ପୁରୀ ଅଫିସ,୨୩।୪: ମହାପ୍ରଭୁ ଶ୍ରୀଜଗନ୍ନାଥଙ୍କ ସମ୍ପତ୍ତିକୁ ନିଜ ବ୍ୟକ୍ତିଗତ ସମ୍ପତ୍ତିରେ ପରିବର୍ତ୍ତିତ କରି ବିକ୍ରି କରାଯାଉଥିବା ଅଭିଯୋଗ ସାମ୍ନାକୁ ଆସିଛି। ଏ ନେଇ ପୁରୀ ଜିଲାପାଳ ଓ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ନିକଟରେ ଅଭିଯୋଗ ହୋଇଛି। ମହାପ୍ରଭୁଙ୍କ ପାଇକ ସେବା କାର୍ଯ୍ୟ ସମ୍ପାଦନ କରୁଥିବା ବ୍ୟକ୍ତିମାନେ ଏହି ଜମିରେ ଚାଷବାସ କରିବା ସହ ଭୋଗ ଦଖଲରେ ରହି ଆସିଛନ୍ତି। ତେବେ ସଂପୃକ୍ତ ପରିବାର ଜଣେ ଅଂଶୀଦାର ସମ୍ପତ୍ତିକୁ ନିଜ ନାମକୁ କରାଇ ବିକ୍ରି କରୁଥିବା ଅନ୍ୟତମ ଅଂଶୀଦାର ଚନ୍ଦ୍ରଶେଖର ଗୁରୁ ଅଭିଯୋଗ କରିଛନ୍ତି।
ଗୁୁରୁଙ୍କ କହିବା ଅନୁଯାୟୀ, ମୂଷା ନଈ ସଂପ୍ରସାରଣ ନେଇ ଚାଲିଥିବା ଉନ୍ନୟନ କାର୍ଯ୍ୟରେ ସମଙ୍ଗ ମୌଜାରେ ଥିବା ମହାପ୍ରଭୁଙ୍କର ଏହି ସମ୍ପତ୍ତି ଅଧିଗ୍ରହଣ ହେଉଛି। ଯାହାର ମୂଲ୍ୟ ୭କୋଟିରୁ ଊର୍ଦ୍ଧ୍ୱ ହେବ। ୧୯୨୭-୨୮ ବନ୍ଦୋବସ୍ତ ଅନୁସାରେ ଏହି ସମ୍ପତ୍ତି ଶ୍ରୀଜଗନ୍ନାଥ ମହାପ୍ରଭୁଙ୍କର ହୋଇଥିବାରୁ ମୂଷାନଦୀ ସମ୍ପ୍ରସାରଣରେ ଯାଉଥିବା ଜମିର ମୂଲ୍ୟ ମହାପ୍ରଭୁଙ୍କୁ ମିଳିବା ଉଚିତ୍। ମାତ୍ର ୨୦୧୪-୧୫ରେ ଏହା ପରିବର୍ତ୍ତିତ ହୋଇ ପରିବାରର ଅଂଶୀଦାରମାନଙ୍କ ନାମକୁ କରାଯାଇଛି। ସେହିଭଳି ସଂପୃକ୍ତ ଜମିକୁ ନେଇ ପୁରୀ ସିଭିଲ୍ ଜଜ୍ ଜୁନିୟର ଡିଭିଜନ ଓ ଚକବନ୍ଦୀ କମିଶନରଙ୍କ କୋର୍ଟରେ ମକଦ୍ଦମା ଚାଲିଥିଲେ ମଧ୍ୟ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଏଥିରେ ପକ୍ଷଭୁକ୍ତ କରାଯାଇ ନାହିଁ। ଜମି ମହାପ୍ରଭୁଙ୍କର ହୋଇଥିବାବେଳେ ସେ କିଭଳି ଭାବେ ଏକ ପକ୍ଷ ହେବାରୁ ବଞ୍ଚିତ ହେଲେ ତାହା ଆଶ୍ଚର୍ଯ୍ୟଜନକ କଥା ବୋଲି ଗୁରୁ କହିଛନ୍ତି। ସମଙ୍ଗ ମୌଜା ଅନ୍ତର୍ଗତ ଖାତା ନମ୍ବର ୧୧୨୭, ପ୍ଲଟ୍ ନମ୍ବର ୩୯୦୬କୁ ଅଧିଗ୍ରହଣ ପାଇଁ ରହିଥିବା ବେଳେ ଏହାର ମାଲିକାନା ରେକର୍ଡ ଯାଞ୍ଚ କରି ଜଣାଯାଇପାରିବ। ସଂପୃକ୍ତ ଜମିର ରେକର୍ଡ ସଂଶୋଧନ କରିବାକୁ ସେ ଦାବି କରିଛନ୍ତି। ଅନ୍ୟପକ୍ଷରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ମହାପ୍ରଭୁଙ୍କ ଜମିକୁ ବ୍ୟକ୍ତିଗତ ସମ୍ପତ୍ତିରେ ପରିବର୍ତ୍ତିତ କରି ଦିଆଯାଇଥିବା ନେଇ ଅଭିଯୋଗ ଆସିଛି। ଅଭିଯୋଗ ଏବେ ତଦନ୍ତ ପରିସରଭୁକ୍ତ। ତଦନ୍ତ ସରିବା ପରେ ହିଁ ଏ ନେଇ ସ୍ପଷ୍ଟ ଚିତ୍ର ମିଳିବ। ରେକର୍ଡ ଯାଞ୍ଚ କରାଯାଇ ଖୋଜାଯିବ ଯେ ବାସ୍ତବରେ ତାହା ମହାପ୍ରଭୁଙ୍କ ଜମି କି ନୁହେଁ ଏବଂ ଏହା କେବେ ବ୍ୟକ୍ତିଗତ ସମ୍ପତ୍ତିରେ ପରିବର୍ତ୍ତିତ ହୋଇଛି। ଅଭିଯୋଗରେ ସତ୍ୟତା ଥିଲେ ସଂପୃକ୍ତ ତହସିଲଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
