ମହିଳାଙ୍କ ବେକ କାଟି ହତ୍ୟା ଘଟଣା: ମୁଣ୍ଡ ଖୋଜୁଛି ପୋଲିସ

ଭୁବନେଶ୍ୱର,୫।୨ (ବ୍ୟୁରୋ): ଚନ୍ଦକା ଥାନା ଅନ୍ତର୍ଗତ ଅନ୍ଧାରୁଆ ଦାସପୁର ରାସ୍ତା ପାର୍ଶ୍ୱରୁ ଗୁରୁବାର ସକାଳେ ମିଳିଥିବା ଜଣେ ମହିଳାଙ୍କ ମୁଣ୍ଡବିହୀନ ମୃତଦେହକୁ ନେଇ କମିଶନରେଟ ପୋଲିସର ନିଦ ହଜିଛି। ରମାଦେବୀ ଛାତ୍ରୀ ଝରାଫୁଲ ନାୟକଙ୍କ ମୃତ୍ୟୁ ରହସ୍ୟ ୧୦ଦିନ ପରେ ବି ଖୋଲି ନ ଥିବାବେଳେ ଆଉ ଏକ ଘଟଣା ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ପ୍ରମାଣ ନଷ୍ଟ ପାଇଁ ଅପରାଧୀମାନେ ମହିଳାଙ୍କ ମୁଣ୍ଡକୁ ନେଇଯାଇଥିବାରୁ ପୋଲିସ ଅଡୁଆ ସୂତାରେ ଛନ୍ଦି ହୋଇପଡିଛି। ଅଭିଯୁକ୍ତଙ୍କ ପାଖରେ ପହଞ୍ଚତ୍ବାକୁ ହେଲେ ମହିଳାଙ୍କ ପରିଚୟ ନିହାତି ଜରୁରୀ। ତେବେ ମୁଣ୍ଡ ନ ମିଳିଲେ ପରିଚୟ ମିଳିବା ବି କଷ୍ଟକର ହୋଇପଡିବ। ତେଣୁ ପୋଲିସ ଘଟଣାସ୍ଥଳର ପାଖାପାଖି ୨ କିଲୋମିଟର ଜଙ୍ଗଲିଆ ଅଞ୍ଚଳ ଭିତରେ ପଶି ଖୋଜାଖୋଜି କରି ନିରାଶ ହୋଇଛି। ସନ୍ଧାନୀ କୁକୁର ଲଗାଇଥିଲେ ମଧ୍ୟ ମୁଣ୍ଡ ମିଳିପାରିନି। ଏପରିସ୍ଥଳେ ଝରାଫୁଲ ଭଳି ଏହି ହତ୍ୟା ମାମଲା ମଧ୍ୟ ରହସ୍ୟ ହୋଇଯିବ ବୋଲି ଆଶଙ୍କା ବଢ଼ିବାରେ ଲାଗିଛି।

