ନାଉଗାଁ,୨୩।୪(ସ୍ବ.ପ୍ର): ନାଉଗାଁ ବ୍ଲକର ଗଜରାଜପୁର ପଞ୍ଚାୟତ ଭାତପଡାଠାରୁ ଉପତ୍ତ୍ତି ହୋଇଛି ହାତୀଯୋର। ଏହି ଯୋରଟି ଭାତପଢ଼ା ଦେଇ ଅଲଣା ପଞ୍ଚାୟତର ନହଡିପଡ଼ା, ମୁଣ୍ଡାଳୋ, ବେଣାପଡ଼ା ଦେଇ ଜାମୁଗାଁ ପଞ୍ଚାୟତ ଛତିଆନାଠାରେ ବାଉଁଶ ଯୋରି ସହ ସଂଯୁକ୍ତ ହୋଇଛି। ପୂର୍ବରୁ ଏହି ଯୋର ଯୋଗୁ ସ୍ଥାନୀୟ ଚାଷୀ ବେଶ୍ ଉପକୃତ ହେଉଥିଲେ। ଯୋରରେ ଗଜରାଜପୁର, ଅଲଣା, ଘୋଡାଂଶ, ନୂଆଗାଁ ଓ ଜାମୁଗାଁ ପଞ୍ଚାୟତର ଚାଷଜମିରୁ ବର୍ଷା ଦିନେ ଉଦ୍ବୃତ୍ତ ଜଳ ନିଷ୍କାସିତ ହେବା ସହ ବର୍ଷା କମ୍ ସମୟରେ ଉକ୍ତ ପାଣିକୁ ବ୍ୟବହାର କରି ଚାଷ କାର୍ଯ୍ୟ କରାଯାଉଥିଲା। ବର୍ତ୍ତମାନ ଉକ୍ତ ଯୋର ଜବରଦଖଲ ଯୋଗୁ ସମସ୍ୟା ସୃଷ୍ଟି ହେଉଛି ବୋଲି ସ୍ଥାନୀୟ ବାସିନ୍ଦା ମତବ୍ୟକ୍ତ କରିଛନ୍ତି।
ଯୋରଟି ଜଳସେଚନ ବିଭାଗ ଅଧୀନରେ ରହିଥିବା ବେଳେ ଏହାର ଠିକ୍ ଭାବେ ରକ୍ଷଣାବେକ୍ଷଣ କରାଯାଉ ନ ଥିବାରୁ କାଳକ୍ରମେ ପୋତି ହୋଇଗଲାଣି। ସେହିପରି ଉକ୍ତ ବିଭାଗ ପକ୍ଷରୁ ଏହି ଯୋରର ବେଣାପଡା ନିକଟରେ ଦୀର୍ଘଦିନ ତଳେ ସାଇଫନ ନିର୍ମାଣ କରାଯାଇଥିଲା। ଫଳରେ ଉଦ୍ବୃତ୍ତ ବର୍ଷାଜଳ ନିଷ୍କାସିତ ହୋଇପାରୁନାହିଁ। ସେହିପରି ଓରଣ୍ଡ ନିକଟରେ ଜଣେ ବ୍ୟକ୍ତି ୧ ଏକର ଜମି କ୍ରୟ କରି ଫାର୍ମ ହାଉସ ନିର୍ମାଣ କରିଛନ୍ତି। ଉକ୍ତ ଫାର୍ମ ହାଉସ ପାଇଁ ମାଟି ପୋତିବା ବେଳେ ଯୋର ପୋତି ହେବା ସହ ପଥ ସଙ୍କୁଚିତ ହୋଇଯିବାରୁ ଜଳ ନିଷ୍କାସନ ହୋଇପାରୁନାହିଁ। ସେହିପରି ରାସ୍ତାଘାଟ ନିର୍ମାଣ ଯୋରର ଉଭୟପାର୍ଶ୍ୱରେ ଘର, ଛୋଟ ବଜାର ଆଦି ନିର୍ମାଣ ହେବା ଦ୍ୱାରା ଯୋରଟି ପୋତି ହୋଇଗଲାଣି। ଗାଁ ଗଣ୍ଡାର ଆବର୍ଜନା, ହାଟ ବଜାରରୁ ବିଭିନ୍ନ ଅନାବଶ୍ୟକ ପଦାର୍ଥକୁ ଯୋରରେ ପକାଯାଉଛି। କ଼ାଳକ୍ରମେ ଯୋର ପୋତି ହେବାରେ ଲାଗିଛି। ବର୍ଷାଦିନେ ଏହା ମାଧ୍ୟମରେ ପାଣି ନିଷ୍କାସନ ହୋଇପାରନାହିଁ। ଦୀର୍ଘଦିନ ଧରି ଏହା ମଧ୍ୟରେ ଦଳ ଭର୍ତ୍ତି ହୋଇ ରହିବା ଦ୍ୱାରା ମଶା ବଂଶ ବୃଦ୍ଧି ହେବା ସହ ବିଷଧର ସାପଙ୍କ ବାସ ସ୍ଥାନ ପାଲଟିଛି। ଯାହାକି ଗ୍ରାମବାସୀଙ୍କ ଦୁଃଖର କାରଣ ପାଲଟିଛି। ଏ ସମ୍ପର୍କରେ ଅଚ୍ୟୁତପୁରର ଭୋଳାନାଥ ଦାସ କୁହନ୍ତି, ଓରଣ୍ଡ ନିକଟରେ ଫାର୍ମ ହାଉସ ହେବା ଫଳରେ ଯୋରରୁ ପାଣି ନିଷ୍କାସନ ପଥ ସମ୍ପୂର୍ଣ୍ଣ ରୂପେ ବନ୍ଦ ହୋଇଯାଇଛି। ଜବରଦଖଲ ଯୋଗୁ ସ୍ଥାନୀୟ ଚାଷୀ ବିଭିନ୍ନ ଅସୁବିଧାରେ ସମ୍ମୁଖୀନ ହେଉଛନ୍ତି। ମନ୍ମଥ ଓଝା ସମିତିସଭ୍ୟ, ଅଲଣା ପଞ୍ଚାୟତ, ହାତୀଯୋରକୁ ପୁନରୁଦ୍ଧାର କରାଗଲେ ୫ ପଞ୍ଚାୟତର ଚାଷୀ ଉପକୃତ ହେବେ। ପ୍ରଶାସନ ଏଥିପ୍ରତି ଦୃଷ୍ଟି ଦେବା ଆବଶ୍ୟକ।
ବଂଶୀଧର ବେହେରା, ଅବସରପ୍ରାପ୍ତ ଶିକ୍ଷକ, ମୁଣ୍ଡାଳ କୁହନ୍ତି, ହାତୀଯୋର ପୋତି ହେବା ଦ୍ୱାରା ସ୍ଥାନୀୟ ଜନସାଧାରଣ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏହାର ପୁନରୁଦ୍ଧାର କରାଗଲେ ବିଶେଷ କରି ଚାଷୀମାନେ ଉପକୃତ ହୋଇପାରିବେ। ଜଳସେଚନ ବିଭାଗ ଯନ୍ତ୍ରୀ ସୂର୍ଯ୍ୟକାନ୍ତ ଦୀକ୍ଷିତଙ୍କୁ ପଚାରିବାରେ ଯୋରଟିର ପୁନରୁଦ୍ଧାର କରିବାର ଆବଶ୍ୟକତା ରହିଛି। କିନ୍ତୁ ଜବରଦଖଲ ଯୋଗୁ କିଛି କରି ହେଉନାହିଁ ବୋଲି ସେ କହିଛନ୍ତି।
