ନୂଆଦିଲ୍ଲୀ,୮।୪: ଚଳିତ ବର୍ଷ ହେବାକୁ ଥିବା ଆଇପିଏଲ୍କୁ ଆଉ ମାତ୍ର କିଛି ଘଣ୍ଟା ବାକି ଅଛି। ଏହାକୁ ନେଇ ପ୍ରଶଂସକଙ୍କ ସହ ଖେଳାଳିଙ୍କ ଉତ୍କଣ୍ଠା ବଢ଼ିବାରେ ଲାଗିଛି। ଆଇପିଏଲ୍ରେ ଚେନ୍ନାଇ ସୁପରକିଙ୍ଗ୍ସ ଏକ ଶକ୍ତିଶାଳୀ ଦଳ ଭାବରେ ପରିଗଣିତ ହୋଇଛି। ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ତିନିଥର ଆଇପିଏଲ ଟାଇଟଲ ଜିତିଛି ଦଳ। ହେଲେ ଗତ ସିଜନରେ ଏହା ସେତେଟା ଭଲ ପ୍ରଦର୍ଶନ କରିପାରି ନ ଥିଲା। ଏଥର ଧୋନୀ ପୁଣି ଥରେ ଉଲ୍ଲେଖନୀୟ ପ୍ରଦର୍ଶନ କରିବାକୁ ଯଥାସମ୍ଭବ ଚେଷ୍ଟା କରିବ।
ତେବେ ଆସନ୍ତା ସିଜନରେ ଦଳର ଅନେକ ଖେଳାଳି ଆମକୁ ଦେଖିବାକୁ ମିଳି ନ ପାରନ୍ତି। ଅଧିନାୟକ ଧୋନୀ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଛନ୍ତି। ଏଣୁ ଏହା ତାଙ୍କର ଶେଷ ଆଇପିଏଲ୍ ହୋଇପାରେ ବୋଲି କୁହାଯାଉଛି। ଏହାଛଡ଼ା ଚେନ୍ନାଇ ସୁପର କିଙ୍ଗ୍ସର ଅନ୍ୟ କିଛି ଖେଳାଳି ଏହି ସିଜିନ ପରେ ଆଇପିଏଲକୁ ବିଦାୟ କହିପାରନ୍ତି। ଆସନ୍ତୁ ଜାଣିବା:
୧) ମହେନ୍ଦ୍ର ସିଂ ଧୋନୀ:
ମହେନ୍ଦ୍ର ସିଂ ଧୋନୀ ଅନ୍ତର୍ଜାତୀୟ କ୍ରିକେଟର ପ୍ରତ୍ୟେକ ଫର୍ମାଟରୁ ଅବସର ନେଇସାରିଛନ୍ତି। ଏହା ତାଙ୍କର ଶେଷ ଆଇପିଏଲ ସିଜନ ହୋଇପାରେ। ଏହି ସିଜନ ପରେ ଧୋନିଙ୍କୁ ଆଉ ପଡ଼ିଆରେ ଦେଖାଯାଇ ନ ପାରେ। ଗତ ଆଇପିଏଲ୍ରେ ଧୋନୀ ଅବସର ନେଇଥିବା ଶୁଣିବାକୁ ମିଳିଥିଲା। କିନ୍ତୁ ଧୋନୀ ଏହାକୁ ସମ୍ପୂର୍ଣ୍ଣ ଭାବେ ପ୍ରତ୍ୟାଖ୍ୟାନ କରିଥିଲେ। ଏହି ପରିପ୍ରେକ୍ଷୀରେ କ୍ରିକେଟ ସମୀକ୍ଷକ ଡାନି ମୋରିସନ ପଚାରିଥିବା ଏକ ପ୍ରଶ୍ନର ଉତ୍ତରରେ ସେ ବର୍ତ୍ତମାନ ଖେଳିବା ଜାରି ରଖିବେ ବୋଲି କହିଥିଲେ। ତେବେ ଧୋନୀ ଚେନ୍ନାଇ ସୁପର କିଙ୍ଗ୍ସ ପାଇଁ ଧୋନୀ ଏପର୍ଯ୍ୟନ୍ତ ୧୧ଟି ସିଜନ ଅଧିନାୟକ କରିଛନ୍ତି। ଧୋନୀଙ୍କ ନେତୃତ୍ୱରେ ଦଳ ୨୦୧୦, ୨୦୧୧ ଏବଂ ୨୦୧୮ରେ ଆଇପିଏଲ୍ ଟାଇଟଲ ଜିତିଛ। ହେଲିକପ୍ଟର ସଟ ପାଇଁ ଜଣାଶୁଣା ୩୯ ବର୍ଷୀୟ ଧୋନୀ ୧୭୪ ଆଇପିଏଲ ମ୍ୟାଚରେ ୪୦୫୮ ରନ ସଂଗ୍ରହ କରିଛନ୍ତି।