ପ୍ରି ପ୍ଲାନ୍‌ ହତ୍ୟା, ଏକାଧିକଙ୍କ ସମ୍ପୃକ୍ତି ସନ୍ଦେହ
ପୂର୍ବ ଯୋଜନା ମୁତାବକ ମହିଳାଙ୍କୁ ହତ୍ୟା କରାଯାଇଥିବା ଓ ଏକାଧିକ ଅଭିଯୁକ୍ତଙ୍କ ସମ୍ପୃକ୍ତି ଥିବା ପୋଲିସ ସନ୍ଦେହ କରୁଛି। ଏମିତିକି ଅପରାଧୀମାନେ ପ୍ରମାଣ ଲୁଚାଇବା ସହ ପୋଲିସର ତଦନ୍ତକୁ ବାଟବଣା କରିବାକୁ ପୂରା ଯୋଜନା କରିଛନ୍ତି। ହାତରେ ଗ୍ଲୋଭ୍‌ସ ପିନ୍ଧି ହତ୍ୟା କରିଛନ୍ତି। ପାରିପାର୍ଶ୍ୱିକ ସ୍ଥିତିରୁ ମହିଳାଙ୍କୁ ଅନ୍ୟ ସ୍ଥାନରେ ହତ୍ୟା କରାଯାଇ କାରରେ ଆଣି ଏଠାରେ ଫିଙ୍ଗି ଦେଇଥିବା ଜଣାପଡୁଛି। ହତ୍ୟାକାରୀମାନେ ମୃତଦେହ ପାଖ ବୁଦାରେ ନୂଆ ଛୁରି ଓ ରକ୍ତ ଲଗା ଗ୍ଲୋଭ୍‌ସ ପକାଇ ଦେଇଛନ୍ତି। ଉକ୍ତ ଛୁରିରେ ହତ୍ୟାକଲା ଭଳି ରକ୍ତ ଲାଗି ନ ଥିବାରୁ ହତ୍ୟାରେ ଅନ୍ୟ ଏକ ଛୁରି କିମ୍ବା ଧାରୁଆ ଅସ୍ତ୍ର ବ୍ୟବହାର କରାଯାଇଥିବା ଓ ମିଳିଥିବା ଛୁରିକୁ ଅନ୍ୟ କେହି ଧରିଥିବାରୁ ଏଥିରେ ଏକାଧିକ ଲୋକଙ୍କ ସମ୍ପୃକ୍ତି ଥିବା ଅନୁମାନ କରାଯାଉଛି। ବେକର ସ୍ଥିତିକୁ ଦେଖିଲେ ଫାର୍ସା କିମ୍ବା ଚାପଡ ଭଳି ଅସ୍ତ୍ରରେ କଟାଯାଇଥିବା ବାରିହୋଇପଡୁଛି। ତେଣୁ ଏସବୁ ଦିଗ ଉପରେ ପୋଲିସର ତଦନ୍ତ ଆଗକୁ ବଢ଼ିଛି।
ଜଗତ୍‌ସିଂହପୁରରୁ ଆସିଲା ସନ୍ଧାନୀ କୁକୁର
ଭୁବନେଶ୍ୱର ପୋଲିସ ପାଖରେ ତାଲିମପ୍ରାପ୍ତ ସନ୍ଧାନୀ କୁକୁର ନ ଥିବାରୁ ତଦନ୍ତ ଅଟକି ରହିଥିଲା। ପରେ ଜୋନ୍‌-୬ ଏସିପି ପ୍ରକାଶ ଚନ୍ଦ୍ର ପାଲ ଜଗତ୍‌ସିଂପୁରରୁ ସନ୍ଧାନୀ କୁକୁର ମଗାଇଥିଲେ। ସାଇଣ୍ଟିଫିକ୍‌ ଟିମ୍‌ ପହଞ୍ଚତ୍ ଯାଞ୍ଚ କରିବା ସହ ପୋଲିସର ପ୍ରାଥମିକ ତଦନ୍ତ ସରିଥିଲେ ମଧ୍ୟ ମୃତଦେହ ସେମିତି ୪ ଘଣ୍ଟା ଧରି ପଡ଼ି ରହିଥିଲା। ଜଗତ୍‌ସିଂପୁରରୁ ସନ୍ଧାନୀ କୁକୁର ଆସିବା ପରେ ପୋଲିସ ଆଖପାଖ ଅଞ୍ଚଳରେ ଛାନ୍‌ଭିନ୍‌ କରିଥିଲା। ଅନ୍ୟପକ୍ଷେ କ୍ରାଇମବ୍ରାଞ୍ଚ ପାଖରେ ମଧ୍ୟ ମୃତଦେହ ଶୁଙ୍ଘି ଅଭିଯୁକ୍ତଙ୍କୁ ଠାବ କରିବା ପାଇଁ ସେପରି ସ୍ବତନ୍ତ୍ର ତାଲିମପ୍ରାପ୍ତ କୁକୁର ନ ଥିବା ଜଣେ ପୋଲିସ ଅଧିକାରୀ କହିଛନ୍ତି।
