ବଣାଇଁ, ୧୯।୬ (ପ୍ରଦୀପ ତ୍ରିପାଠୀ): ସୁନ୍ଦରଗଡ଼ ଜିଲା ବଣାଇଁ କ୍ଷୁଦ୍ର ଜଳସେଚନ ଉପବିଭାଗରେ ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗକୁ ନେଇ ଠିକାଦାର ମହାସଂଘ ପକ୍ଷରୁ ଶୁକ୍ରବାର କାର୍ଯ୍ୟାଳୟ ଘେରାଉ କରାଯାଇଥିବା ଦେଖାଯାଇଛି।
ବଣାଇଁ କ୍ଷୁଦ୍ର ଜଳସେଚନ ଉପବିଭାଗ ଅଧୀନ ଲହୁଣିପଡ଼ା ଅଞ୍ଚଳର ଗଣିଘସା ନିକଟରେ ନିର୍ମାଣାଧୀନ କଉଧର-(୨) ଚେକ୍ ଡ୍ୟାମ୍ର କାମ ଠିକାଦାର ନିଭା ମିଶ୍ର କରୁଛନ୍ତି। ସମ୍ପୃକ୍ତ କାର୍ଯ୍ୟଟି ୬୨ ଲକ୍ଷ ୪୯ ହଜାର ଟଙ୍କା ବ୍ୟୟ ଅଟକଳରେ ହେଉଥିବା ବେଳେ ଅତ୍ୟନ୍ତ ନିମ୍ନମାନର କାମ ହେଉଥିବା ନେଇ ସ୍ଥାନୀୟ ଲୋକେ ଠିକାଦାର ମହାସଂଘ ନିକଟରେ ଅଭିଯୋଗ କରିଥିଲେ।
ଅଭିଯୋଗ ପାଇବା ପରେ ସଂଘ ପକ୍ଷରୁ ଏକ ପ୍ରତିନିଧି ଦଳ ଆଜି ବଣାଇଁରେ ପହଞ୍ଚିଥିଲେ। ଠିକାଦାର ମହାସଂଘର ସଭାପତି ତାପସ କୁମାର ଆଚାର୍ଯ୍ୟଙ୍କ ନେତୃତ୍ୱରେ ଆସିଥିବା ପ୍ରତିନିଧି ଦଳଙ୍କୁ ବଣାଇଁ କ୍ଷୁଦ୍ର ଜଳସେଚନ ବିଭାଗର କନିଷ୍ଠ ଯନ୍ତ୍ରୀ ଅସହଯୋଗ କରିଥିବାରୁ ପରିସ୍ଥିତି ଉତ୍ତେଜନାମୂଳକ ହୋଇଉଠିଥିଲା।
ଉତ୍ୟକ୍ତ ଠିକାଦାରମାନେ ଉପବିଭାଗୀୟ କାର୍ଯ୍ୟାଳୟକୁ ଘେରାଉ କରିବା ପରେ ସହକାରୀ ନିର୍ବାହୀ ଯନ୍ତ୍ରୀ ସତ୍ୟଜିତ ରାଉତ ସେଠାରେ ପହଞ୍ଚି ଆଲୋଚନା କରିଥିଲେ। ପରେ ପରିସ୍ଥିତି ଶାନ୍ତ ପଡ଼ିଥିଲା। ସେ ତଦନ୍ତର ପ୍ରତିଶ୍ରୁତି ଦେବା ସହ ଠିକାଦାର ସଂଘର ଉପସ୍ଥିତିରେ ତଦନ୍ତ କରାଯିବ ବୋଲି କହିଥିଲେ। ଏଥିରେ ସଂଘ ପକ୍ଷରୁ ପୂର୍ଣ୍ଣ ସହଯୋଗ କରାଯିବ ବୋଲି କର୍ମକର୍ତ୍ତାମାନେ ଜଣାଇଥିଲେ।
