କୋକସରା,୧୫ା୧(ଡି.ଏନ୍.ଏ.): ଭିତ୍ତିଭୂମି ନାହିଁ, ଖୋଲା ଆକାଶ ତଳେ ପଡ଼ିରହିଛି କଳାହାଣ୍ଡି ଜିଲା କୋକସରା ବ୍ଲକ କାଶୀବାହାଲ ମଣ୍ଡିରେ ହଜାର ହଜାର କ୍ୱିଣ୍ଟାଲ ଧାନ। ଅଦିନିଆ ବର୍ଷା, ଶୀତ, କୋହଲା ପାଗରେ ଦୀର୍ଘମାସ ଧରି ଧାନକୁ ଜଗି ବସିଛନ୍ତି ଅନ୍ନଦାତା। ବର୍ଷା ଦାଉରୁ ଧାନକୁ ସୁରକ୍ଷିତ ରଖିବା ପାଇଁ ଆରଏମ୍ସି ପକ୍ଷରୁ ପର୍ଯ୍ୟାପ୍ତ ମାତ୍ରାରେ ପଲିଥିନ୍ ଯୋଗାଣ ହୋଇନାହିଁ। ସ୍ଥାନୀୟ ତହସିଲଦାରଙ୍କଠାରୁ ଉପଜିଲାପାଳଙ୍କ ପର୍ଯ୍ୟନ୍ତ ଅଭିଯୋଗ କଲେ ମଧ୍ୟ ଚାଷୀଙ୍କ ଦୁଃଖ ବୁଝିବାକୁ ଯେମିତି କାହାର ଆନ୍ତରିକତା ନାହିଁ ବୋଲି ଅଭିଯୋଗ କରିଛନ୍ତି ଚାଷୀ। ଡିସେମ୍ବର ୧୮ରୁ ଟୋକାନ ପାଇ ଧାନ ଆଣିଥିବା ଚାଷୀଙ୍କ ଧାନ ମଧ୍ୟ ବିକ୍ରି ହୋଇନାହିଁ, ପୁଣି ବୋଝ ଉପରେ କୋରଡ଼ ମାଡ଼ କରିଛି ଅଦିନିଆ ବର୍ଷା। ଶନିବାର କାଶୀବାହାଲ ମଣ୍ଡିରେ ପ୍ରତିବାଦ କରି ଚାଷୀମାନେ ଏକତ୍ରିତ ହୋଇ ଡୋଙ୍ଗରିଗୁଡାରୁ କାଶୀବାହାଲକୁ ସଂଯୋଗ କରୁଥିବା ଆରଡି ରାସ୍ତା ଅବରୋଧ କରି ମଣ୍ଡିରୁ ଧାନ ଉଠାଣ ପାଇଁ ଦାବି କରିଛନ୍ତି। ଚାଷୀ ନୀଳକଣ୍ଠ ମାଝି, କିଶୋର ଚନ୍ଦ୍ର ନାଏକ, ପପୁ ବେମାଲ, ଭୋଲାରାମ ଚଣ୍ଡି, ଉମାଶାଙ୍କର ସରାଫ, ଘାସିରାମ ବେମାଲ, କ୍ଷୀରୋଦ ବେହେରା ପ୍ରମୁଖ ରାସ୍ତା ଅବରୋଧ କରିଥିଲେ। ଖବର ପାଇ ଘଟଣାସ୍ଥଳରେ କାଶୀବାହାଲ ରାଜସ୍ବ ନିରୀକ୍ଷକ ରମଣି ରଞ୍ଜନ ପ୍ରଧାନୀ, ଭିଏଡବ୍ଲ୍ୟୁ ଦୀପ୍ତିମୟୀ ମହାପାତ୍ର, କୋକସରା ପୋଲିସ ପହଞ୍ଚି ଚାଷୀଙ୍କ ସହ ଆଲୋଚନା ପରେ ଧାନ ଉଠାଣ ହେବା ନେଇ ପ୍ରତିଶ୍ରୁତି ପରେ ରାସ୍ତା ଅବରୋଧ ହଟିଥିଲା।