ଡିଏନ୍‌ଏ ପରୀକ୍ଷା ପାଇଁ ଗଲା ନମୁନା
ଫରେନ୍‌ସିକ ଟିମ୍‌ ମୃତଦେହ ସହ ଘଟଣା ସ୍ଥଳରୁ କିଛି ନମୁନା ସଂଗ୍ରହ କରିଛି। ମହିଳାଙ୍କ ମୁଣ୍ଡ ନ ଥିବାରୁ ଡିଏନ୍‌ଏ ପରୀକ୍ଷା ପାଇଁ ତାଙ୍କ ଚୁଟି ମିଳିପାରିନାହିଁ। ତେଣୁ ଡିଏନ୍‌ରେ ଟେଷ୍ଟପାଇଁ ରକ୍ତ ଓ ହାଡ ସଂଗ୍ରହ କରାଯାଇଛି। ଏଥିସହିତ ତାଙ୍କୁ ବଳାତ୍କାର କରାଯାଇଛି କି ନାହିଁ ଜାଣିବା ଲାଗି ଗୁପ୍ତାଙ୍ଗ ଓ ପୋଷାକରୁ କିଛି ନମୁନା ମଧ୍ୟ ନିଆଯାଇଛି।
ବାୟୋଟେକ୍‌ ପାକର୍ର୍ ପରିସରକୁ ପଶିଲା ସନ୍ଧାନୀ କୁକୁର
ମୃତଦେହ ନିକଟରୁ ମିଳିଥିବା ରକ୍ତଭିଜା ଗ୍ଲୋଭସ୍‌ ଓ ଛୁରିକୁ ଶୁଙ୍ଘିବାପରେ ସନ୍ଧାନୀ କୁକୁର ସେଠାରୁ ସିଧା ୫୦୦ ମିଟର ଦୂରରେ ଥିବା ଓଡିଶା ବାୟୋଟେକ୍‌ ପାର୍କ ଆଡକୁ ମୁହାଁଇଥିଲା। ଏହା ପାର୍ଶ୍ୱକୁ ଲାଗି ଜଙ୍ଗଲିଆ ସ୍ଥାନ ରହିଛି। ଉକ୍ତ ପାର୍ଶ୍ୱରେ ଦୀର୍ଘଦିନ ହେବ ପାଚେରି ଭାଙ୍ଗି ଯାଇଥିବାବେଳେ ସନ୍ଧାନୀ କୁକୁର ଶୁଙ୍ଘି ଶୁଙ୍ଘି ସେହି ବାଟଦେଇ ଭିତରକୁ ପଶିଥିଲା। ପାଣି ଟାଙ୍କି ଥିବା ଓ ସିକ୍ୟୁରିଟି ଗାର୍ଡ ରହୁଥିବା ଏକ ଘରପାଖରେ ଘୁରିବୁଲିଥିଲା। ତେବେ ହତ୍ୟାକାରୀ ଏହି ସ୍ଥାନକୁ ଆସି ପାଖରେ ଥିବା ପାଣି ଟାଙ୍କିର ଟ୍ୟାପ୍‌ ଖୋଲି ଧୋଇହୋଇଥିବା ଅନୁମାନ କରାଯାଉଛି। ଅନ୍ୟପକ୍ଷେ ବାୟୋଟେକ୍‌ ପାର୍କର ଚାରିଆଡେ ସିସିଟିଭି କ୍ୟାମେରା ଲଗାଯାଇଥିଲେ ମଧ୍ୟ ଉକ୍ତ ପାର୍ଶ୍ୱରେ ନ ଥିଲା। ତେଣୁ ହତ୍ୟାକରୀମାନେ ପୂର୍ବରୁ ଏହି ସ୍ଥାନ ସହ ପରିଚିତ ଥିବା କିମ୍ବା ମୃତଦେହ ଫିଙ୍ଗିବା ପାଇଁ ଉକ୍ତ ସ୍ଥାନକୁ ବାଛି ପ୍ରମାଣ ନଷ୍ଟ ପାଇଁ ସବୁ ଯୋଜନା କରିଥିବା ପୋଲିସର ସନ୍ଦେହକୁ ଆହୁରି ଦୃଢ଼ୀଭୂତ କରିଛି।

