ନୟାଗଡ଼,୨୨।୯(ଲୋକନାଥ ମିଶ୍ର): ନୟାଗଡ଼ ଜିଲା ଦଶପଲ୍ଲା ବ୍ଲକ କୁଲୁରୁକୁମ୍ପା ପଞ୍ଚାୟତ ଦୁଡୁକିପାଜୁ ଗାଁର ଆଦିବାସୀମାନେ ଠେଙ୍ଗାପାଳିରେ କରିଥିବା ଜଙ୍ଗଲ ସୁରକ୍ଷାକୁ ବିପଦ ମାଡି ଆସିଛି। ଦୁଡୁକିପାଜୁର ଗ୍ରାମ୍ୟ ଜଙ୍ଗଲ ପାଦଦେଶରେ ହୋଇଥିବା ଫଳଗଛକୁ ଉପାଡି ଦେଇ ଜଣେ ଲୋକ କୋର୍ଟରେ ମାମଲା କରିବା ପରେ ଜଙ୍ଗଲ ସୁରକ୍ଷାକାରୀଙ୍କ ଟେନସନ ବଢ଼ିଯାଇଛି। ଜଙ୍ଗଲକୁ କିପରି ସୁରକ୍ଷା ଦେବେ ସେନେଇ ଚିନ୍ତା ଘାରିଛି। ଏନେଇ ଦୁଡୁକିପାଜୁ ଜଙ୍ଗଲ ସୁରକ୍ଷା କମିଟି ସଭାପତି ପୀତାମ୍ବର ଜାନି କୁହନ୍ତି, ଆମ ଗାଁ ଜଙ୍ଗଲ ପଦା ହୋଇ ଚାଲିଥିଲା। ଧୀରେ ଧୀରେ ଆମ ରୋଜଗାର କମିବାରେ ଲାଗିଲା। ଜଙ୍ଗଲକୁ ସୁରକ୍ଷା ଦେବାକୁ ଗାଁରେ ସଭା ହେଲା। ଠେଙ୍ଗାପାଳି କରି ଜଙ୍ଗଲ ସୁରକ୍ଷା କରିବାକୁ ନିଷ୍ପତ୍ତି ହେଲା। ୨୦୧୯ରୁ ଦୁଡୁକିପାଜୁର ଆଦିବାସୀ ଏକାଠି ହୋଇ ଜଙ୍ଗଲ ଜଗିଲେ। ଗାଁରେ ୨୭ ପରିବାରର ୧୨୧ ଲୋକ ବାସ କରନ୍ତି। ପାଳି କରି ଜଙ୍ଗଲ ଜଗାଗଲା। ଆଦିବାସୀଙ୍କ ଜଙ୍ଗଲ ସୁରକ୍ଷା ଦେଖି ଆଖପାଖ ଅଞ୍ଚଳ ଲୋକ ଆଉ ଜଙ୍ଗଲ ପଦା କଲେ ନାହିଁ। ଧୀରେ ଧୀରେ ଆମର ଲାଭ ହେଲା। ଜଙ୍ଗଲରୁ ଆମେ ପୂର୍ବ ପରି ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଚଳିଲୁ। କିଛି ମାସ ତଳେ ଜଙ୍ଗଲ ପାଦଦେଶରେ ଆମ୍ବ, କୋଳି ପରି ବିଭିନ୍ନ ପ୍ରକାର ୨୦୦ ଫଳ ଗଛ ରୋପଣ କରିଥିଲୁ। ଗଛଗୁଡିକ ମଧ୍ୟ ଠିକ୍ରେ ବଢ଼ୁଥିଲା। ତେବେ ଜଣେ ବ୍ୟକ୍ତି ଆସି ୫୦ରୁ ଊର୍ଦ୍ଧ୍ୱ ଫଳ ଗଛ ଉପାଡି ଜମିକୁ ତା’ର ବୋଲି ଦାବି କଲେ। ଜଙ୍ଗଲ ଭିତରେ ବ୍ୟକ୍ତିଗତ ଜମି ନ ଥିବାରୁ କାଗଜାତ ଦେଖାଇବାକୁ କହିଥିଲୁ। ହେଲେ ସେ କାଗଜାତ ନ ଦେଖାଇ ବିଭିନ୍ନ ପ୍ରକାର ଧମକ ଚମକ ଦେଇ ସରକାରୀ ଜମି ମୋର କହି ଜବରଦଖଲ କଲେ। ଏପରି କି ଆମ ଜଙ୍ଗଲ କମିଟି ବିରୋଧରେ କୋର୍ଟରେ ମାମଲା କରିଛନ୍ତି। ଆମେ ଜଙ୍ଗଲ ସହ ପ୍ରକୃତିର ସୁରକ୍ଷା କରିଛୁ। ହେଲେ ଆମକୁ ଅଯଥା ହଇରାଣ ହରକତ ନ କରିବାକୁ ଅନୁରୋଧ କରିଛୁ। ଜଙ୍ଗଲ କମିଟି ସମ୍ପାଦକ ମିନତୀ ଜାନି କୁହନ୍ତି, ଜଙ୍ଗଲ ଭିତରୁ ଫଳ ଗଛ ଉପାଡିବା ଠିକ୍ ନୁହେଁ। ଆଦିବାସୀ ଲୋକ ବୋଲିି ଧମକଚମକ ଦେଇ କୋର୍ଟରେ ମାମଲା କରିବା ମଧ୍ୟ ଠିକ୍ ନୁହେଁ। ଦୁଡୁକିପାଜୁ ଗାଁର ପୁରୁଷ ଓ ମହିଳା ଆଦିବାସୀ ମିଳିତ ହୋଇ ଜଙ୍ଗଲ ସୁରକ୍ଷା ଦେଉଛନ୍ତି। ଜଙ୍ଗଲ ସୁରକ୍ଷା ଦେବା କ୍ଷେତ୍ରରେ ମହିଳା ଆଗରେ। କୋର୍ଟ କଚେରିର ଭୟ ଦେଖାଇଲେ ଆମେ ଜଙ୍ଗଲ ସୁରକ୍ଷାକୁ ଛାଡିବୁନି। ତେବେ ଜିଲାପାଳ ଓ ନୟାଗଡ଼ ଡିଏଫ୍ଓ ଆଦିବାସୀଙ୍କ ସମସ୍ୟାକୁ ବୁଝି ଏହାର ସମାଧାନ କରାଇବା ଦରକାର। ନଚେତ୍ ବହୁ କଷ୍ଟରେ ସୃଷ୍ଟି ହୋଇଥିବା ଠେଙ୍ଗାପାଳିରେ ଜଙ୍ଗଲ ଉଜୁଡି ଯିବ। ଜବରଦଖଲକାରୀ ପ୍ଲାନ କରି ଜଙ୍ଗଲ ଜମି ଜବରଦଖଲ କରି ନେବେ ବୋଲି କହିଛନ୍ତି।
