ଜେନେଭା,୭।୧୦: ଆଫଗାନିସ୍ତାନରେ କୁପୋଷଣ ସଙ୍କଟ ଉଗ୍ରରୂପ ନେବାରେ ଲାଗିଛି। ଏହା ଦ୍ୱାରା ୧୦ ଲକ୍ଷରୁ ଅଧିକ ଶିଶୁଙ୍କ ଜୀବନ ଉପରେ ବିପଦ ରହିଛି। ଦେଶରେ ୫ ବର୍ଷରୁ କମ୍ ବୟସ୍କ ୩୨ ଲକ୍ଷ ଶିଶୁ କୁପୋଷଣ ଦ୍ୱାରା ପ୍ରଭାବିତ ହେବାର ଆଶଙ୍କା ରହିଛି ବୋଲି ୟୁନିସେଫ୍ ପକ୍ଷରୁ ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି। ୟୁନିସେଫ୍ ପ୍ରତିନିଧି ହର୍ବେ ନ୍ୟୁଡୋଓ୍ବିକ୍ ଏନେଇ ବିଶ୍ୱ ଖାଦ୍ୟ ସଂଗଠନର ପ୍ରତିନିଧି ତଥା ନିର୍ଦ୍ଦେଶକ ମେରି ଏଲେନ ମ୍ୟାକ୍ଗ୍ରାର୍ଟିଙ୍କୁ ସତର୍କ ସୂଚନା ଜାରି କରିଛନ୍ତି।
ଜାତିସଂଘ ସଦସ୍ୟମାନେ ଆଫଗାନିସ୍ତାନର ହେରାତ୍ ସହର ଗସ୍ତ ସମୟରେ ଏହି ସତ୍ୟ ସମ୍ପର୍କରେ ଜଣାପଡ଼ିଛି। ଦେଶର ୧୪ ଲକ୍ଷରୁ ଅଧିକ ଲୋକଙ୍କ ପାଖରେ ଖାଇବାକୁ ଦୁଇବେଳା ଜୁଟୁ ନାହିଁ। ସେମାନଙ୍କ ପାଇଁ ଆର୍ଥିକ ସୁବିଧା ସହିତ ଖାଦ୍ୟ ପାନୀୟ ଏବଂ ସାଧାରଣ ସ୍ବାସ୍ଥ୍ୟ ବ୍ୟବସ୍ଥା ଉପଲବ୍ଧ କରାଇବା ଏବେ ଜରୁରୀ ହୋଇ ପଡ଼ିଛି।
ବିଶ୍ୱ ଖାଦ୍ୟ କାର୍ଯ୍ୟକ୍ରମ ପକ୍ଷରୁ ହୋଇଥିବା ସର୍ଭେ ଅନୁସାରେ ଆଫଗାନିସ୍ତାନର ୯୫ ପ୍ରତିଶତ ପରିବାରଙ୍କୁ ଉପାସରେ ରହିବାକୁ ପଡୁଛି। ବୟସ୍କମାନେ ନିଜ ନିଜର ଛୋଟ ପିଲାଙ୍କୁ ଭୋଜନ କରାଇବା ଲାଗି ଉପାସ ରହୁଛନ୍ତି ଅବା କମ୍ ଖାଉଛନ୍ତି। ଶୀଘ୍ର ଏନେଇ ପଦକ୍ଷେପ ଗ୍ରହଣ କରା ନ ଗଲେ ଦେଶରେ କୁପୋଷଣ ସଙ୍କଟ ଅଧିକ ଗୁରୁତର ହେବ ବୋଲି ମ୍ୟାକ୍ଗ୍ରାର୍ଟି କହିଛନ୍ତି।