ଟାଟୁ, ଫିଙ୍ଗର ଫ୍ରିଣ୍ଟରୁ ପରିଚୟ ଖୋଜୁଛି ପୋଲିସ

ତଦନ୍ତରେ ଅଗ୍ରଗତି ପାଇଁ ମହିଳାଙ୍କ ପରିଚୟ ପୋଲିସ ପାଇଁ ବଡ଼ ମାଧ୍ୟମ। ତେଣୁ ପୋଲିସ ସ୍ଥାନୀୟ ଅଞ୍ଚଳରେ ପଚରାଉଚରା କରୁଥିବାବେଳେ ଏଯାଏ ଆଖପାଖ ଥାନାରେ କୌଣସି ମହିଳାଙ୍କ ନିଖୋଜ ଅଭିଯୋଗ ହୋଇନାହିଁ। ଏପରିସ୍ଥଳେ ମୃତା ମହିଳାଙ୍କ ଡାହାଣ ହାତ କହୁଣିରେ ଥିବା ଏକ ଟାଟୁ ଓ ଫିଙ୍ଗର ପ୍ରିଣ୍ଟକୁ ନେଇ ପରିଚୟ ଖୋଜୁଛି ପୋଲିସ। ମୃତ ମହିଳାଙ୍କ ଫିଙ୍ଗର ପ୍ରିଣ୍ଟ୍‌ରୁ ଆଧାର କାର୍ଡ ମିଳିଗଲେ ପୋଲିସ ତାଙ୍କ ଠିକଣା ଖୋଜି ପରିବାର ଲୋକଙ୍କ ନିକଟରେ ପହଞ୍ଚତ୍ପାରିବ ବୋଲି ଜଣେ ଅଧିକାରୀ କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ଗଞ୍ଜାମରେ ଯୁଦ୍ଧକାଳୀନ ଭିତ୍ତିରେ ଚାଲିଛି ନିର୍ମାଣ: ହିଞ୍ଜିଳିକାଟୁ କୋଭିଡ ହସ୍ପିଟାଲ ପରିଦର୍ଶନ କରି ସମୀକ୍ଷା କଲେ ୫-ଟି ସଚିବ

ହିଞ୍ଜିିଳିକାଟୁ, ୧୫ା୫(ଡ଼ି.ଏନ୍‌.ଏ) : ରାଜ୍ୟ ୫-ଟି ସଚିବ ତଥା ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି କାର୍ତ୍ତିକେୟନ ପାଣ୍ଡିଆନ ଶୁକ୍ରବାର ହିଞ୍ଜିିଳିକାଟୁର ୧୦୦ ଶଯ୍ୟା ବିଶିଷ୍ଟ କୋଭିଡ୍‌...

ଯାତ୍ରୀ ନାହାନ୍ତି, ତେଲ, ଡ୍ରାଇଭର ଖର୍ଚ୍ଚ ତୁଲାଇବୁ କେମିତି

କୁଚିଣ୍ଡା,୨ା୭: ସରକାରଙ୍କ ନୂଆ ଗାଇଡ୍‌ଲାଇନ୍‌ ଅନୁଯାୟୀ, ଗୁରୁବାରଠାରୁ ରାଜ୍ୟର ୨୦ ଜିଲାରେ ଆରମ୍ଭ ହୋଇଛି ବସ୍‌ ସେବା। କିନ୍ତୁ କରୋନା ସଂକ୍ରମଣକୁ ଦୃଷ୍ଟିରେ ରଖି ଲୋକେ...

