ନାଉଗଁା, ୮ା୨(ସ୍ବ.ପ୍ର.): ଜଗତ୍ସିଂହପୁର ଜିଲା ନାଉଗଁା ବ୍ଲକ ଅନ୍ତର୍ଗତ କୋରୁଅ ପଞ୍ଚାୟତ ଶୁଆକଣ ଗଁାର ଚତୁଃପାର୍ଶ୍ୱକୁ ଦେବୀ ନଦୀ ଘେରି ରହିଛି। ଏହି ଗଁାଟି ସମୁଦ୍ର କୂଳବର୍ତ୍ତୀ ଅଞ୍ଚଳ ହୋଇଥିବା ବେଳେ ପାନୀୟ ଜଳର ସମସ୍ୟା ଲାଗି ରହିଛି। ସମୁଦ୍ର ତଟବର୍ତ୍ତୀ ଗ୍ରାମ ହୋଇଥିବାରୁ ଏହି ସ୍ଥାନରେ ଲୁଣିଆ ପାଣି ମିଳିଥାଏ। ଯାହାକୁ କି ସାଧାରଣ ଭାବେ ପିଇବା ସମ୍ଭବ ନୁହେଁ। ତେଣୁ ଗ୍ରାମର ପାନୀୟ ଜଳ ସମସ୍ୟାକୁ ଦୃଷ୍ଟିରେ ରଖି ସରକାରଙ୍କ ଜଳ ଜୀବନ ମିଶନ ଆନୁକୂଲ୍ୟରେ ଘର ଘରକୁ ପାନୀୟ ଜଳ ଯୋଜନାରେ ଏହି ଗଁାଟିକୁ ସାମିଲ କରାଯାଇଛି। ଏହାର ଲକ୍ଷ୍ୟ, ଉଦ୍ଦେଶ୍ୟ ହେଉଛି ସ୍ବଚ୍ଛ ଓ ବିଶୁଦ୍ଧ ପାନୀୟ ଜଳ ସମସ୍ତ ପରିବାର ନିକଟରେ ପହଞ୍ଚାଇବା। ସେଥିପାଇଁ ସରକାରଙ୍କ ପକ୍ଷରୁ ପାନୀୟ ଜଳ ପ୍ରକଳ୍ପ ନିର୍ମାଣ ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଛି। ଏହି ପ୍ରକଳ୍ପଟି ସରକାରଙ୍କ ଗ୍ରାମ୍ୟ ଜଳ ପରିମଳ ବିଭାଗ ପକ୍ଷରୁ ନିର୍ମାଣ କରାଯାଉଛି। ଏହାର ତଦାରଖ ଦାୟିତ୍ୱ ବିଭାଗ ଅଧୀନରେ ରହିଛି। କିନ୍ତୁ ନିର୍ମାଣ କାର୍ଯ୍ୟ ନିମ୍ନମାନର ହେଉଥିବା ସ୍ଥାନୀୟ ଜନସାଧାରଣ ଗଣମାଧ୍ୟମରେ ଅଭିଯୋଗ କରିଛନ୍ତି। ଗଁାର ଭାଗେନ୍ଦ୍ର ମାଣିଆ, ଦୈତାରୀ ଦାସ, ଦିଲୀପ ଦାସ, ନଗେନ୍ଦ୍ର ଦାସଙ୍କ ଅଭିଯୋଗ ମୁତାବକ ଠିକାଦାର ମନଇଚ୍ଛା କାମ କରୁଥିବା ବେଳେ କୌଣସି ବିଭାଗୀୟ ଅଧିକାରୀ ଉପସ୍ଥିତ ରହୁନାହାନ୍ତି। ଫଳରେ ଭାଗ, ମାପ ଠିକ୍ ଭାବେ ଦିଆଯାଉ ନ ଥିବାରୁ କାର୍ଯ୍ୟର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ସେହିପରି ନିୟମାନୁସାରେ, କାର୍ଯ୍ୟ ଆରମ୍ଭ ପୂର୍ବରୁ ଜନସାଧାରଣଙ୍କ ଅବଗତି ନିମନ୍ତେ ସୂଚନା ଫଳକ ଲଗାଯିବା କଥା। ପାନୀୟ ଜଳ ପରିମଳ ବିଭାଗ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ଉକ୍ତ ସୂଚନା ଫଳକ ୮.୬ ଫୁଟର ହୋଇଥିବା ବେଳେ ଏଥିରେ ସମସ୍ତ ତଥ୍ୟ ପ୍ରଦର୍ଶିତ କରାଯିବ। କିନ୍ତୁ କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ଏ ପର୍ଯ୍ୟନ୍ତ ସୂଚନା ଫଳକ ଲଗାଯାଉନାହିଁ। ଯାହାକି ସାଧାରଣ ଲୋକଙ୍କୁ ସମସ୍ତ ତଥ୍ୟ ଗୋପନ ରଖାଯାଉଛି। ସରକାରୀ ନିର୍ମାଣ ନିୟମ ଅନୁସାରେ କାର୍ଯ୍ୟରେ ପୋଡା ଇଟାକୁ ବାଦ ଦିଆଯାଇ ସିମେଣ୍ଟ ଇଟା ବ୍ୟବହୃତ କରାଯିବ। କିନ୍ତୁ ଉକ୍ତ ପାନୀୟ ଜଳ ପ୍ରକଳ୍ପରେ ପୋଡା ଇଟାକୁ ବ୍ୟବହାର କରାଯାଉଛି। ସରକାରୀ ଭାବେ ଉକ୍ତ ଇଟାକୁ କାମରେ ଲଗାଇବାକୁ ଧାର୍ଯ୍ୟ କରାଯାଇନାହିଁ। ଯାହାକି ପାନୀୟ ଜଳ ପ୍ରକଳ୍ପର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି କରିଛି। ତେଣୁ ପ୍ରକଳ୍ପଟିକୁ ଠିକ୍ ଭାବେ ନିର୍ମାଣ କରିବାକୁ ଗ୍ରାମବାସୀଙ୍କ ପକ୍ଷରୁ ପ୍ରଶାସନ ନିକଟରେ ଦାବି କରାଯାଇଛି। ଏ ସମ୍ପର୍କରେ ବିଭାଗର ଯନ୍ତ୍ରୀ ରଶ୍ମି ରଞ୍ଜନ ଦାସଙ୍କୁ ପଚାରିବାରେ ସୂଚନା ଫଳକ ଲଗାଯିବା ପାଇଁ ଠିକାଦାରଙ୍କୁ କୁହାଯିବ। ନିମ୍ନମାନର କାର୍ଯ୍ୟ ବିଷୟରେ ପଚାରିବାରୁ କାମ ବର୍ତ୍ତମାନ ଆରମ୍ଭ ହୋଇଛି। ଠିକ୍ ଭାବେ କାମ କରାଯିବ ବୋଲି ସେ କହିଥିଲେ।
