ପାରାଦୀପ,୧୬ା୫(ଶରତ ରାଉତ)ପାରାଦୀପର ଏକମାତ୍ର ସରକାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବିଜୁ ମେମୋରିଆଲ ହସ୍ପିଟାଲର ଏବେ ବିଭିନ୍ନ କାରଣ ପାଇଁ ଚର୍ଚ୍ଚାରେ ରହୁଛି। କେତେବେଳେ ଡାକ୍ତର ନାହାନ୍ତି ତ ଆଉ କେଉଁ ସମୟରେ ରୋଗୀ ସେବା ବିପର୍ଯ୍ୟସ୍ତ ହେଉଥିବା ବୋଲି ଅଭିଯୋଗ ହେଉଛି। ଏହା ମଧ୍ୟରେ ସବୁଠାରୁ ବଡ଼ ବ୍ୟତିକ୍ରମ ଦୃଷ୍ଟିକୁ ଆସିଛି। ଯଥା ହସ୍ପିଟାଲର ଡାକ୍ତର ଓ ନର୍ସମାନଙ୍କ ରହିବାକୁ ଘର ନାହିଁ। ଯେଉଁଥିପାଇଁ ଅଧିକାଂଶ ଡାକ୍ତର ପୋଷ୍ଟିଂ ହେଲା ପରେ ବେଶୀ ଦିନ ଏଠାରେ ରହୁନାହାନ୍ତି। ଯାହାଦ୍ୱାରା ରୋଗୀ ସେବା ବାଧାପ୍ରାପ୍ତ ହେଉଛି। ଏହାକୁ ନେଇ ବେଳେବେଳେ ବିବାଦ ମଧ୍ୟ ହୋଇଛି। ଏବେ ବିଜୁ ମେମୋରିଆଲ ହସ୍ପିଟାଲରେ ଡାକ୍ତର ୯ଜଣ ଅଛନ୍ତି। ତାହା ବ୍ୟତିରେକ ନର୍ସ ଓ ପାରାମେଡିକାଲ ଷ୍ଟାଫ ସଂଖ୍ୟା ୨୦। ଏହି ୨୯ଜଣଙ୍କ ରହିବା ପାଇଁ କ୍ୱାର୍ଟର୍ସ ଅଛି ମାତ୍ର ୩ ଟି। ଏଥିରେ ସ୍ପେଶାଲିଷ୍ଟ ଡାକ୍ତର ୩ ଜଣ ଅଛନ୍ତି। ଅନ୍ୟମାନେ କେଉଁଠି ଭଡାଘରେ ତ କିଏ ଗାଁରୁ ଯିବା ଆସିବା କରୁଛନ୍ତି। ଏମିତି ରହିବା ଅସୁବିଧା ଯୋଗୁଁ ଅଧିକାଂଶ ସମୟରେ ଡାକ୍ତର ଓ ନର୍ସମାନେ ଛୁଟିରେ ରହୁଛନ୍ତି। ଫଳରେ ଜଣେ ଲେଖାଏ ଡାକ୍ତରଙ୍କୁ ବେଳେବେଳେ ୧୮ରୁ, ୨୪ ଘଣ୍ଟା ଡ୍ୟୁଟି କରିବାକୁ ପଡୁଛି।
ପାରାଦୀପର ଉକ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ୧୯୭୦ରୁ ଚାଲିଛି। ପ୍ରଥମେ ନୂଆବଜାର ସାଇ ମନ୍ଦିର ପାଖରେ ପୋର୍ଟ ଘରେ ଚାଲିଥିଲା। ୨୦୦୩ରେ ଅଠରବାଙ୍କି ଗୋଲେଇ ଛକ ପାଖରେ ରାଜ୍ୟ ସରକାର ସ୍ବତନ୍ତ୍ର ଭାବେ ନିଜସ୍ବ ମେଡ଼ିକାଲ ନିର୍ମାଣ କରିଥିଲେ। ସେଠାରେ ୭ ଏକର ଜାଗା ରହିଛି। ୩୦ ଶଯ୍ୟା ବିଶିଷ୍ଟ ଉକ୍ତ ହସ୍ପିଟାଲରେ ୧୨ ଜଣ ଡାକ୍ତର ରହୁଥିଲେ। ଦୁଇ ବର୍ଷ ମଧ୍ୟରେ ଡାକ୍ତର ସଂଖ୍ୟା ହ୍ରାସ ପାଇ ମାତ୍ର ଦୁଇଜଣ ଥିଲେ। ଏ ନେଇ ଗଣମାଧ୍ୟମରେ ଚର୍ଚ୍ଚା ହେବାରୁ ପର୍ଯ୍ୟାୟକ୍ରମେ ଡାକ୍ତର ପୋଷ୍ଟିଂ ହୋଇ ଏବେ ୯ ଜଣ ଅଛନ୍ତି। ରୋଗୀ କଲ୍ୟାଣ ସମିତି (ଆର୍କେଏସ)ଜରିଆରେ ଠିକା କର୍ମଚାରୀ ମଧ୍ୟ ଅଛନ୍ତି। ପ୍ରତିଦିନ ବର୍ହିଃ ବିଭାଗ ଡାକ୍ତରଙ୍କ ପାଖରେ ୪୦୦ ରୁ ୫୦୦ ରୋଗୀ ସଂଖ୍ୟା ପଞ୍ଜୀକୃତ ହେଉଛି। ଯେଉଁ ଡାକ୍ତର ୬ ମାସ ମଧ୍ୟରେ ପୋଷ୍ଟିଂ ପାଇଛନ୍ତି ସେମାନେ ରହିବା ସମସ୍ୟା ଯୋଗୁ ଅସନ୍ତୋଷ ପ୍ରକାଶ କରିଛନ୍ତି। ଘଟଣା ସମ୍ପର୍କରେ ବିଜୁ ମେମୋରିଆଲ ହସ୍ପିଟାଲ ମୁଖ୍ୟ ଚିକିତ୍ସା ଅଧିକାରୀ ଡା. ବସନ୍ତ ରାଉତଙ୍କୁ ପଚାରିବାରେ ମେଡ଼ିକାଲ ପରିସରରେ ପର୍ଯ୍ୟାପ୍ତ ଜାଗା ଅଛି। କ୍ୱାର୍ଟର୍ସ ନିର୍ମାଣ ପାଇଁ ଆରଆଣ୍ଡବି (ରାସ୍ତା ଓ କୋଠାବାଡି)ଯନ୍ତ୍ରୀ ଆସି ମାପଚୁପ କରି ଯାଇଥିଲେ। କିନ୍ତୁ ବଜେଟ ସାଙ୍କସନ ହୋଇ ନ ଥିବାରୁ ତାହା ଅଟକି ରହିଛି। ଜିଲା ମୁଖ୍ୟ ଚିକିତ୍ସାଧିକାରୀ ଶତ୍ରୁଘ୍ନ ଦାସଙ୍କୁ ପଚାରିଲେ ଏ ସମ୍ପର୍କରେ ସବିଶେଷ ବୁଝିବା ପରେ କହିବି ବୋଲି ସେ କହିଛନ୍ତି।
