ଯାଜପୁର ଅଫିସ/କବାଟବନ୍ଧ (ଡି.ଏନ.ଏ.), ୮।୬: ଲଘୁ ଖଣିଜ ସମ୍ପଦରେ ଭରପୁର ଯାଜପୁର ଜିଲା ଧର୍ମଶାଳା ତହସିଲ ଅଞ୍ଚଳରେ ରାଜ୍ୟ ସରକାରଙ୍କ ସ୍ବଚ୍ଛତା, ପ୍ରଯୁକ୍ତି ବିଦ୍ୟା, ସମୟାନୁବର୍ତ୍ତିତା, ସମ୍ମିଳିତ ଉଦ୍ୟମ ଓ ପରିବର୍ତ୍ତନ ଭଳି ୫-ଟି ଆଇନ କାମ କରୁନାହିଁ ା ଏଥିପାଇଁ ଡଙ୍କାରୀ, ଲୁଣିବର, କୁସୁନପୁର, ବାଘୁଆ, ରାହାଡପୁର, ଚାରଗୋଠ ଆଦି ପାହାଡ଼ରେ ୨୦ରୁ ଊର୍ଦ୍ଧ୍ୱ ସଇରାତରୁ ବେଆଇନ କଳାପଥର ଉତ୍ତୋଳନ ହେଉଛି। ଫଳରେ ରାଜ୍ୟ ସରକାର ବିପୁଳ ପରିମାଣର ରାଜସ୍ବ ହରାଉଛନ୍ତି ା ହେଲେ କେତେଜଣ ନ୍ୟସ୍ତସ୍ବାର୍ଥ ଗୋଷ୍ଠୀ ଏଥିରେ ମାଲାମାଲ ହେଉଥିବା ଚର୍ଚ୍ଚା ଜୋର ଧରିଛି।
ସୂଚନା ଅନୁଯାୟୀ , ବିଛାଖଣ୍ଡି, ଅଞ୍ଜିରା ଓ କୁସୁନପୁର ଜଙ୍ଗଲ କିସମ ମୌଜାର ୪୫୬.୩୪ ଏକର ଜମି କଳାପଥର ବ୍ୟବସାୟୀଙ୍କ କବ୍ଜାରେ ରହିଛି ା ପୂର୍ବରୁ ବଳଙ୍ଗ ରାଜସ୍ବ ନୀରିକ୍ଷକଙ୍କ ତଦନ୍ତ ରିପୋର୍ଟ ଆଧାରରେ ଏହା ସ୍ପଷ୍ଟ ହୋଇଛି। ଏହି ମର୍ମରେ ପରିବେଶ ଅସନ୍ତୁଳନ ଓ ଜଙ୍ଗଲ ନଷ୍ଟ ସଂକ୍ରାନ୍ତରେ ଧର୍ମଶାଳାର ତତ୍କାଳୀନ ତହସିଲଦାର ସରୋଜ କୁମାର ପଣ୍ଡା ତାଙ୍କ ପତ୍ରସଂଖ୍ୟା ୯୮୯/୨୮ା୩ା୨୦୧୯ ଓ ୪୬୧/୭ା୨ା୨୦୧୯ରେ କଟକ ଡିଭିଜନ ଡିଏଫ୍ଓଙ୍କୁ ଦୃଷ୍ଟି ଆକର୍ଷଣ କରିଥିଲେ। କିନ୍ତୁ କେତେଜଣ ରାଜନୈତିକ ବ୍ୟକ୍ତିଙ୍କ ହସ୍ତକ୍ଷେପରେ କଳାପଥର ବ୍ୟବସାୟୀଙ୍କ ସହ ମୂଲଚାଲ କରି ସମ୍ପୃକ୍ତ ଦାୟିତ୍ୱରେ ଥିବା ସରକାରୀ ଅଧିକାରୀ ଜଙ୍ଗଲ ଜମିକୁ ଟେକି ଦେଇଥିବାରୁ ବିଭିନ୍ନ ପ୍ରାକୃତିକ ସମ୍ପଦ, ଜୈବ ବିବିଧତା, ପଶୁପକ୍ଷୀ ଆଦି ବିପଦରେ ପଡିଛନ୍ତି ବୋଲି ଅଭିଯୋଗ ହେଉଛି। ଏହାପୂର୍ବରୁ ବଳରାମପୁର ଗ୍ରାମବାସୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ବିଛାଖଣ୍ଡି ଜଙ୍ଗଲ କିସମ ମୌଜାର ଖାତା ନମ୍ବର ୩୮୯ର ପ୍ଲଟ ନଂ.୧୮୪୮, ୧୮୫୬, ୧୮୬୧, ୧୮୭୬, ୧୮୭୨ ଓ ୧୮୭୧, ଅଞ୍ଜିରା ଜଙ୍ଗଲ କିସମ ମୌଜାର ଖାତା ନଂ. ୧୭୨୯ ପ୍ଲଟ ନଂ. ୧୪୭୭ ଏବଂ କୁସୁନପୁର ସଂରକ୍ଷିତ ଜଙ୍ଗଲ କିସମ ମୌଜାର ଖାତା ନଂ. ୬୩୧ ର ପ୍ଲଟ ନଂ. ୧୩୫୮, ୧୩୬୬, ୧୫୨୭ ଓ ୧୫୫୬ ର ୪୫୬.୩୪ ଏକର ଜମିରେ ବେଆଇନ କଳାପଥର ଉତ୍ତୋଳନ ଏବେ ବି ଜାରି ରହିଛି। ଏହାବାଦ୍ ବେଆଇନ ଖାଦାନ ସହ ଏକାଧିକ କ୍ରସର ମଧ୍ୟ ଜଙ୍ଗଲ ଜମିରେ ଚାଲିଛି ା ଏହାବାଦ୍ ଡଙ୍କାରୀ ପାହାଡ଼ର ୧ ସଇରାତ, ଲୁଣିବର ପାହାଡ଼ରେ ୩, ବାଘୁଆ ପାହାଡ଼ରେ ୨, ରାହାଡ଼ପୁର ପାହାଡ଼ରେ ୪ ଓ ଚାରଗୋଠ ପାହାଡ଼ରେ ୩ ଟି ଖାଦାନରେ ବେଆଇନ ଭାବେ ପଥର ଉତ୍ତୋଳନ ହେଉଥିବା ଅଞ୍ଚଳବାସୀଙ୍କ ସୂଚନା ଦେଇଛନ୍ତି। ଏନେଇ ଅଞ୍ଚଳବାସୀ ତହସିଲଦାରଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳି ପାରୁନାହିଁ। ବେଆଇନ ଖାଦାନ ମାଲିକଙ୍କ ସହ ଭିତିରିଆ ବୁଝାମଣା ଯୋଗୁ ଏହି ପରିସ୍ଥିତି ହୋଇଛି ବୋଲି ଅଭିଯୋଗ ହେଉଛି।
