ଦଶମନ୍ତପୁର, ୧୯।୧୧( ଡି.ଏନ୍.ଏ ): ଦେଶ ସ୍ବାଧୀନତାର ୭୫ବର୍ଷ ପରେ ମଧ୍ୟ ଏଭଳି ଅନେକ ଗ୍ରାମ ରହିଛି ଯେଉଁଠାରେ ପକ୍କାରାସ୍ତା ଗ୍ରାମବାସୀଙ୍କ ପାଇଁ ସ୍ବପ୍ନ। ପଞ୍ଚାୟତରୁ ଆରମ୍ଭ କରି ବ୍ଲକ, ଜିଲା ଏବଂ ରାଜ୍ୟ ପ୍ରଶାସନକୁ ରାସ୍ତା ଓ ଅନ୍ୟ ମୌଳିକ ସମସ୍ୟା ନେଇ ଜଣାଇଥିଲେ ମଧ୍ୟ କୌଣସି ସୁଫଳ ମିଳୁ ନାହିଁ। ଏହାର ଏକ ଉଦାହରଣ କୋରାପୁଟ ଜିଲା ଦଶମନ୍ତପୁର ବ୍ଲକ ଲୁଲ୍ଲା ପଞ୍ଚାୟତ ଅଧୀନରେ ଥିବା କେମିଲି ବେଡାପଦର ଗାଁରେ ଦେଖିବାକୁ ମିଳିଛି।
ତୋଟା ଆମ୍ବ ଛକରୁ ଗାଁର ଦୂରତା ୩ କି.ମି.। ଏଠାରେ ୪୪ ଘର ଆଦିବାସୀ ସମ୍ପ୍ରଦାୟର ଲୋକେ ବସବାସ କରିଥାନ୍ତି। ଏମାନଙ୍କ ମୁଖ୍ୟ ଜୀବିକା ହେଲା ପୋଡୁଚାଷ। ଏହି ଗାଁର ପୂର୍ବରେ ଧିପରାଣୀ ଡଙ୍ଗର, ପଶ୍ଚିମରେ କୁଟଣୀ ଗୋଡ଼ ଡଙ୍ଗର, ଉତ୍ତରରେ ଗାଦଲାବାଡ଼ି ଡଙ୍ଗର ଏବଂ ଦକ୍ଷିଣରେ କନ୍ଧଣୀମାଳି ଡଙ୍ଗର ରହିଛି। ପାହାଡ ପର୍ବତ ଘେରା ଗାଁ ହୋଇଥିବାରୁ ରୋଗୀ, ଗର୍ଭବତୀ ଓ ପ୍ରସୂତିଙ୍କୁ ଡାକ୍ତରଖାନା ନେବାକୁ ହେଲେ ଗାଁଠାରୁ ଅଧ କିମି ଦୂର ଆମ୍ବିଳୀ ଆମ୍ବ ଛକ ଯାଏ ସେମାନଙ୍କୁ ଭାରରେ ବୋହି ଆଣିବାକୁ ହୁଏ। ସେଠାରୁ ଆମ୍ବୁଲାନ୍ସ କିମ୍ବା ଗାଡ଼ି ଯୋଗେ ଦଶମନ୍ତପୁର ନହେଳେ କୋରାପୁଟ ଡାକ୍ତରଖାନାକୁ ନିଆଯାଏ ବୋଲି ଗାଁର ଅମି ସାଉନ୍ତା, ମୁତିଆ ସାଉନ୍ତା, ଟିକମ ସାଉନ୍ତା, ଘାସି ସାଉନ୍ତା, ଦୁର୍ଯ୍ୟ ସାଉନ୍ତା, ବାନ୍ଦ ସାଉନ୍ତା, ରତନ ସାଉନ୍ତା, ଧନେଶ୍ୱର ସାଉନ୍ତା, କେତୁ ସାଉନ୍ତା, କୃଷ ସାଉନ୍ତା, ଶାରୁ ସାଉନ୍ତା ପ୍ରମୁଖ ଗ୍ରାମବାସୀ କହିଛନ୍ତି। ରାସ୍ତା ଅବସ୍ଥା ଯୋଗୁ ଅନେକେ ରୋଗ ହେଲେ ମଧ୍ୟ ଡାକ୍ତରଖାନା ଯାଉ ନ ଥିବା ଗ୍ରାମବାସୀ କହିଛନ୍ତି। ଗାଁ ପାଇଁ ଖଣ୍ଡିଏ ରାସ୍ତା ପାଇବାକୁ ଚେଷ୍ଟା କରି ମଧ୍ୟ ବିପଳ ହୋଇଛୁ ବୋଲି ଗ୍ରାମବାସୀ କହିଛନ୍ତି। ତୋଟା ଆମ୍ବ ଛକରୁ ଗାଁ ଦେଇ ନନ୍ଦିଗାଁ ପଞ୍ଚାୟତ ଅଧୀନ “ଡି. ସୁଜୁଲି ଗାଁ ଛକ ଯାଏ ୧୦ କିମି ପକ୍କା ରାସ୍ତା ନିର୍ମାଣ ନେଇ ପଞ୍ଚାୟତରୁ ଆରମ୍ଭ କରି ବ୍ଲକ ପ୍ରଶାସନ, ଜିଳାପାଳଙ୍କ ଅଭିଯୋଗ ଶୁଣାଣୀ, ଡିଆର୍ଡିଏ ପିଡି ଏପରିକି ମୁଖ୍ୟମନ୍ତ୍ରୀଙ୍କୁ ମଧ୍ୟ ସ୍ପିଡ୍ ପୋଷ୍ଟ ଜରିଆରେ ସମସ୍ୟା ଜଣାଇଥିଲେ ମଧ୍ୟ ଏହାର ସମାଦାନ ହୋଇନାହିଁ ବୋଲି ପୂର୍ବତନ ସରପଞ୍ଚ ତଥା ବର୍ତ୍ତମାନ ଜୋନ୍-୨ ଜିଲା ପରିଷଦ ସଭ୍ୟ ଧନପତି ସାଉନ୍ତା ଅଭିଯୋଗ କରିଛନ୍ତି। ଗାଁରେ ୨ଟି ନଳକୂପ ରହିଛି। ବିଦ୍ୟାଳୟରେ ଥିବା ନଳକୂପଟି ଅଚଳ ହୋଇପଡ଼ିଛି। ଗାଁ ନଳକୂପରୁ ଅଳ୍ପ ପାଣି ବାହରୁଛି। ଗାଁ ଠାରୁ ୨୦୦ ମିଟର ଦୂର ଘୁଷୁରୀଗୁଡା ଚୁଆରୁ ଗ୍ରାମବାସୀ ଜଳ ସଂଗ୍ରହ କରୁଛନ୍ତି ସେ କହିଛନ୍ତି। ରାସ୍ତା ନିର୍ମାଣ ନ ହେଲେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ ବୋଲି ବେଡାପଦର ଗ୍ରାମବାସୀ ଚେତାବନୀ ଦେଇଛନ୍ତି।
