ବାରିପଦା,୭ା୩(ନୀଳାଦ୍ରି ବିହାରୀ ଦଣ୍ଡପାଟ)ଦେଶ ସ୍ବାଧୀନତାର ୭୭ବର୍ଷ ପରେ ମଧ୍ୟ ଗଁାକୁ ଭଲ ରାସ୍ତା ନାହିଁ ା ମାଳ ମାଳ ସରକାରୀ ଯୋଜନା କାର୍ଯ୍ୟକାରୀ ହେଉଥିବା ବେଳେ ମୌଳିକ ସୁବିଧା ମିଳି ପାରୁନାହିଁ। ଜିଲାରେ ଜଣେ କେନ୍ଦ୍ରମନ୍ତ୍ରୀଙ୍କ ସମେତ ୩ ମନ୍ତ୍ରୀ ଥାଇ ମଧ୍ୟ ବର୍ଷ ବର୍ଷ ଧରି ମୁଠାଏ ମାଟି ପଡ଼ି ପାରିନାହିଁ। କେବଳ ଭାଷଣବାଜିରେ ନେତା କମ୍ପାଉଥିବା ବେଳେ ଗଁାକୁ ରାସ୍ତା ନାହିଁି ତ ଏଥର ନେତାଙ୍କୁ ଭୋଟ ନାହିଁ ବୋଲି ମୟୂରଭଞ୍ଜ ଜିଲା ଖୁଣ୍ଟା ବ୍ଲକ ଅଧୀନ ବାହାନଡ଼ା ପଞ୍ଚାୟତର ହୀରାପୁର ଗ୍ରାମବାସୀ ଚେତାବନୀ ଦେଇଛନ୍ତି। ଗ୍ରାମର ମହିଳା ପୁରୁଷ ଏକଜୁଟ ହୋଇ ବୁଧବାର ଜିଲାପାଳଙ୍କୁ ସାକ୍ଷାତ କରି ଅଭିଯୋଗ ପତ୍ର ପ୍ରଦାନ କରିଛନ୍ତି। ରାସ୍ତା ନିର୍ମାଣ ନ ହେଲେ ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜନ କରିବା ସହ ରାଜରାସ୍ତାକୁ ଓହ୍ଲାଇବେ ଗ୍ରାମବାସୀ କହିଛନ୍ତି।
ଜିଲା ମୁଖ୍ୟାଳୟ ବାରିପଦା-ଉଦଳା ରାସ୍ତାର ଖୁଣ୍ଟା ବ୍ଲକ ସାନପଥରା ଛକଠାରୁ ଯାଇଥିବା କଚ୍ଚା ରାସ୍ତାଟି ବାହାନଡ଼ା ଓ କରକଚିଆ ପଞ୍ଚାୟତକୁ ସଂଯୋଗ କରୁଛି। ବାହାନଡ଼ା ପଞ୍ଚାୟତ ଅନ୍ତର୍ଗତ ୧୩ନଂ. ୱାର୍ଡରେ ହୀରାପୁର ଓ ୧୫ନଂ.ୱାର୍ଡରେ କାଦପଳସା ରାଜସ୍ବ ଗ୍ରାମ ରହିଛି। ପାଖାପାଖି ଶହେ ପରିବାରର ୫୦୦ରୁ ଊର୍ଦ୍ଧ୍ୱ ଲୋକ ଏଠାରେ ବସବାସ କରୁଥିବା ବେଳେ ସମସ୍ତେ ଚାଷ ଓ ଦିନ ମଜୁରିଆ ଭାବେ ଜୀବନଜୀବିକା ନିର୍ବାହ କରିଥାନ୍ତି। ପ୍ରତିଦିନ ଉକ୍ତ ରାସ୍ତାରେ ହଜାର ହଜାର ଲୋକ ଯିବାଆସିବା କରିଥାନ୍ତି ା ୪ କି.