ନୂଆଦିଲ୍ଲୀ, ୧୧।୪:କେତେକ ନିର୍ଦ୍ଦିଷ୍ଟ ମାମଲାରେ ରାଜ୍ୟରେ ସିବିଆଇର ତଦନ୍ତ ଅଧିକାର ଏବେ ଦିନକୁ ଦିନ ସଙ୍କୁଚିତ ହେବାରେ ଲାଗିଛି। ଏକାଧିକ ରାଜ୍ୟ ସେମାନଙ୍କ ସାଧାରଣ ସହମତି ପ୍ରତ୍ୟାହାର କରିଦେଲେଣି। ନିକଟରେ ତେଲଙ୍ଗାନା, ମେଘାଳୟ ମଧ୍ୟ ଏହି ବିରୋଧ ତାଲିକାରେ ସାମିଲ ହୋଇଥିବା କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ ଗତ ଶୀତ ଅଧିବେଶନରେ ପାର୍ଲାମେଣ୍ଟରେ ଦେଇଥିବା ବିବୃତିରୁ ଜଣାପଡ଼ିଛି। ଦିଲ୍ଲୀ ସ୍ପେଶାଲ ପୋଲିସ ଏଷ୍ଟାବ୍ଲିଶ୍ମେଣ୍ଟ(ଡିଏସ୍ପିଏ) ଆଇନ-୧୯୪୬ର ଧାରା ୬ ଅନୁସାରେ ସିବିଆଇ କୌଣସି ରାଜ୍ୟରେ ତଦନ୍ତ କରିବାକୁ ଚାହୁଁଥିଲେ ସେହି ରାଜ୍ୟର ସହମତି ନେବା ଆବଶ୍ୟକ। ତେଣୁ କେତେକ ନିର୍ଦ୍ଦିଷ୍ଟ ମାମଲା ଏବଂ କିଛି ବର୍ଗର ଲୋକଙ୍କ ବିରୋଧରେ ସିବିଆଇ ତଦନ୍ତ ସିଧାସଳଖ କରିବାକୁ ରାଜ୍ୟଗୁଡ଼ିକ ପକ୍ଷରୁ ସାଧାରଣ ସହମତି ପ୍ରଦାନ ଦିଆଯାଇଥିଲା। ହେଲେ ଛତିଶଗଡ଼, ଝାଡ଼ଖଣ୍ଡ, କେରଳ, ମେଘାଳୟ, ମିଜୋରାମ୍, ପଞ୍ଜାବ, ରାଜସ୍ଥାନ, ତେଲଙ୍ଗାନା ଏବଂ ପଶ୍ଚିମବଙ୍ଗ ସିବିଆଇକୁ ତଦନ୍ତ
ପାଇଁ ପୂର୍ବରୁ ଦେଇଥିବା ସହମତିକୁ ପ୍ରତ୍ୟାହାର କରିନେଇଛନ୍ତି। ତେଣୁ ଉକ୍ତ ରାଜ୍ୟଗୁଡ଼ିକରେ ସିବିଆଇକୁ ତଦନ୍ତ କରିବାରେ ବାଧା ସୃଷ୍ଟି ହୋଇଥିବା ସିଂ ପ୍ରକାଶ କରିଥିଲେ।
ବିରୋଧୀ ନେତାମାନଙ୍କ ବିରୋଧରେ ସିବିଆଇକୁ ଜାଣିଶୁଣି ବ୍ୟବହାର କରାଯାଉଥିବା ଅଣଭାଜପା ଶାସିତ ରାଜ୍ୟଗୁଡ଼ିକ ଅଭିଯୋଗ କରିଆସୁଛନ୍ତି। ହେଲେ ସିବିଆଇ ତଦନ୍ତରେ ବାଧା ଦିଆଯିବା ଦ୍ୱାରା ତାହା ଜାତୀୟ ତଥା ଆନ୍ତଃରାଜ୍ୟ କାର୍ଯ୍ୟ ପରିସର ଉପରେ ପ୍ରଭାବ ପକାଇବ। ଏଭଳିସ୍ଥଳେ ଦେଖିବାର ଅଛି କିଭଳି ଭାବେ ସିବିଆଇ ଏହି ଆହ୍ବାନର ମୁକାବିଲା ଏବଂ ଦକ୍ଷତାର ସହ କର୍ତ୍ତବ୍ୟ ସମ୍ପାଦନ କରୁଛି। ତେଣୁ ବର୍ତ୍ତମାନ ପରିପ୍ରେକ୍ଷୀରେ ଡିଏସ୍ପିଏ ଆକ୍ଟ ଏବଂ ସିବିଆଇର ପରିସୀମା ଓ କ୍ଷମତା ସମ୍ପର୍କିତ ନିୟମର ସମୀକ୍ଷା କରାଯିବା ଜରୁରୀ ହୋଇପଡ଼ିଛି। ବିଭିନ୍ନ ରାଜ୍ୟଗୁଡ଼ିକ ସିବିଆଇ ତଦନ୍ତ ଅନୁମତି ପ୍ରତ୍ୟାହାର କରିବା ପ୍ରସଙ୍ଗରେ ଗତ ମାସରେ ପାର୍ଲାମେଣ୍ଟାରିି କମିଟି ମଧ୍ୟ ଏହା ଉପରେ ଗୁରୁତ୍ୱ ଦେବା ସହ ନୂଆ ନିୟମ ଆଣିବା ସପକ୍ଷରେ ମତ ଦେଇଛନ୍ତି, ଯେଉଁଥିରେ ସିବିଆଇର ସ୍ଥିତି, କାର୍ଯ୍ୟଧାରା ଏବଂ କ୍ଷମତା ସମ୍ପର୍କରେ ସବିଶେଷ ଉଲ୍ଳେଖ ରହିବା ଜରୁରୀ ବୋଲି ପ୍ରସ୍ତାବ ଦିଆଯାଇଛି। ଡିଏସ୍ପିଏ ଆଇନ ଅଧିକ କଟକଣା ରହିଥିବାରୁ ନୂଆ ଆଇନ ସପକ୍ଷରେ କମିଟି ମତ ଦେଇଛି। ସୁପ୍ରିମ୍ କୋର୍ଟ ଆଇନଜୀବୀ ରୁଦ୍ର ବିକ୍ରମ ସିଂଙ୍କ ମତରେ ରାଜ୍ୟଗୁଡ଼ିକ ସାଧାରଣ ସହମତିି(ଜେନେରାଲ୍ କନ୍ସେଣ୍ଟ) ପ୍ରତ୍ୟାହାର କରିଦେବା ମାନେ ନୁହେଁ ଯେ, ସିବିଆଇ ସେଠାରେ ତଦନ୍ତ କରିପାରିବ ନାହିଁ। ନିର୍ଦ୍ଦିଷ୍ଟ ମାମଲାର ତଦନ୍ତ ପାଇଁ ସମ୍ପୃକ୍ତ ରାଜ୍ୟ ସରକାରଙ୍କଠାରୁ ପୂର୍ବରୁ ସହମତି ନେବାକୁ ପଡ଼ିବ। ତେବେ ଯେଉଁ ରାଜ୍ୟଗୁଡ଼ିକ ସହମତି ପ୍ରତ୍ୟାହାର ଯେବେଠୁ କରିଛନ୍ତି, ତା’ ପୂର୍ବର ମାମଲାଗୁଡ଼ିକର ସିବିଆଇ ତଦନ୍ତ ଜାରି ରଖିପାରିବ ବୋଲି ସିଂ କହିଛନ୍ତି।
