ଅନୁଗୋଳ ଅଫିସ,୧୮ା୩- ଅନେକଥର ପୌର ନିର୍ବାଚନ ହେଲାଣି। କେତେ କାଉନସିଲରଙ୍କ କାର୍ଯ୍ୟକାଳ ସରିଲାଣି। ହେଲେ ଅନୁଗୋଳ ପୌର ପରିଷଦର ୧୯ନଂ. ଓ୍ବାର୍ଡ ଏବେ ବି ଅବହେଳିତ ଅବସ୍ଥାରେ ପଡ଼ିଛି। ପ୍ରମୁଖ ସମସ୍ୟା କୁହାଯାଉଥିବା ଡ୍ରେନ୍ ବ୍ୟବସ୍ଥାକୁ ଆଦୌ ଗୁରୁତ୍ୱ ଦିଆଯାଉ ନାହିଁ।
ଅନୁଗୋଳ ପୌରାଞ୍ଚଳର ହେମସୁରପଡ଼ା ଅଞ୍ଚଳକୁ ନେଇ ୧୯ନଂ. ଓ୍ବାର୍ଡ ଗଠିତ। ଲୋକ ସଂଖ୍ୟା ତୁଳନାରେ ଏହା ପୌର ପରିଷଦର ୬ଷ୍ଠ ବୃହତ୍ତମ ଓ୍ବାର୍ଡ। ଏଠାକାର ଲୋକ ସଂଖ୍ୟା ୨୪୯୦ ହୋଇଥିବା ବେଳେ ୨୦୪୨ଜଣ ଭୋଟର ରହିଛନ୍ତି। ଆସନ୍ତା ୨୪ ତାରିଖରେ ପୌର ନିର୍ବାଚନର ଭୋଟ ଗ୍ରହଣ ହେବାକୁ ଥିବାରୁ ପ୍ରାର୍ଥୀମାନଙ୍କ ଗହଳି ଚହଳି ଏଠାରେ ଲାଗି ରହିଛି। ସ୍ଥାନୀୟ ନେତାମାନଙ୍କ ସହ ସେମାନେ ଘର ଘର ବୁଲି ଭୋଟରଙ୍କୁ ଭେଟୁଛନ୍ତି। ସେମାନଙ୍କ ଦୁଃଖସୁଖରେ ସାମିଲ ହେବାର ପ୍ରତିଶ୍ରୁତି ଦେଉଛନ୍ତି। ଓ୍ବାର୍ଡର ଉନ୍ନୟନ କରିବେ ବୋଲି କହୁଛନ୍ତି। ହେଲେ ଡ୍ରେନ୍ ସମସ୍ୟାର ସମାଧାନ ହେବ ବୋଲି ଲୋକେ ଆଉ ବିଶ୍ୱାସ କରୁନାହାନ୍ତି। କାରଣ ଅତୀତରେ ଅନେକ କାଉନସିଲର ଏଠାରୁ ନିର୍ବାଚିତ ହୋଇଥିଲେ ମଧ୍ୟ ସେମାନେ ଏଥିପ୍ରତି ଦୃଷ୍ଟି ଦେଇନାହାନ୍ତି। ଚଳିତ ନିର୍ବାଚନରେ ଏହି ଓ୍ବାର୍ଡରୁ ବଳରାମ ଜେନା ବିଜେଡି ପ୍ରାର୍ଥୀ ହୋଇଛନ୍ତି। କଲ୍ଲୋଳକାନ୍ତ ସାହୁ ଭାଜପାରୁ ଓ ଭଗବାନ ମହାନ୍ତି କଂଗ୍ରେସ ପ୍ରାର୍ଥୀ ଭାବେ ଲଢ଼େଇ କରୁଛନ୍ତି। ତେବେ ୩ ପ୍ରାର୍ଥୀଙ୍କ ମଧ୍ୟରୁ ଯିଏ ବି ବିଜୟୀ ହୁଅନ୍ତୁ, ସେ ଅବ୍ୟବସ୍ଥା ଘେରରେ ଥିବା ଡ୍ରେନ୍କୁ ସୁବ୍ୟବସ୍ଥିତ କରନ୍ତୁ ବୋଲି ଓ୍ବାର୍ଡବାସୀ ଦାବି କରୁଛନ୍ତି। ଏହି ଓ୍ବାର୍ଡର ସବିତା ଦାସ କହିଛନ୍ତି, ଡ୍ରେନ୍ ବ୍ୟବସ୍ଥା ଠିକ୍ ନ ଥିବାରୁ ଆବର୍ଜନା ଜଳ ନିଷ୍କାସିତ ହୋଇପାରୁ ନାହିଁ। ଫଳରେ ଦୂଷିତ ପରିବେଶ ମଧ୍ୟରେ ରହିବାକୁ ପଡ଼ୁଛି। ମଶା, ମାଛି ବଂଶ ବୃଦ୍ଧି ପାଉଥିଲେ ମଧ୍ୟ ପ୍ରତିକାର କରାଯାଉ ନାହିଁ।