ଏ ସମ୍ପର୍କରେ ସହକାରୀ ନିର୍ବାହୀ ଯନ୍ତ୍ରୀ ସତ୍ୟଜିତ ରାଉତ କହିଛନ୍ତି ଯେ, ସମ୍ପୃକ୍ତ ଠିକା ସଂସ୍ଥା କର୍ତ୍ତୃପକ୍ଷ ନିର୍ଦ୍ଦେଶ ମାନୁ ନଥିବାରୁ ସେ ଅସହାୟ ଅନୁଭବ କରୁଛନ୍ତି। ତାଙ୍କ କହିବା ଅନୁଯାୟୀ, ଜାନୁଆରୀ ମାସରେ ଆରମ୍ଭ ହୋଇଥିବା ଏହି କାମ ମେ’ ମାସ ସୁଦ୍ଧା ସମ୍ପୂର୍ଣ୍ଣ ହେବାକୁ ଥିଲା, କିନ୍ତୁ ଏପର୍ଯ୍ୟନ୍ତ ମାତ୍ର ୪୫ ପ୍ରତିଶତ କାମ ସମ୍ପନ୍ନ ହୋଇ ବନ୍ଦ ରହିଛି। ଏପରିକି ପ୍ରକଳ୍ପର ଅଟକଳ ମୂଲ୍ୟର ପ୍ରାୟ ଅଧା, ଅର୍ଥାତ୍ ପ୍ରାୟ ୩୦ ଲକ୍ଷ ଟଙ୍କା ବିଲ୍ ଆକାରରେ ଉଠାଯାଇ ସାରିଥିବା ସେ ସୂଚନା ଦେଇଛନ୍ତି।
ଠିକାଦାର ମହାସଂଘର ସଭାପତି ତାପସ କୁମାର ଆଚାର୍ଯ୍ୟଙ୍କ କହିବା ମୁତାବକ, ନାମକୁ ମାତ୍ର ନିଭା ମିଶ୍ର ଠିକାଦାର ଥିବା ବେଳେ ତାଙ୍କ ସ୍ୱାମୀ ସମସ୍ତ କାର୍ଯ୍ୟ ପରିଚାଳନା କରୁଛନ୍ତି। ଏହି ମହଙ୍ଗା ସମୟରେ ୧୫ ପ୍ରତିଶତ କମ୍ ଦରରେ କାମ କରିବା ପାଇଁ ଟେଣ୍ଡରରେ ଉଲ୍ଲେଖ କରାଯାଇଥିବାରୁ ସେମାନେ କାମ ପାଇଛନ୍ତି। କିନ୍ତୁ ବାସ୍ତବରେ ଏତେ କମ୍ ଦରରେ ଗୁଣାତ୍ମକ କାମ କରିବା ସମ୍ଭବ ନୁହେଁ। ତେଣୁ ନିମ୍ନମାନର କାର୍ଯ୍ୟ କରି ବିଲ୍ ଉଠାଇ ନେବାକୁ ଚକ୍ରାନ୍ତ କରାଯାଉଥିବା ସେ ଅଭିଯୋଗ କରିଛନ୍ତି।
ସାଧାରଣ ଜନତାଙ୍କ ଅଭିଯୋଗକୁ ପ୍ରାଥମିକତା ଦେଇ ଠିକାଦାର ମହାସଂଘ ପକ୍ଷରୁ ଏହାର ନିରପେକ୍ଷ ତଦନ୍ତ ଦାବି କରାଯାଇଛି। ସଂଘର ସଦସ୍ୟମାନଙ୍କ ଉପସ୍ଥିତିରେ ତଦନ୍ତ କରାଯିବାକୁ ସଂଘ ସଭାପତି ତାପସ ଆଚାର୍ଯ୍ୟ ଦାବି କରିଛନ୍ତି।
ପରିଶେଷରେ ସହକାରୀ ନିର୍ବାହୀ ଯନ୍ତ୍ରୀଙ୍କୁ ନେଇ ଏକ ତଦନ୍ତ ଟିମ୍ ଠିକାଦାର ମହାସଂଘର ତତ୍ତ୍ୱାବଧାନରେ ସମ୍ପୃକ୍ତ ସ୍ଥାନକୁ ଗସ୍ତ କରିଥିବା ସୂଚନା ମିଳିଛି।
