ଓ୍ବାଶିଂଟନ୍,୧୧।୨: ୟୁକ୍ରେନ ସଙ୍କଟକୁ ନେଇ ଆମେରିକା ଏବଂ ରୁଷିଆ ମଧ୍ୟରେ ତକ୍ତତା ବୃଦ୍ଧି ପାଉଛି। ଆମେରିକା ରାଷ୍ଟ୍ରପତି ଜୋ ବାଇଡେନ ଗୁରୁବାର ପୁଣି ଚେତାବନୀ ଦେଇଛନ୍ତି। ଆମେରିକାର ନାଗରିକମାନଙ୍କୁ ତୁରନ୍ତ ୟୁକ୍ରେନ ଛାଡିବାକୁ ବାଇଡେନ୍ କହିଛନ୍ତି। ରୁଷୀୟ ସାମରିକ କାର୍ଯ୍ୟାନୁଷ୍ଠାନ ଏବଂ କୋଭିଡ-୧୯ ବିପଦ ବୃଦ୍ଧି ପାଉଥିବାରୁ ୟୁକ୍ରେନ ଯାଆନ୍ତୁ ନାହିଁ। ଯେଉଁମାନେ ୟୁକ୍ରେନରେ ଅଛନ୍ତି, ସେମାନେ ବ୍ୟାବସାୟିକ ଅଥବା ଘରୋଇ ପରିବହନ ମାଧ୍ୟମରେ ସେଠାରୁ ଚାଲି ଆସନ୍ତୁ। ଯଦି ଆମେରିକା ଓ ରୁଷି ସେନିକମାନେ ପରସ୍ପର ପ୍ରତି ଗୁଳି ଚଳାଇବେ ‘ବିଶ୍ବଯୁଦ୍ଧ’ ଲାଗିଯିବ। ଆମେ ବିଶ୍ବର ଅନ୍ୟତମ ବୃହତ୍ ସେନ୍ୟବାହିନୀର ମୁକାବିଲା କରୁଛୁ। ଏହା ଅତ୍ୟନ୍ତ ଭିନ୍ନ ପରିସ୍ଥିତି। କ୍ଷଣିକରେ ସବୁକିଛି ଓଲଟପାଲଟ ହୋଇଯାଇପାରେ ବୋଲି ବାଇଡେନ୍ କହିଛନ୍ତି।
ଏହାପୂର୍ବରୁ ୟୁକ୍ରେନ ସଙ୍କଟ ଉପରେ ଏକ ବୈଠକ ଡକାଇବାକୁ ଆମେରିକାର ଏକ ପ୍ରସ୍ତାବ ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସସି) ରେ ପାରିତ ହୋଇଛି। ଏହି ସମୟରେ ୟୁଏନଏସସି ବୈଠକରେ ହୋଇଥିବା ବିତର୍କରେ ଆମେରିକା ଏବଂ ରୁଷିଆର କୂଟନୀତିଜ୍ଞମାନେ ସିଧାସଳଖ ଝଗଡା କରିଥିଲେ। ୟୁକ୍ରେନ ଉପରେ ରାଷ୍ଟ୍ରଦୂତ ଭାସିଲି ନେବେଞ୍ଜିଆ ପାଶ୍ଚାତ୍ୟ ଦେଶଗୁଡିକୁ ୟୁକ୍ରେନ ପ୍ରସଙ୍ଗରେ ତିକ୍ତତା ବୃଦ୍ଧି କରିଥିବା ଅଭିଯୋଗ କରିଛନ୍ତି ଏବଂ ବିବାଦୀୟ ଅଞ୍ଚଳରେ ଆମେରିକା ନାଜିମାନଙ୍କୁ କ୍ଷମତାରେ ରଖିଛି ବୋଲି ସେ ଅଭିଯୋଗ କରିଛନ୍ତି। ୟୁକ୍ରେନ ସୀମାରେ ଏକ ଲକ୍ଷ ରୁଷିଆ ସୈନ୍ୟ ମୁତୟନକୁ ଆମେରିକା ବିରୋଧ କରିଛି।
ସୂଚନାଯୋଗ୍ୟ, ଡିସେମ୍ବର ୨୦୨୧ରେ, ୟୁକ୍ରେନ ଅଞ୍ଚଳ ନିକଟରେ ବଢୁଥିବା ହସ୍ତକ୍ଷେପ ସମ୍ପର୍କରେ ଆମେରିକାର ରାଷ୍ଟ୍ରପତି ଜୋ ବାଇଡେନ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଫୋନରେ କଥା ହୋଇଥିଲେ। ଏହି ପ୍ରସଙ୍ଗରେ ଦୁଇ ନେତାଙ୍କ ମଧ୍ୟରେ ପ୍ରାୟ ୫୦ ମିନିଟ ଧରି ଫୋନରେ ଆଲୋଚନା ହୋଇଥିଲା।
