ପାରଳାଖେମୁଣ୍ଡି,୨୮ା୯(ଡି.ଏନ୍.ଏ.): ଗଜପତି ଜିଲା ମୋହନା ଥାନା ଅନ୍ତର୍ଗତ ଲବାରସିଂ ଗାଁରେ ମଙ୍ଗଳବାର ମଦ ଚଢ଼ାଉ କରିବାକୁ ଯାଇଥିବା ଅବକାରୀ କର୍ମଚାରୀ ଓ ପୋଲିସକୁ ଜଣେ ମହିଳା ପନିକି ଦେଖାଇଛନ୍ତି। ଘର ଭିତରେ ରହି ମହିଳା ଜଣକ ଗେଟ୍କୁ ବନ୍ଦ କରିବା ସହ ଜବରଦସ୍ତ କେହି ପଶିଲେ ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି। ଏହା ଦେଖି ପୋଲିସ ଓ ଅବକାରୀ କର୍ମଚାରୀମାନେ ଚଢ଼ାଉ ନ କରି ଫେରିଯାଇଛନ୍ତି। ଶୀଘ୍ର କୋର୍ଟରୁ ସର୍ଚ୍ଚ ଓ୍ବାରେଣ୍ଟ ଆଣି ମାଜିଷ୍ଟ୍ରେଟଙ୍କ ଉପସ୍ଥିତିରେ ମହିଳାଙ୍କ ଘରେ ପୁଣି ଥରେ ଚଢ଼ାଉ କରାଯିବ ବୋଲି ଅବକାରୀ ଇନ୍ସପେକ୍ଟର ପ୍ରକାଶ ଚନ୍ଦ୍ର ସାହୁ ସୂଚନା ଦେଇଛନ୍ତି।
ପ୍ରକାଶ ଯେ, ଲବାରସିଂ ଗ୍ରାମରେ ରହୁଥିବା ଭାନୁମତି ଶବରଙ୍କ ଘରେ ବେଆଇନ୍ ମଦ ଥିବା ଖବର ପାଇ ଅବକାରୀ କର୍ମଚାରୀ ଓ ୧୩ ଜଣିଆ ପୋଲିସ ଟିମ୍ ସେଠାରେ ଚଢାଉ କରିବାକୁ ଯାଇଥିଲେ। ହେଲେ ଚଢ଼ାଉ ବେଳେ ଭାନୁମତି ସହଯୋଗ କରିବା ପରିବର୍ତ୍ତେ ଘର ଗେଟ୍କୁ ବନ୍ଦ କରିଦେଇଥିଲେ। ଭିତରେ ରହି ଏକ ପନିକି ଧରି ପୋଲିସ ଓ ଅବକାରୀ କର୍ମଚାରୀଙ୍କୁ ଧମକଚମକ ଦେଇଥିଲେ। ଏଥିସହ ଅବକାରୀ କର୍ମଚାରୀ ଓ ପୋଲିସ ଜବରଦସ୍ତ ଘରେ ପଶିଲେ ଆତ୍ମହତ୍ୟା କରିବେ ବୋଲି କହିଥିଲେ। ଭାନୁମତି ଦୀର୍ଘ ସମୟ ଗେଟ୍ ପାଖରେ ପନିକି ଧରି ପାଟିତୁଣ୍ଡ କରିବାରୁ ଉକ୍ତ ସ୍ଥାନରୁ ପୋଲିସ ଓ ଅବକାରୀ କର୍ମଚାରୀ ଚଢାଉ ନକରି ଫେରି ଆସିଛନ୍ତି।