ଶାବଳରେ ଭୁସି ବୃଦ୍ଧ ବାପାଙ୍କୁ ହତ୍ୟା, ଅଭିଯୁକ୍ତ ପୁଅ ଫେରାର

ଚୌଦ୍ୱାର,୧୭।୫(ଡି.ଏନ୍‌.ଏ.): କଟକ ଜିଲା ଚୌଦ୍ୱାର ଥାନା ଅନ୍ତର୍ଗତ ସଫା ପଞ୍ଚାୟତର ଆଦିବାସୀ ବହୁଳ କଙ୍କାଳି ଗାଁରେ ରବିବାର ଏକ ଅଭାବନୀୟ ଘଟଣା ଘଟିଛି। ଗ୍ରାମରେ ପୁଅ...

୩ ନୂଆ ରୁଟ୍‌ରେ ଚାଲିବ ମୋ ବସ୍‌

ଭୁବନେଶ୍ୱର,୩୦।୮: ସେପ୍ଟେମ୍ବର ପହିଲାରୁ ରାଜଧାନୀରେ ତିନୋଟି ନୂଆ ରୁଟ୍‌ରେ ‘ମୋ ବସ୍‌’ ସେବା ଆରମ୍ଭ ହେବାକୁ ଯାଉଛି। ରୁଟ୍‌ ନଂ ୭୧ (ବରମୁଣ୍ଡାରୁ ରସୁଲଗଡ଼ ଦେଇ...

ଆରମ୍ଭ ହେଲା ଅଦଳବଦଳ ପ୍ରକ୍ରିୟା: ନନ୍ଦନକାନନ ଆସିଲେ ୩ ନୂଆ ଅତିଥି

ବାରଙ୍ଗ,୮ା୮(ଡି.ଏନ୍‌.ଏ.): ଚଳିତବର୍ଷର ପଶୁପକ୍ଷୀ ଅଦଳବଦଳ ପ୍ରକ୍ରିୟା ପ୍ରାଣୀ ଉଦ୍ୟାନ ନନ୍ଦନକାନନରେ ଆରମ୍ଭ ହୋଇଛି। ଅଗଷ୍ଟ ମାସରେ ୩ଟି ପର୍ଯ୍ୟାୟରେ ନନ୍ଦନକାନନକୁ ନୂଆ ଅତିଥି ଆସିବା ନେଇ...

ଯୁବକଙ୍କୁ ପିଟିପିଟି ହତ୍ୟା ଘଟଣା: ଅଭିଯୁକ୍ତ ବାପ ପୁଅ ଗିରଫ

ଭଦ୍ରକ ଅଫିସ, ୨୬।୯ – ଭଦ୍ରକ ଗ୍ରାମାଞ୍ଚଳ ଥାନା ଅଧୀନ ରାଉତରାଗଡିଆ ପାଟଣାରେ ବିଜୟ ବେହେରା ନାମକ ଜଣେ ଯୁବକଙ୍କୁ ପିଟିପିଟି ହତ୍ୟା ଘଟଣାରେ ପୋଲିସ...

କେସିଙ୍ଗା ସମନ୍ବିତ ଶିଶୁ ବିକାଶ ଯୋଜନା :ପ୍ରଶାସନ ଉପସ୍ଥିତିରେ ଛତୁଆ ବଣ୍ଟନ

କେସିଙ୍ଗା,୨।୯(ଡି.ଏନ.ଏ.) ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ପ୍ରତ୍ୟେକ ମାସର ୧ ତାରିଖରେ ଛତୁଆ ବଣ୍ଟନ ପାଇଁ ନିର୍ଦ୍ଦେଶ ଦିଆଯାଇଛି । ଜିଲାପାଳ ସମଗ୍ର ଜିଲାର ୧୩ଟି ବ୍ଲକରେ...

Advertisement


Archives

Model This Week