ଥୁଆମୂଳ ରାମପୁର,୫ା୩: ଅଧ୍ୟାତ୍ମିକତା ଓ ପାରମ୍ପରିକ ରୀତିନୀତି ମଧ୍ୟରେ କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ବିଭିନ୍ନ ସ୍ଥାନରେ ରଙ୍ଗର ପର୍ବ ‘ହୋଲି’ ଅତି ଉତ୍ସାହ ଓ ଶାନ୍ତିଶୃଙ୍ଖଳାର ସହ ସମ୍ପନ୍ନ ହୋଇଯାଇଛି। ସହରଠାରୁ ଆରମ୍ଭ କରି ପଲ୍ଲୀ ପର୍ଯ୍ୟନ୍ତ ସବୁଠି ରଙ୍ଗ ଓ ଅବିରରେ ରଙ୍ଗେଇ ହୋଇଛନ୍ତି ଆବାଳବୃଦ୍ଧବନିତା। ପର୍ବ ଅବସରରେ ସ୍ଥାନୀୟ ମନ୍ଦିରଗୁଡ଼ିକରେ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା। ଗ୍ରାମର ମୁଖ୍ୟ ମନ୍ଦିର ଆଗରେ ଏକତ୍ରିତ ହୋଇ ଯୁବକ ଓ ଶିଶୁମାନେ ପରସ୍ପରକୁ ରଙ୍ଗ ଏବଂ ଅବିର ଲଗାଇ ଖୁସି ମନାଇଥିଲେ। ଅନେକ ସ୍ଥାନରେ ଯୁବକ ସଂଘ ପକ୍ଷରୁ ‘ଦହି ହାଣ୍ଡି’ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଗ୍ରାମର ବା ପଡ଼ା ଛକ ମଝିରେ ବନ୍ଧାଯାଇଥିବା ଦହି ହାଣ୍ଡିକୁ ଫୁଟାଇବା ପାଇଁ ଯୁବକମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା। ଏଥିସହିତ ସାଂସ୍କୃତିକ କାର୍ଯ୍ୟକ୍ରମ ଭାବେ କେତେକ ସ୍ଥାନରେ ନାଟକ ମଧ୍ୟ ପରିବେଷଣ କରାଯାଇଥିଲା, ଯାହା ଗ୍ରାମବାସୀଙ୍କୁ ବେଶ ମନୋରଞ୍ଜନ ଯୋଗାଇଥିଲା। ବିଭିନ୍ନ ଗ୍ରାମାଞ୍ଚଳରେ କୁନିକୁନି ଶିଶୁମାନେ ଦଳଗତ ଭାବେ ରଙ୍ଗ ଖେଳିବା ସହ ଫଟୋ ଉଠାଇ ଏହି ଦିନଟିକୁ ସ୍ମରଣୀୟ କରିଛନ୍ତି। ଯୁବକ ଓ ବୟୋଜ୍ୟେଷ୍ଠମାନେ ପରସ୍ପରକୁ ରଙ୍ଗ ଲଗାଇ ଭାଇଚାରାର ବାର୍ତ୍ତା ବାଣ୍ଟିଥିଲେ। ଉତ୍ସବର ଖୁସିରେ ସମଗ୍ର ଅଞ୍ଚଳ ଚଳଚଞ୍ଚଳ ହୋଇଉଠିଥିଲା। ହୋଲି ସମୟରେ ଯେପରି କୌଣସି ଅପ୍ରୀତିକର ପରିସ୍ଥିତି କିମ୍ବା ଗଣ୍ଡଗୋଳ ନ ଘଟେ, ସେଥିପାଇଁ ଥୁଆମୂଳ ରାମପୁର ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ଥାନା ଅଧିକାରୀ କୈବଲ୍ୟ ସେଠ୍ଙ୍କ ସମେତ ପୋଲିସ କର୍ମଚାରୀମାନେ ବିଭିନ୍ନ ଛକ ଓ ଜନଗହଳିପୂର୍ଣ୍ଣ ସ୍ଥାନରେ ମୁତୟନ ହୋଇ ସତର୍କ ଦୃଷ୍ଟି ରଖିଥିଲେ। ପୋଲିସର କଡ଼ା ପାଟ୍ରୋଲିଂ ଯୋଗୁ ସମଗ୍ର ବ୍ଲକରେ ହୋଲି ପର୍ବ ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି। ଏହି ପର୍ବ ମାଧ୍ୟମରେ ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ ଏକାଠି ହୋଇ ଭାଇଚାରାର ବାର୍ତ୍ତା ଦେଇଛନ୍ତି। ରଙ୍ଗବୋଳା ମୁହଁରେ ହସର ଲହରି ଖେଳିଯାଇଥିବା ବେଳେ ପ୍ରଶାସନ ପକ୍ଷରୁ ସଜାଗ ଦୃଷ୍ଟି ଦିଆଯାଇଥିବାରୁ ସ୍ଥାନୀୟ ବୁଦ୍ଧିଜୀବୀମାନେ ସନ୍ତୋଷ ପ୍ରକାଶ କରିଛନ୍ତି।
