ଦୁବାଇ,୧୧।୧(ପି.ଟି.): ଅମ୍ପାୟରଙ୍କ ନିଷ୍ପତ୍ତିରେ ଅସନ୍ତୋଷ ଜାହିର କରି ଅଷ୍ଟ୍ରେଲିଆ ଅଧିନାୟକ ଟିମ୍ ପେନ୍ ଜରିମାନାର ସମ୍ମୁଖୀନ ହୋଇଛନ୍ତି। ସିଡ୍ନୀରେ ଚାଲିଥିବା ଭାରତ ବିପକ୍ଷ ତୃତୀୟ ଟେଷ୍ଟର ତୃତୀୟ ଦିନରେ ଅମ୍ପାୟରଙ୍କ ଏକ ନିଷ୍ପତ୍ତିରେ ଅସହମତି ପ୍ରକାଶ କରିଥିଲେ। ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଆଚରଣ ବିଧି ନିୟମ ୨.୮ର ଉଲ୍ଲଂଘନ କରି ପେନ୍ ମ୍ୟାଚ ପାଉଣାର ୧୫ ପ୍ରତିଶତ ଜରିମାନା ଆକାରରେ ପୈଠ କରିବେ ବୋଲି କୁହାଯାଇଛି। ଏଥିସହିତ ପେନ୍ଙ୍କ ଉପରେ ଗୋଟିଏ ଡିମେରିଟ୍ ପଏଣ୍ଟ ଜାରି କରାଯାଇଛି। ୨୪ ମାସରେ ପେନ୍ ପ୍ରଥମଥର ପାଇଁ ଏଭଳି ତ୍ରୁଟି କରିଛନ୍ତି ବୋଲି ଆଇସିସି ତରଫରୁ କୁହାଯାଇଛି।
ଭାରତ ପ୍ରଥମ ଇନିଂସର ୫୬ତମ ଓଭରରେ ଚେତେଶ୍ୱର ପୂଜାରାଙ୍କ ବିପକ୍ଷରେ ଡିଆରଏସ୍ ରିଭ୍ୟୁ ନେଇଥିଲେ ଓ ଏଥିରେ ସଫଳ ହୋଇ ନ ଥିଲେ। ଫଳରେ ସେ ଅସନ୍ତୋଷ ଜାହିର କରିଥିଲେ। ପେନ୍ ମଧ୍ୟ ତାଙ୍କ ତ୍ରୁଟି ସ୍ବୀକାର କରିଛନ୍ତି। ଫଳରେ ଏ ନେଇ କୌଣସି ଶୁଣାଣିର ଆବଶ୍ୟକତା ନାହିଁ ବୋଲି କୁହାଯାଇଛି। ଡେଭିଡ୍ ବୁନ୍ ତାଙ୍କ ଉପରେ ଜରିମାନା ଧାର୍ଯ୍ୟ କରିଛନ୍ତି। ଅନ୍ଫିଲ୍ଡ ଅମ୍ପାୟର ପଲ୍ ରିଫିଲ ଓ ପଲ୍ ଓ୍ବିଲସନ, ତୃତୀୟ ଅମ୍ପାୟର ବ୍ରୁସ୍ ଅକ୍ସେନଫୋର୍ଡ ଓ ଚତୁର୍ଥ ଅମ୍ପାୟର କ୍ଲେୟାର ପୋଲୋସାକ ପେନ୍ଙ୍କ ବିରୋଧରେ ଅଭିଯୋଗ ଆଣିଥିଲେ। ଏହି ଅଭିଯୋଗରେ ଅତିକମ୍ରେ ଜଣେ ଖେଳାଳିଙ୍କୁ ତାଗିଦ କରାଯାଇଥାଏ ଓ ଅତିବେଶିରେ ମ୍ୟାଚ ପାଉଣାର ୫୦ ପ୍ରତିଶତ ଜରିମାନା ଧାର୍ଯ୍ୟ କରାଯାଇଥାଏ।
