଶନରେ ସାମିଲ କରାଯାଇଛି। ଟାଇଟାନିକ୍ ଜାହାଜର ଭଗ୍ନାବଶେଷ ପଡ଼ି ରହିଥିବା ସମୁଦ୍ର ଜଳ ନିକଟରେ ରୋବୋ ପହଞ୍ଚତ୍ ସର୍ଚ୍ଚ ଅପରେଶନ୍ ଆରମ୍ଭ କରିଦେଇଥିବା ଆମେରିକା କୋଷ୍ଟ ଗାର୍ଡ ପକ୍ଷରୁ କୁହାଯାଇଛି। ଅନ୍ୟପକ୍ଷେ ଗଭୀର ସମୁଦ୍ର ଜଳରୁ ଶୁଣାଯାଉଥିବା ଧ୍ୱନି ଟାଇଟାନକୁ ଠାବ କରିବାରେ ସାହାଯ୍ୟ କରିବ ବୋଲି କୁହାଯାଉଛି। ରେସ୍କ୍ୟୁ ଅପରେଶନରେ ବ୍ୟବହାର କରାଯାଉଥିବା ଉପକରଣକୁ ସମୁଦ୍ର ଭିତରକୁ ନେଇ ଯିବାରେ ବହୁ ଅସୁବିଧା ହେଉଥିବାବେଳେ ଜଳରାଶିର ଅନ୍ଧକାର ବାତାବରଣ ମଧ୍ୟ ରେସ୍କ୍ୟୁ ଅପରେଶନ୍ ପାଇଁ ବାଧକ ସାଜିଛି। ଉତ୍ତର ଆଟ୍ଲାଣ୍ଟିକର ଯେଉଁ ସ୍ଥାନରେ ଟାଇଟାନ ନିଖୋଜ ହୋଇଛି, ସେ ସ୍ଥାନଟି ଝଡ଼ ଓ କୁହୁଡ଼ା ପ୍ରବଣ ଅଞ୍ଚଳ ବୋଲି କୋଷ୍ଟାଲ ଗାର୍ଡସ୍ ଇଣ୍ଟରନ୍ୟାଶନାଲ ଆଇସ୍ ପାଟ୍ରୋଲର ବରିଷ୍ଠ ବୈଜ୍ଞାନିକ ଡୋନାଲ୍ଡ ମର୍ଫି କହିଛନ୍ତି। ରବିବାର ବ୍ରିଟେନ ବିଜନେଶମ୍ୟାନ୍ ହାମିସ୍ ହାର୍ଡିଙ୍ଗ, ପାକିସ୍ତାନ ବ୍ୟବସାୟୀ ଶେହଜାଦା ଦାଉଦ୍, ପୁଅ ସୁଲେମାନଙ୍କୁ ନେଇ ଓସେନ୍ଗେଟ୍ ଏକ୍ସପେଡିଶନ୍ସ ସିଇଓ ଷ୍ଟକଟୋନ ରଶ ଏବଂ ଫ୍ରାନ୍ସ ସବ୍ମେରାଇନ୍ ଅପରେଟର ପଲ୍-ହେନରି ନାର୍ଜିଓଲେଟ ଟାଇଟାନ ବୁଡ଼ାଜାହାଜରେ ଟାଇଟାନିକ ଜାହାଜର ଭଗ୍ନାବଶେଷ ଦେଖିବାକୁ ସମୁଦ୍ର ମଧ୍ୟକୁ ଯାଇଥିଲେ।
