ସିଡନୀ,୭।୨: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଫେବୃଆରୀ ୯ରେ ନାଗପୁର ଗ୍ରାଉଣ୍ଡରେ ଆରମ୍ଭ ହେବ। କିନ୍ତୁ ଏହାପୂର୍ବରୁ କଙ୍ଗାରୁ ଦଳର ପୂର୍ବତନ ଅଧିନାୟକ ଆରୋନ ଫିଞ୍ଚ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ଫିଞ୍ଚ ୨୦୨୨ରେ ଦିନିକିଆ ଫର୍ମାଟକୁ ବିଦାୟ ନେଇଥିଲେ।
ଆରୋନ ଫିଞ୍ଚଙ୍କ ଅଧିନାୟକତ୍ୱରେ ଅଷ୍ଟ୍ରେଲିଆ ଦଳ ୨୦୨୧ରେ ପ୍ରଥମ ଥର ପାଇଁ ଟି-୨୦ ବିଶ୍ୱକପ ଜିତିଥିଲା। ୨୦୧୫ରେ କଙ୍ଗାରୁ ଦଳ ଦିନିକିଆ ବିଶ୍ୱକପ ଜିତିଥିବାବେଳେ ଫିଞ୍ଚ ମଧ୍ୟ ସେହି ସମୟରେ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ଥିଲେ। ଫିଞ୍ଚ ଜଣେ ଆକ୍ରମଣାତ୍ମକ ବ୍ୟାଟ୍ସମ୍ୟାନ। ତାଙ୍କର ୧୨ ବର୍ଷର କ୍ୟାରିୟରରେ ମାତ୍ର ୫ଟି ଟେଷ୍ଟ ମ୍ୟାଚ ଖେଳିଛନ୍ତି।
ଫିଞ୍ଚ ତାଙ୍କ ଅବସର ସମ୍ପର୍କରେ କହିଛନ୍ତି, ମୁଁ ଅନୁଭବ କରିଛି ଯେ ୨୦୨୪ରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପରେ ମୁଁ ଖେଳି ପାରିବି ନାହିଁ। ଏଭଳି ପରିସ୍ଥିତିରେ ବର୍ତ୍ତମାନ ଅବସର ନେବା ପାଇଁ ମୋର ଉପଯୁକ୍ତ ସମୟ, ତେଣୁ ଦଳ ଆଗକୁ ବଢିପାରିବ। ରଣନୀତି ଉପରେ କାର୍ଯ୍ୟ କରିବାବେଳେ ଅନ୍ୟ ଖେଳାଳି ପ୍ରସ୍ତୁତ ହୋଇପାରିବେ। ମୁଁ ଅଷ୍ଟ୍ରେଲୀୟ ଖେଳାଳି, ମୋ ଦଳ, ପରିବାର ଏବଂ ସ୍ତ୍ରୀଙ୍କୁ ଧନ୍ୟବାଦ ଜଣାଉଛି, ଯେଉଁମାନେ ମୋତେ ସବୁବେଳେ ସମର୍ଥନ କରିଛନ୍ତି। ଏଥି ସହିତ ମୁଁ ପ୍ରଶଂସକମାନଙ୍କୁ ମଧ୍ୟ ହୃଦୟର ଅନ୍ତରରୁ ଧନ୍ୟବାଦ ଜଣାଉଛି। ୨୦୨୧ରେ ଟି-୨୦ ବିଶ୍ୱକପ ଏବଂ ୨୦୧୫ରେ ଦିନିକିଆ ବିଶ୍ୱକପ ଜିତିବା ମୋ କ୍ୟାରିୟରର ସର୍ବୋତ୍ତମ ସ୍ମୃତି ହେବ
ତାଙ୍କ ଅଧିନାୟକତ୍ୱରେ ପ୍ରଥମ ଥର ପାଇଁ ଅଷ୍ଟ୍ରେଲିଆ ଦଳକୁ ଟି-୨୦ ବିଶ୍ୱକପ ବିଜେତା କରିଥିବା ଆରୋନ ଫିଞ୍ଚଙ୍କ ଅନ୍ତର୍ଜାତୀୟ କ୍ୟାରିୟର ବେଶ୍ ଭଲ ଥିଲା। ସେ ୧୪୬ଟି ଦିନିକିଆରେ ୧୭ ଶତକ ସହିତ ହାରାହାରି ୩୮.୮୯ରେ ମୋଟ ୫୪୦୬ ରନ ସଂଗ୍ରହ କରିଛନ୍ତି। ଅନ୍ୟପକ୍ଷରେ, ଫିଞ୍ଚ ୧୦୩ ଟି-୨୦ ଅନ୍ତର୍ଜାତୀୟ ମ୍ୟାଚରେ ହାରାହାରି ୩୪.୨୯ ୩୧୨୦ ରନ ସଂଗ୍ରହ କରିଛନ୍ତି। ଏଥିରେ ୨ଟି ଶତକ ସାମିଲ ଅଛି। ଏହା ବ୍ୟତୀତ ଫିଞ୍ଚ କଙ୍ଗାରୁ ଦଳ ପାଇଁ ୫ଟି ଟେଷ୍ଟ ମ୍ୟାଚ ଖେଳି ହାରାହାରି ୨୭.୦୮ରେ ମାତ୍ର ୨୭୮ ରନ ସଂଗ୍ରହ କରିଛନ୍ତି।