୨) ଇମ୍ରାନ ତାହିର: ୪୨ ବର୍ଷୀୟ ଏହି କ୍ରିକେଟର ମଇଦାନରେ ନିଜର ଶକ୍ତି ପାଇଁ ଜଣାଶୁଣା। ଇମ୍ରାନ ଜଣେ ଅଭିଜ୍ଞ ବୋଲର। ସ୍ପିନ୍ର ଜାଲରେ ସେ ବ୍ୟାଟ୍ସମ୍ୟାନ୍ମାନଙ୍କୁ କିପରି ଫସାଇବେ ଜାଣନ୍ତି। ବୋଲିଂରେ ଉଲ୍ଲେଖନୀୟ ପ୍ରଦର୍ଶନ ପାଇଁ ଇମ୍ରାନଙ୍କୁ ୨୦୧୮ରେ ବାଇଗଣୀ କ୍ୟାପ୍ ମିଳିଥିଲା। କିନ୍ତୁ ଗତ ସିଜନରେ ସେ କେବଳ ତିନୋଟି ମ୍ୟାଚ ଖେଳିଥିଲେ। ୫୮ ଟି ଆଇପିଏଲ ମ୍ୟାଚରେ ଇମ୍ରାନ ତାହିର ୮୦ ୱିକେଟ ନେଇଛନ୍ତି।
୩) ଡାରେନ ବ୍ରାଭୋ: ୱେଷ୍ଟଇଣ୍ଡିଜର ଏହି କ୍ରିକେଟର ଚେନ୍ନାଇ ସୁପର କିଙ୍ଗ୍ସ ପାଇଁ ଖେଳନ୍ତି। ସେ ଜଣେ ଉତ୍କୃଷ୍ଟ ଅଲରାଉଣ୍ଡର। କିନ୍ତୁ ଗତ କିଛି ସିଜନରେ ବ୍ରାଭୋ ଭଲ ପ୍ରଦର୍ଶନ କରିନାହାନ୍ତି। ଏଣୁ ସେ ପୁଣି ଥରେ ଲୟକୁ ଆସିବାକୁ ବାଟ ଖୋଜୁଛନ୍ତି। ଏହି ସିଜନ ପରେ ତାଙ୍କୁ ଆଇପିଏଲରେ ଦେଖିବାକୁ ମିଳି ନ ପାରେ ବୋଲି କୁହାଯାଉଛି। ତେବେ ବ୍ରାଭୋ ୧୪୦ ମ୍ୟାଚ୍ରେ ୧୪୯୯ ରନ୍ ବ୍ୟତୀତ ୧୫୩ ଉଇକେଟ ନେଇଛନ୍ତି।
୪) ସୁରେଶ ରାଇନା: ଗତ ବର୍ଷ ଅନ୍ତର୍ଜାତୀୟ କ୍ରିକେଟରୁ ଅବସର ନେଇ ସୁରେଶ ରାଇନା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲେ। ଧୋନୀଙ୍କ ସହ ସେ ତାଙ୍କ ଅବସର ଘୋଷଣା କରିବେ ବୋଲି ତାଙ୍କ ପ୍ରଶଂସକମାନେ ଆଶା କରି ନ ଥିଲେ। ରାଇନା ତାଙ୍କ ଫର୍ମ ଏବଂ ଫିଟନେସ୍ ସହ ସଂଘର୍ଷ କରିଆସୁଛନ୍ତି। ଗତ କିଛି ସିଜନରେ ତାଙ୍କର ପ୍ରଦର୍ଶନ ସେତେଟା ଭଲ ନାହିଁ। ହୋଇପାରେ ସେ ଚଳିତ ସିଜିନ ପରେ ଆଇପିଏଲ୍କୁ ବିଦାୟ ନେଇପାରନ୍ତି। ରାଇନା ଆଇପିଏଲରେ ୧୯୩ ମ୍ୟାଚ୍ରେ ୫୩୬୮ ରନ କରି ଲିଗ୍ର ଦ୍ୱିତୀୟ ସର୍ବାଧିକ ରନ କରିଥିବା ଖେଳାଳି ଅଟନ୍ତି।
