ପାଟଣା,୮।୬(ସ୍ବ.ପ୍ର.): କେନ୍ଦୁଝର ଜିଲା ପାଟଣା ମୁଖ୍ୟାଳୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସମସ୍ତ ବିଶେଷଜ୍ଞ ଡାକ୍ତର ପଦବୀ ଖାଲିପଡିଥିବା ବେଳେ ମଙ୍ଗଳବାର ଜଣେ ଯୁବ ଏମ୍ବିବିଏସ୍ ଡାକ୍ତର କାର୍ଯ୍ୟରେ ଯୋଗ ଦେଇଛନ୍ତି। ଯୁବ ଡାକ୍ତର ଜଣକ ହେଉଛନ୍ତି ପାଟଣା ବ୍ଲକ ତୁରୁମୁଙ୍ଗା ଗ୍ରାମର ହିମାଂଶୁ ଶେଖର ମହାନ୍ତ। ସେ ଚୁକ୍ତିଭିତ୍ତିକ ନିଯୁକ୍ତି ପାଇଥିବା ବେଳେ ତାଙ୍କ ପାଇଁ ଡାକ୍ତର କ୍ୱାର୍ଟର ନ ଥିବାରୁ ସେ ମୁଖ୍ୟାଳୟରେ ରହି ରୋଗୀ ସେବା ଯୋଗାଇଦେବେ। ଅନ୍ୟ ପକ୍ଷରେ ଡିଏମ୍ଏଫ୍ ଫଣ୍ଡରୁ ନିଯୁକ୍ତ ଜଣେ ଡାକ୍ତର ହେଡକ୍ୱାର୍ଟରରେ ନ ରହି କ୍ୱାର୍ଟରରେ ଚାବି ମାରି ଘର ମାଡି ବସିଥିବା ଅଭିଯୋଗ ହୋଇଛି। ପାଟଣା ସ୍ବାସ୍ଥ୍ୟ କେନ୍ଦ୍ରରେ ୨ ଜଣ ରେଗୁଲାର ଡାକ୍ତର ଥିବା ବେଳେ ଡ.ହିମାଂଶୁ ଚୁକ୍ତିଭିତ୍ତିକ ଭାବେ ପୋଷ୍ଟିଂ ହୋଇଛନ୍ତି।
