୧୧୪ ଆଟେଣ୍ଡାଣ୍ଟ, ୩୬ ପ୍ରାଣୀଧନ ନିରୀକ୍ଷକ ପଦବୀ ଖାଲି
9:19 amDecember 16, 2020December 16, 2020 / 43

କଟକ ଅଫିସ,୧୬ା୧୨: କଟକ ଜିଲାର ମୋଟ ୨୧୧ଟି ପ୍ରାଣୀଧନ ସହାୟକ କେନ୍ଦ୍ର ରହିଛି। ହେଲେ ପ୍ରାଣୀଧନ ନିରୀକ୍ଷକ, ଡାକ୍ତର, ଆଟେଣ୍ଡାଣ୍ଟ ପଦବୀ ଖାଲି ପଡିଥିବାରୁ ପ୍ରାଣୀ ଚିକିତ୍ସା ବାଧାପ୍ରାପ୍ତ ହେଉଛି। ଏଥିସହ ରାଜ୍ୟ ସରକାରଙ୍କ ବିଭିନ୍ନ ଯୋଜନାର ସଫଳ ରୂପାୟନ ହୋଇପାରୁନାହିଁ। ବିଭାଗୀୟ ସୂଚନା ଅନୁଯାୟୀ, ଜିଲାର ପ୍ରାୟ ୧୧୪ଟି କେନ୍ଦ୍ରରେ ଆଟେଣ୍ଡାଣ୍ଟ ପଦବୀ ଖାଲିପଡିଛି। ଗ୍ରାମାଞ୍ଚଳରେ ପ୍ରାଣୀ ଚିକିତ୍ସା ଓ କ୍ଷେତ୍ର ସର୍ବେକ୍ଷଣ ଭଳି ସମସ୍ତ କାର୍ଯ୍ୟରେ ଏହି ଚତୁର୍ଥ ଶ୍ରେଣୀ କର୍ମଚାରୀମାନଙ୍କ ଭୂମିକା ବେଶ୍‌ ଗୁରୁତ୍ୱ ବହନ କରିଥାଏ ା ସରକାର ଟିକାକରଣ ଅଭିଯାନକୁ ଗୁରୁତ୍ୱ ଦେଉଥିଲେ ମଧ୍ୟ ଏହି କର୍ମଚାରୀଙ୍କ ଅଭାବ ଯୋଜନାର ସଫଳତାକୁ ପ୍ରଭାବିତ କରିଛି ା ହେଲେ ଏତେ ମାତ୍ରାରେ ପଦବୀ ଖାଲି ପଡିଥିବାରୁ ବିଭିନ୍ନ କାର୍ଯ୍ୟ ବାଧାପ୍ରାପ୍ତ ହେଉଛି। ସେହିପରି ୯୬ଟି ପ୍ରାଣୀଧନ ନିରୀକ୍ଷକ ପଦବୀ ମଧ୍ୟରୁ ୩୬ଟି ପଦବୀ ଖାଲି ପଡିଛି। ଏହାବ୍ୟତୀତ ଜିଲାରେ ୫୯ ଡାକ୍ତର ପଦବୀ ଅନୁମୋଦନ ଥିବାସ୍ଥଳେ ୧୫ଟି ସ୍ଥାନରେ ଡାକ୍ତର ନାହାନ୍ତି ା ମୁଖ୍ୟତଃ ବାଙ୍କୀ ଉପଖଣ୍ଡରେ ଏସ୍‌ଡିଭିଓ ପଦବୀ ଖାଲି ପଡିଥିବାରୁ ଗୋ-ପାଳକମାନଙ୍କ ନଥିପତ୍ର କାମ ଦୀର୍ଘଦିନ ଧରି ପଡିରହିଛି। କମ୍‌ କର୍ମଚାରୀରେ ଜିଲାରେ ସମସ୍ତ ଯୋଜନା ପାଇଁ ଟାର୍ଗେଟ ଅଧିକ ଦିଆଯାଇଛି। ଫଳରେ ଟାର୍ଗେଟ୍‌ ପୂରଣ କରି ନ ପାରି ଅନେକ କର୍ମଚାରୀ ମାନସିକ ଚାପରେ ରହୁଛନ୍ତି ା କଟକ ଜିଲାରେ ପ୍ରାୟ ୨୦ହଜାର ପ୍ରବାସୀଙ୍କ ପାଇଁ ମତ୍ସ୍ୟଚାଷ, ଗୋପାଳନ ଓ କୁକୁଡା ଚାଷ ଲାଗି ଯୋଜନା ରଖାଯାଇଛି। କିନ୍ତୁ ମାନବ ସମ୍ବଳର ଅଭାବ ଯୋଗୁ ଉପରୋକ୍ତ ଯୋଜନା ସଫଳ ହେବା ନେଇ ଆଶଙ୍କା ପ୍ରକାଶ ପାଇଛି। ଏ ସମ୍ପର୍କରେ ଜିଲା ପ୍ରାଣୀଧନ ଅଧିକାରୀ ଡା. କେଶବ ଚନ୍ଦ୍ର ପ୍ରଧାନଙ୍କୁ ପଚାରିବାରୁ ସେ କହିଥିଲେ, ସରକାରଙ୍କ ପକ୍ଷରୁ କରୋନା ପାଇଁ କଟକଣା ରହିଛି। ତଥାପି ଖାଲି ପଦବୀଗୁଡିକ ପୂରଣ ପାଇଁ ପ୍ରକ୍ରିୟା ଚାଲିଛି ା