ନ୍ୟୁୟର୍କ, ୮ା୮ (ଏପି)-କରୋନା ଭାଇରସ ଆଶଙ୍କାରେ ଆଉ ଦୁଇଜଣ ଟପ୍ ମହିଳା ଟେନିସ ଖେଳାଳି ଏଲିନା ସ୍ବିତୋଲିନା ଓ କିକି ବର୍ଟେନ୍ସ ୟୁଏସ୍ ଓପନ୍ ଗ୍ରାଣ୍ଡସ୍ଲାମ ପ୍ରତିଯୋଗିତାରୁ ଓହରିଯାଇଛନ୍ତି। ପୂର୍ବରୁ ନମ୍ବର ଓ୍ବାନ ର଼୍ୟାଙ୍କିଙ୍ଗପ୍ରାପ୍ତ ଆଶଲେ ବାର୍ଟି ଇଭେଣ୍ଟରୁ ଓହରିଯାଇ ସାରିଛନ୍ତି। ଶୁକ୍ରବାର ବାରବୋରା କ୍ରେଜ୍ସିକୋଭା ଓହରିଯାଇଥିବା ୟୁଏସ୍ ଟେନିସ ଆସୋସିଏଶନ ଘୋଷଣା କରିଥିଲା। ସେ ଡବଲ୍ସରେ ୮ମ ଏବଂ ସିଙ୍ଗଲ୍ସରେ ୧୧୫ତମ ର଼୍ୟାଙ୍କିଙ୍ଗପ୍ରାପ୍ତ ଖେଳାଳି। ୫ମ ର଼୍ୟାଙ୍କିଙ୍ଗପ୍ରାପ୍ତ ତଥା ୟୁକ୍ରେନ୍ର ସ୍ବିତୋଲିନା ବର୍ଷକ ପୂର୍ବେ ଫ୍ଲଶିଂ ମିଡୋଜ୍ଠାରେ ସେମିଫାଇନାଲ ପର୍ଯ୍ୟନ୍ତ ଯାଇ ପାରିଥିଲେ। ଶୁକ୍ରବାର ସେ ସୋସିଆଲ ମିଡିଆରେ ପୋଷ୍ଟ କରି କହିଛନ୍ତି ୟୁଏସ୍ ଗସ୍ତ କରି ସେ ତାଙ୍କ ଟିମ୍ କୌଣସି ରିସ୍କ ନେବାକୁ ଚାହାନ୍ତି ନାହିଁ। ସେହିପରି ୭ନମ୍ବର ମାନ୍ୟତାପ୍ରାପ୍ତ ବର୍ଟେନ୍ସ ଇନ୍ଷ୍ଟାଗ୍ରାମ୍ରେ ଉଲ୍ଲେଖ କରିଛନ୍ତି ଯେ, ଅଗଷ୍ଟ ୩୧ରୁ ସେପ୍ଟେମ୍ବର ୧୩ ପର୍ଯ୍ୟନ୍ତ ୟୁଏସ୍ ଓପନ୍ ପରେ ୟୁରୋପକୁ ଫେରିବା ବେଳେ କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ଟୁର୍ନାମେଣ୍ଟ ବେଳେ କୌଣସି ଦର୍ଶକ ଉପସ୍ଥିତ ରହିବେ ନାହିଁ। ଅନ୍ୟପକ୍ଷରେ ଫ୍ରେଞ୍ଚ ଓପନ୍ ସେପ୍ଟେମ୍ବର ୨୭ରୁ ଖେଳାଯିବ। ଏହି ଟୁର୍ନାମେଣ୍ଟର ୨୦୧୬ ସଂସ୍କରଣରେ ବର୍ଟେନ୍ସ ସେମିଫାଇନାଲରେ ପ୍ରବେଶ କରିପାରିଥିଲେ। ଫ୍ରେଞ୍ଚ ଓପନ୍ ଖେଳିବା ଲାଗି ପ୍ୟାରିସ୍ ଯିବା ପୂର୍ବରୁ ସେ ରୋମ୍ରେ ଏକ କ୍ଲେକୋର୍ଟ ଟୁର୍ନାମେଣ୍ଟ ଖେଳିବେ। ଗତଥରର ପୁରୁଷ ଚାମ୍ପିୟନ ରାଫାଲ ନାଡାଲ ମଧ୍ୟ ଏଥର ୟୁଏସ ଓପନରେ ଖେଳିବେ ନାହିଁ ବୋଲି କହିଛନ୍ତି। ମହାମାରୀ ସମୟରେ ଯାତାୟାତ ନିରାପଦ ନୁହେଁ ବୋଲି କହିଛନ୍ତି। ଆଣ୍ଠୁରେ ଦୁଇଟି ଅସ୍ତ୍ରୋପଚାର ଯୋଗୁ ରୋଜର ଫେଡରର ସିଜନର ଅବଶିଷ୍ଟ ସମୟ ବିଶ୍ରାମ ନେବାକୁ ନିଷ୍ପତ୍ତି ନେଇଛନ୍ତି।
