ଜଳେଶ୍ୱର, ୧୬।୧(ଡି.ଏନ.ଏ.) ବାଲେଶ୍ୱର ଜିଲା ରାଇବଣିଆ ଅଞ୍ଚଳରେ ଗତ କିଛିଦିନ ହେଲା ଝାଡଖଣ୍ଡୀ ହାତୀପଲ ଆତଙ୍କ ଖେଳାଇ ଚାଲିଛନ୍ତି। ଶନିବାର ଭୋର ସମୟରେ ଗୋଟିଏ ଦନ୍ତା ହାଣ୍ଡିଆ ପିଇ ଜଣଙ୍କୁ ଦଳି ଦେଇଛି। ଘଟଣାସ୍ଥଳରେ ବନବିଭାଗ କର୍ମଚାରୀ ପହଞ୍ଚି ହାତୀଗୁଡ଼ିକୁ ଘଉଡ଼ାଇଛନ୍ତି।
ଗାଁଗୁଡ଼ିକରେ ପଶି ପ୍ରାୟ ୨୦ଟି ଘର ଭାଙ୍ଗିରୁଜି ଦେଇଛନ୍ତି। ବହୁ ଲୋକଙ୍କ ଧାନ ଖାଇବା ସହିତ ପରିବା ଫସଲ ନଷ୍ଟ କରିଦେଇଛନ୍ତି। ବାଲେଶ୍ୱର, ମୟୂରଭଞ୍ଜ ଓ ପଶ୍ଚିମ ମେଦିନୀପୁର ଜିଲାର ବନବିଭାଗର ସମ୍ମଳିତ ପ୍ରଚେଷ୍ଟାରେ ସେମାନଙ୍କୁ ପଶ୍ଚିମ ଅଞ୍ଚଳକୁ ଘଉଡାଇ ଦିଆଯାଇଥିଲା। ରାସଗୋବିନ୍ଦପୁର ଓ ବେତନଟୀ ଅଞ୍ଚଳରେ ଶିମିଳିପାଳର ୨୧ଟି ହାତୀ ରହୁଥିବା ବେଳେ ସେଥିରୁ ୩ଟି ଗୋଠଖଣ୍ଡିଆ ହୋଇ ରାଇବଣିଆ ଥାନା ଅଞ୍ଚଳକୁ ପଶିଆସିଥିଲା। ଶୁକ୍ରବାର ପାହାନ୍ତାରେ ୩ଟି ହାତୀ ଜଳେଶ୍ୱର ଥାନା ଅଧୀନ ଶିଖରପୁର ପଞ୍ଚାୟତ ବେଲବାରିଆ ଗାଁରେ ପ୍ରବେଶ କରି ଝାଡ଼େଶ୍ୱର ବାରିକଙ୍କ ଖଳାରେ ଜମା ହୋଇଥିବା ଧାନ ଖାଇ ନଷ୍ଟ କରିଥିଲେ ା ସେହିପରି ଦାମୋଦର ଦେଙ୍କ ଘର ଭାଙ୍ଗିବା ସହିତ ବିଲରେ ଥିବା କଦଳୀ ଓ ସୋରିଷ ଚାଷର ବ୍ୟାପକ କ୍ଷତି ଘଟାଇଥିଲେ ା ସେଠାରେ ଥିବା ଏକ ଆଦିବାସୀ ପଡ଼ାରେ ପଶି ଦନ୍ତା ହାଣ୍ଡିଆ ପିଇ ଏଣେତେଣେ ପାଗଳପ୍ରାୟ ହୋଇ ବିଚରଣ କରିଥିଲା। ବଜାରଶୋଳ ଗାଁଠାରେ ଅବସ୍ଥାନ କରୁଥିବା ଶ୍ରୀରାମପୁର ପଞ୍ଚାୟତ ଶ୍ରୀକଣ୍ଠପୁର ନିବାସୀ ଫାଗୁ ହାଁସଦା(୭୬) ଶୌଚ ହେବାକୁ ଯାଇଥିବା ବେଳେ ପ୍ରବଳ କୁହୁଡି ଯୋଗୁ ଦନ୍ତାକୁ ଦେଖି ପାରି ନ ଥିଲେ। ହାତୀ ତାଙ୍କୁ ଦଳି ଦେଇଥିବା ଲୋକେ ବନବିଭାଗକୁ ଖବର ଦେଇଥିଲେ। ବନବିଭାଗର କର୍ମଚାରୀମାନେ ଆସି ହାତୀକୁ ଘଉଡ଼ାଇଥିଲେ। ଶ୍ରୀରାମପୁର ସରପଞ୍ଚ ପ୍ରତିନିଧି ଆଲୋକ ଗିରି ପୋଲିସକୁ ଜଣାଇବା ସହ ଶବ ବ୍ୟବଚ୍ଛେଦ ଓ ସତ୍କାର ଲାଗି ୬୨୦୦ ଟଙ୍କା ଫାଗୁଙ୍କ ପୁଅକୁ ଦେଇଛନ୍ତି। ଶବ ବ୍ୟବଚ୍ଛେଦ ପରେ ବନବିଭାଗ ପକ୍ଷରୁ ୪ଲକ୍ଷ ଟଙ୍କା ସହାୟତା ଦିଆଯିବ ବୋଲି ରେଞ୍ଜର ସରୋଜ ମହାନ୍ତି କହିଛନ୍ତି। ପ୍ରାଥମିକ ପର୍ଯ୍ୟାୟରେ ୪୦ ହଜାର ଟଙ୍କା ସହାୟତା ରାଶି ପ୍ରଦାନ କରାଯାଇଛି।
