ଯାଜପୁର,୧୫ା୧୦(ହର୍ଷବର୍ଦ୍ଧନ ବେହେରା)ଓଡ଼ିଶାରେ ୧୭ ପ୍ରକଳ୍ପ ସର୍ଭେ ପ୍ରକ୍ରିୟାରେ ଥିବା ଇଷ୍ଟକୋଷ୍ଟ ରେଲଓ୍ବେ ପକ୍ଷରୁ ସୂଚନା ଦିଆଯାଇଛି। ଏହା ବର୍ଷ ବର୍ଷ ସର୍ଭେରେ ହିଁ ଲଟକି ରହିଛି। ସର୍ଭେ ଶେଷ ହୋଇ ଚୂଡାନ୍ତ ରିପୋର୍ଟକୁ ଅନୁମୋଦନ ମିଳିବା ପରେ ଜମି ଅଧିଗ୍ରହଣ, ଜଙ୍ଗଲ ଜମି କିସମ ପରିବର୍ତ୍ତନ, କ୍ଷତିପୂରଣ ପ୍ରଦାନ ଆଦି ପ୍ରକ୍ରିୟା ରହିଛି। ତେବେ ପ୍ରାରମ୍ଭିକ ସର୍ଭେ ପ୍ରକ୍ରିୟା ସରୁ ନ ଥିବାରୁ ପ୍ରକଳ୍ପ କାର୍ଯ୍ୟ ଆରମ୍ଭ ହେବାରେ ଅନିଶ୍ଚିତତା ଦେଖାଦେଇଛି। ଗତ ୨୮ ବର୍ଷ ହେବ ଖୋର୍ଦ୍ଧାରୋଡ୍-ବଲାଙ୍ଗୀର ନୂତନ ରେଳପ୍ରକଳ୍ପ ପୂର୍ଣ୍ଣତା ଲାଭ କରି ପାରିନାହିଁ। ସେହିପରି ୭ଟି ନୂତନ ରେଳ ଲାଇନ ପ୍ରକଳ୍ପ ମଞ୍ଜୁର ଲାଭ କରି ନିର୍ମାଣ କାର୍ଯ୍ୟ ଚାଲିଛି ବୋଲି ରିପୋର୍ଟ ମିଳିଛି।
ଇଷ୍ଟକୋଷ୍ଟ ରେଲୱେ ପକ୍ଷରୁ ସୂଚନା ଅଧିକାର ଆଇନ(ଆରଟିଆଇ)ବଳରେ ୧୨ା୧୦ା୨୦୨୩ରେ ମିଳିଥିବା ତଥ୍ୟ ଆଧାରରେ ଯାଜପୁର-କେନ୍ଦୁଝର ରୋଡ୍ ଷ୍ଟେଶନଠାରୁ ଧାମରା ଭାୟା ଯାଜପୁର ଓ ଆରଡି ୯୬ କିମି ରେଳଲାଇନ କାର୍ଯ୍ୟ ସର୍ଭେରେ ସୀମିତ ରହିଛି। ଏଭଳି ତଥ୍ୟ ବିଗତ ଏକ ଦଶନ୍ଧି ହେଲା ମିଳିଆସୁଛି। ହେଲେ ସର୍ଭେ କାର୍ଯ୍ୟ ସରୁନି କି ଆଗକୁ କୌଣସି କାର୍ଯ୍ୟ ବଢ଼ୁନାହିଁ ବୋଲି ଚର୍ଚ୍ଚା ହେଉଛି। ୧୧ା୯ା୨୦୨୩ରେ ରେଳ ମନ୍ତ୍ରଣାଳୟ ପକ୍ଷରୁ ଏହି ପ୍ରସ୍ତାବିତ ନୂତନ ରେଳପଥର ଫାଇନାଲ ଲୋକେସନ ସର୍ଭେ(ଏଫଏଲ୍ଏସ୍) ପାଇଁ ୨ କୋଟି ୪୦ ଲକ୍ଷ ଟଙ୍କା ମଞ୍ଜୁର ହୋଇଛି। ହେଲେ ଏଯାଏ ପରବର୍ତ୍ତୀ ପଦକ୍ଷେପ ଗ୍ରହଣ ହୋଇ ନ ଥିବା ସୂଚନା ମିଳିଛି। ସର୍ଭେରେ ସୀମିତ ଅନ୍ୟ ରେଳପ୍ରକଳ୍ପଗୁଡିକ ହେଲା ଜୁନାଗଡ-ନବରଙ୍ଗପୁର ୧୧୮ କିମି, ମାଲକାନଗିରି-ଭଦ୍ରଚଲମ୍ ୧୨୫ କିମି, ଶାଶୁବୋହୂମାଲି-ସିଜୁମାଲି-କୁତ୍ରୁମାଲି ବକ୍ସାଇଟ ମାଇନ୍ସଠାରୁ ଟିକିରି ରେଳଷ୍ଟେଶନ ୫୮ କିମି, ନାଉପଦା-ଗୁଣୁପୁରଠାରୁ ଥେରୁବାଲି ୭୯ କିମି, ତାଲଚେର-ଗୋପାଳପୁର ୨୮୨ କିମି, ବଲାଙ୍ଗୀର-ନୂଆପଡ଼ା ରୋଡ୍ ଭାୟା ପାଟଣାଗଡ ୧୦୦ କିମି, ପୁରୀ-କୋଣାର୍କ ୩୩ କିମି, ଦୈତାରୀ ଷ୍ଟେଶନଠାରୁ ବାଲିପର୍ବତ ଆଇରନ ଓର ମାଇନ୍ସ ୮ କିମି, ନୟାଗଡ଼ ଷ୍ଟେଶନଠାରୁ ଦୁବୁଣା ଆଇରନ ଓର ମାଇନ୍ସ ୫ କିମି, ରାୟପୁର-ସମ୍ବଲପୁର ୨୭୦ କିମି, ବରଗଡ଼ ରୋଡ୍-ନୂଆପଡ଼ା ରୋଡ୍ ୧୪୨ କିମି, ବାରକୋଟ-ଝାରସୁଗୁଡା ୧୬୦ କିମି, ଜଗନ୍ନାଥପୁର-ରେଢ଼ାଖୋଲ ୨୪୦ କିମି, ରଜଥଗଡ଼ଠାରୁ କାଇପଦର ରୋଡ୍ ୭୦ କିମି, ତେନ୍ତୁଲୋଇ-ବୁଢାପଙ୍କ ୧୦୬ କିମି ଏବଂ ଏମ୍ସିଆର୍ଏଲ୍ ଇନର କରିଡର ଫେଜ-୨୫୪ କିମି ରହିଛି। ଅନ୍ୟପକ୍ଷେ ଖୋର୍ଦ୍ଧାରୋଡ-ବଲାଙ୍ଗୀର ୩୦୧ କିମି, ତାଲଚେର-ବିମଳଗଡ ୧୪୯ କିମି, ଜୟପୁର-ମାଲକାନଗିରି ୧୨୬ କିମି, ଜୟପୁର-ନବରଙ୍ଗପୁର ୫୦ କିମି, କୋଡିଙ୍ଗମାଲି ବକ୍ସାଇଟ ମାଇନ୍ସଠାରୁ ସିଙ୍ଗରାମ ଷ୍ଟେଶନ ୯.୪ କିମି, ତାଲଚେର-ଅନୁଗୋଳ ୧୬.୫୦ କିମି ଓ ଗନ୍ଧମାର୍ଦ୍ଧନ ଆଇରନ ଓର ମାଇନ୍ସଠାରୁ ଗୋଲଡିହ ରେଳଷ୍ଟେଶନ ୧୨ କିମି ଆଦି ରେଳପ୍ରକଳ୍ପ ମଞ୍ଜୁର ହୋଇ ନିର୍ମାଣ କାର୍ଯ୍ୟ ଚାଲିଛି। ଏହି ୭ଟି ପ୍ରକଳ୍ପର ଅଗ୍ରଗତି ଜଙ୍ଗଲ ଜମିକୁ ଅଣଜଙ୍ଗଲ ଜମିରେ ପରିବର୍ତ୍ତନ, ଗଛ ସଂଖ୍ୟା ନିରୂପଣ, ଗଛ କଟା ବାବଦ କ୍ଷତିପୂରଣ, ଏଫ୍ଆର୍ଏ (ଫରେଷ୍ଟ ରାଇଟ ଆକ୍ଟ) ସାର୍ଟିଫିକେଟ, ବନ୍ୟଜନ୍ତୁ ଇତ୍ୟାଦି ବିବାଦ ଯୋଗୁ ନୈରାଶ୍ୟଜନକ ରହିଛି। ୧୦ରୁ ଉର୍ଦ୍ଧ୍ୱ ବର୍ଷ ହେଲା କେତେକ ପ୍ରକଳ୍ପର ଜଙ୍ଗଲ ଜମି ବିବାଦର ସମାଧାନ ହୋଇପାରି ନ ଥିବା ସୂଚନା ମିଳିଛି। ବିଭାଗସ୍ତରରେ ନିୟମିତ ଭାବେ ପ୍ରକଳ୍ପଗୁଡ଼ିକର ସମୀକ୍ଷା କରାଯାଉଥିଲେ ହେଁ ବିଭିନ୍ନ କାରଣରୁ ଲୋକଙ୍କ ପାଇଁ ଉଦ୍ଦିଷ୍ଟ ରେଳ ପ୍ରକଳ୍ପ ସ୍ବପ୍ନ ଅଧୁରା ରହିଥିବା ମତପ୍ରକାଶ ପାଇଛି। ପ୍ଲାନିଂ ଷ୍ଟେଜ୍ରେ ଥିବା ୧୭ରୁ ୪ଟି ପ୍ରକଳ୍ପର ଅଟକଳ ପରିମାଣ ଚୂଡ଼ାନ୍ତ ହୋଇଛି। ଏଥିରେ ଜୁନାଗଡ଼-ନବରଙ୍ଗପୁର ପ୍ରକଳ୍ପ ପାଇଁ ୨୮୬୪.୫୦ କୋଟି, ମାଲକାନଗିରି-ଭଦ୍ରଚଲମ ପ୍ରକଳ୍ପ ପାଇଁ ୩୫୯୧.୭୬ କୋଟି, ଶାଶୁବୋହୂମାଲି-ସିଜୁମାଲି-କୁତ୍ରୁମାଲି ପ୍ରକଳ୍ପ ପାଇଁ ୧୩୧୫.୧୬ କୋଟି ଏବଂ ନଉପଦା-ଗୁଣୁପୁର ପ୍ରକଳ୍ପ ପାଇଁ ୧୩୯୭.୩୬ କୋଟି ଟଙ୍କା ବ୍ୟୟ ଅଟକଳ ହୋଇଥିବା ଆର୍ଟିଆଇରେ ସୂଚନା ଦିଆଯାଇଛି।
