ନୂଆଦିଲ୍ଲୀ,୧୦।୧୦: ଆଇସିସି ଟି -୨୦ ବିଶ୍ୱକପ ଆରମ୍ଭ ପାଇଁ ଆଉ କିଛି ଦିନ ବାକି ଅଛି। ୟୁଏଇ ଏବଂ ଓମାନରେ ଆୟୋଜିତ ହେବାକୁ ଥିବା ଆଇସିସିର ଏହି ବଡ ଟୁର୍ନାମେଣ୍ଟ ପାଇଁ ବିଭିନ୍ନ ଦଳ ଏଠାରେ ପହଞ୍ଚିବା ଆରମ୍ଭ କରିଛନ୍ତି। ଆଇସିସି ମଧ୍ୟ ଟୁର୍ନାମେଣ୍ଟ ସମ୍ପୂର୍ଣ୍ଣ ପ୍ରସ୍ତୁତି କରୁଛି। ରବିବାର ଅନ୍ତର୍ଜାତୀୟ କ୍ରିକେଟ ପରିଷଦ ଏହି ଟୁର୍ନାମେଣ୍ଟ ପାଇଁ ପୁରସ୍କାର ରାଶି ଘୋଷଣା କରିଛି। ପାଞ୍ଚ ବର୍ଷ ପରେ ଖେଳାଯାଉଥିବା ଟି -୨୦ ବିଶ୍ୱକପରେ ଏଥର ବିଜେତାମାନଙ୍କ ଉପରେ ବହୁତ ଟଙ୍କା ବର୍ଷା ହେବ।
ଆଇସିସି ଦ୍ୱାରା ପ୍ରକାଶିତ ଏକ ରିପୋର୍ଟ ଅନୁଯାୟୀ, ଟୁର୍ନାମେଣ୍ଟ ଜିତୁଥିବା ଦଳକୁ ୧.୬ ମିଲିୟନ (ପାଖାପାଖି ୧୨କୋଟି) ଏବଂ ରନର୍ସଅପ ଦଳ ୮ ଲକ୍ଷ ଡଲାର (ପ୍ରାୟ ୬୦ କୋଟି) ପାଇବେ। ଟି -୨୦ ବିଶ୍ୱକପ୍ର ସେମିଫାଇନାଲିଷ୍ଟମାନଙ୍କୁ ପ୍ରାୟ ୩ କୋଟି ପୁରସ୍କାର ରାଶି ମିଳିବ। ଏହା ବ୍ୟତୀତ ଆଇସିସି ସୁପର ୧୨ ପର୍ଯ୍ୟାୟରେ ପ୍ରତ୍ୟେକ ମ୍ୟାଚ ଜିତିବା ପାଇଁ ଦଳକୁ ବୋନସ ପ୍ରଦାନ ଜାରି ରଖିବ।
ଅକ୍ଟୋବର ୧୭ରୁ ଟୁର୍ନାମେଣ୍ଟର ଉଦଘାଟନୀ ମ୍ୟାଚରେ ଓମାନ ଏବଂ ପାପୁଆ ନ୍ୟୁ ଗିନି ମୁହାଁମୁହିଁ ହେବେ। ଫାଇନାଲ ନଭେମ୍ବର ୧୪ରେ ଦୁବାଇ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯିବ। ଅକ୍ଟୋବର ୨୪ରେ ପାକିସ୍ତାନ ବିପକ୍ଷ ବିଶ୍ୱକପରେ ଟୁର୍ନାମେଣ୍ଟ ଆୟୋଜକ ଭାରତ ପ୍ରଥମ ମ୍ୟାଚ ଖେଳିବ। ଏହା ପରେ ଭାରତୀୟ ଦଳ ୩୧ ଅକ୍ଟୋବରରେ ନ୍ୟୁଜିଲାଣ୍ଡ ଏବଂ ପରେ ୩ ନଭେମ୍ବରରେ ଆଫଗାନିସ୍ତାନକୁ ଭେଟିବ। ଏଥର ମୋଟ ୧୬ଟି ଦଳ ବିଶ୍ୱକପରେ ଭାଗ ନେଉଛନ୍ତି ଏବଂ ଟିମ-ଇଣ୍ଡିଆକୁ ଗ୍ରୁପ -୨ ରେ ସ୍ଥାନିତ କରାଯାଇଛି ।