ମି. ଲମ୍ବ ବିଶିଷ୍ଟ ଏହି ରାସ୍ତା ଖାଲଖମାରେ ଭର୍ର୍ତ୍ତିି ହୋଇ ପୋଖରୀର ଭ୍ରମ ସୃଷ୍ଟି କରିଥାଏ। ସ୍କୁଲ ଓ କଲେଜ ଛାତ୍ରୀଛାତ୍ରମାନେ ପାଣିକାଦୁଅରେ ଯିବା ଆସିବା କରିଥାନ୍ତି। ବ୍ଲକ କାର୍ଯ୍ୟାଳୟଠାରୁ ମାତ୍ର ୫ କି.ମି. ଦୂର ହୋଇଥିବା ବେଳେ ଅଧିକାରୀମାନେ ଅଭିଯୋଗକୁ ଅଣଦେଖା କରୁଛନ୍ତି। ୫-ଟି ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ ହେଉଥିବା ବେଳେ ମରଣଯନ୍ତା ପାଲଟିଥିବା ଉକ୍ତ ରାସ୍ତାର ଉନ୍ନତୀକରଣ ପ୍ରତି ପ୍ରଶାସନ ବୈମାତୃକ ମନୋଭାବ ପୋଷଣ କରୁଛି ବୋଲି ଗ୍ରାମର ଯଶୋମତୀ ମହାନ୍ତ, ଗୁରୁବାରୀ ମୁର୍ମୁ, ମଙ୍ଗୁଲି ହଁାସଦା ପ୍ରମୁଖ କହିଛନ୍ତି।
ପଞ୍ଚାୟତ ପକ୍ଷରୁ ୨ ବର୍ଷରେ ଥରେ ମୋରମ ପକାଯାଇ ଟଙ୍କା ହରିଲୁଟ କରାଯାଉଥିବା ଗ୍ରାମବାସୀ ଅଭିଯୋଗ କରିଥିବା ବେଳେ ପକ୍କା ରାସ୍ତାର ପରିକଳ୍ପନା କରାଯାଇପାରୁ ନାହିଁ। ସେହିପରି ଆମ୍ବୁଲାନ୍ସ, ଦମକଳ, ଓ ଜନନୀ ଏକ୍ସପ୍ରେସ ଚଳପ୍ରଚଳ କରିବାରେ ଅନେକ ଅସୁବିଧା ହେଉଛି। ୨ ବର୍ଷ ଧରି ଜିଲାପାଳଙ୍କ ଜନଅଭିଯୋଗ ଶୁଣାଣି ଶିବିରରେ ବାରମ୍ବାର ଆବେଦନ କରିବା ପରେ ଜିଲାପାଳ କେବଳ ବିଡିଓଙ୍କୁ ନିର୍ଦ୍ଦେଶ ଦେଇ ଦାୟିତ୍ୱ ଶେଷ କରୁଛନ୍ତି ବୋଲି ସୁନାରାମ ହଁାସଦା, ଯଦୁନାଥ ହଁାସଦା ଏବଂ କାଳିଚରଣ ମାରାଣ୍ଡି ପ୍ରମୁଖ କହିଛନ୍ତି। ୨୦୨୨ ଡିସେମ୍ବର ୧୪ରେ ଗ୍ରାମ୍ୟ ଉନ୍ନୟନ ବିଭାଗକୁ ଚିଠି କରାଯାଇଥିଲେ ମଧ୍ୟ ଏଥିପ୍ରତି ଗୁରୁତ୍ୱ ଦିଆଯାଯାଉ ନାହିଁ। ବ୍ଲକ ପ୍ରଶାସନ କିମ୍ବା ଜନପ୍ରତିନିଧିମାନେ ଉକ୍ତ ରାସ୍ତା ପ୍ରତି ଧ୍ୟାନ ଦେଉ ନ ଥିବାରୁ ଗ୍ରାମବାସୀ ଭୋଟ ବର୍ଜନ କରିବେ ବୋଲି ଲିଖିତ ଭାବେ ଜିଲାପାଳଙ୍କୁ ଜଣାଇଛନ୍ତି। ଏ ସଂକ୍ରାନ୍ତରେ ଅଭିଯୋଗ ପାଇ ଜିଲାପାଳ ଦତ୍ତାତ୍ରେୟ ଭାଉସାହେବ ଶିିନ୍ଦେ ବିଡିଓଙ୍କୁ ତଦନ୍ତ ନର୍ଦ୍ଦେଶ ଦେଇଥିବା ସୂଚନା ମିଳଛି।
