ରସୁଲପୁର,୨୬ା୧୨(ଡି.ଏନ.ଏ.):ରସୁଲପୁର ତହସିଲ ପହଁଗା ରାଜସ୍ବ ନିରୀକ୍ଷକ ସର୍କଲ ଅଧୀନ ଲକ୍ଷ୍ମୀନଗର ପଞ୍ଚାୟତ ବାଲିଆପଶି ଗାଁର କାଜୁ ଜଙ୍ଗଲ ନିକଟସ୍ଥ ମଙ୍ଗଳା ମନ୍ଦିର ପାଖରୁ ରାତିଅଧିଆ ମୋରମ ଚୋରା ଚାଲାଣ ହେଉଛି। ହେଲେ ଏନେଇ ତହସିଲ ପ୍ରଶାସନ ପାଖରେ ଖବର ନ ଥିବା ଜଣାଯାଇଛି। ଚୋରା ଚାଲାଣକାରୀ ରାତିରେ ଜେସିବି ଓ ଟ୍ରାକ୍ଟର ଲଗାଇ ମୋରମ ପରିବହନ କରୁଛନ୍ତି। ଫଳରେ ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଚାପା ଗୁଞ୍ଜରଣ ସୃଷ୍ଟି ହେଉଛି। ହେଲେ ଚାଲାଣ ହେଉଥିବା ଲଘୁଖଣିଜ ସାମଗ୍ରୀ ଆଇନସିଦ୍ଧ କି ନାହିଁ ସେ ସମ୍ପର୍କରେ ସ୍ଥାନୀୟ ଜନସାଧାରଣ ଅବଗତ ନ ଥିବାରୁ ଅଭିଯୋଗ କରି ପାରିନାହାନ୍ତି ବୋଲି ସେମାନଙ୍କଠାରୁ ସୂଚନା ମିଳିଛି। ଅନ୍ୟପକ୍ଷରେ ଏହାକୁ ସୁଯୋଗ ମନେକରି ମାଫିଆ ଲୁଘୁ ଖଣିଜ ସାମଗ୍ରୀ ଚାଲାଣ କରୁଛନ୍ତି ବୋଲି ସ୍ଥାନୀୟ ଲୋକେ ମତ ରଖିଛନ୍ତି। ବାଲିଆପଶି ଓ ଛୋଟରାୟପୁର ଗାଁର କେତେଜଣ ପ୍ରଭାବଶାଳୀ ଲୋକଙ୍କ ସହାୟତାରେ ବାହାରକୁ ମୋରମ ଚାଲାଣ ହେଉଛି ବୋଲି ସୂଚନା ମିଳିଛି। ତେବେ ମୋରମ ଚାଲାଣ ବେଆଇନ ବୋଲି ଜାଣିବା ପରେ ଲୋକେ ଏହାକୁ ବିରୋଧ କରିବା ସହ ତହସିଲ ପ୍ରଶାସନର ସହାୟତା ନେବାକୁ ସଜବାଜ ହେଉଥିବା କହିଛନ୍ତି।
ସୂଚନା ମୁତାବକ, କୋରେଇ ଓ ରସୁଲପୁର ବ୍ଲକ ସୀମାବର୍ତ୍ତୀ ଅଞ୍ଚଳରେ ବାଲିଆପଶି ଗାଁ। ଏହି ଗାଁଟି ରସୁଲପୁର ତହସିଲରୁ ୧୫ କ.ମି.ରୁ ଊର୍ଦ୍ଧ୍ୱ ଦୂରରେ ଅବସ୍ଥିତ ଥିବା ବେଳେ ବ୍ୟାସନଗର ତହସିଲଠାରୁ ଅନିତଦୂରରେ ରହିଛି। ଏହି ଅଞ୍ଚଳରେ କୋରେଇ ଓ ବ୍ୟାସନଗର ପୌରପରିଷଦ ରାଜନେତା, ପ୍ରଶାସନିକ ଅଧିକାରୀ, ଠିକାଦାରଙ୍କ ପ୍ରଭାବ ଅଧିକ ରହୁଛି। ଏହି ପଞ୍ଚାୟତର ଜନସାଧାରଣଙ୍କ ଚଳଣି ବ୍ୟାସନଗର ପୌରପିରଷଦ ଅଞ୍ଚଳରେ ଅଧିକା। ମୋରମ ଭଳି ମୂଲ୍ୟବାନ ଲଘୁ ଖଣିଜ ସାମଗ୍ରୀ ଜିଲାର କାଁଭାଁ ସ୍ଥାନକୁ ଛାଡି ଦେଲେ ପ୍ରାୟତଃ ଅନ୍ୟ କୌଣସି ସ୍ଥାନରେ ଖନନ ପାଇଁ ପ୍ରଶାସନିକ ଅନୁମତି ନାହିଁ। ଠିକାଦାର ଓ ମାଫିଆ ବାଲିଆପଶି ଗାଁକାଜୁ ଜଙ୍ଗଲକୁ ମାଟିମିଶା ମୋରମ ଚୋରି କରିବା ପାଇଁ ନିଶାଣା କରି ଏଭଳି ପଦକ୍ଷେପ ନେଇଛନ୍ତି। ହେଲେ ତହସିଲ ପ୍ରଶାସନ ଏହାର ଟେର ପାଉନାହିଁ। ବ୍ୟାସନଗର ତହସିଲ ପାଇଁ ସବୁ ଖୋଲାମେଲା ହୋଇଥିଲେ ବି ଅଞ୍ଚଳଟି ଉକ୍ତ ତହସିଲ ଅଧୀନରେ ଆସୁନାହିଁ। ତେଣୁ ବ୍ୟାସନଗର ତହସିଲ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ।
ଏ ସମ୍ପର୍କରେ ପହଁଗା ରାଜସ୍ବ ନିରୀକ୍ଷକ ରମେଶ ଚନ୍ଦ୍ର ସାହୁଙ୍କୁ ପଚାରିବାରୁ ସେ ଏ ନେଇ ଅବଗତ ନାହାନ୍ତି। ମୋରମ ଉଠାଇବା ପାଇଁ ବାଲିଆପଶି ଗାଁରେ କୌଣସି ସୈରାତ ନିଲାମ ଦିଆଯାଇ ନାହିଁ। ମାତ୍ର ଏ ସମ୍ପର୍କରେ ସୂଚନା ପାଇଥିବାରୁ ସେ ସଜାଗ ଅଛନ୍ତି। ରାତି ଅଧିଆ ଏନଫୋର୍ସମେଣ୍ଟ୍ କରାଯାଇ ଚାଲାଣରେ ସମ୍ପୃକ୍ତ ବ୍ୟକ୍ତିଙ୍କୁ ଧରାଯିବ ବୋଲି ସେ ମତ ରଖିଛନ୍ତି। ସ୍ଥାନୀୟ ସରପଞ୍ଚ ସର୍ବେଶ୍ୱର ସାହୁଙ୍କୁ ପଚାରିବାରୁ ସେ ଅବଗତ ନ ଥିବା ପ୍ରକାଶ କରିଛନ୍ତି। ଯଦି ମାଟି ଓ ମୋରମ ଉଠୁଥାଏ ତେବେ ତାହା ବେଆଇନ ବୋଲି ସେ କହିଛନ୍ତି।
