ବରଗଡ଼ ଅଫିସ୍,୨।୮: ବରଗଡ଼ ଜିଲା ଗାଇସିଲେଟ ବ୍ଲକ ଅଧୀନ ଚାରିଛକଠାରୁ ମଲମଣ୍ଡା ବୌଦ୍ଧବିହାର ଗନିଆଁପାଲି ରାସ୍ତା ଶୋଚନୀୟ ହୋଇପଡ଼ିଛି । ଫଳରେ ରାସ୍ତାରେ ଯାତାୟାତ ହୋଇପାରୁ ନାହିଁ। ରାସ୍ତା ମରାମତି ନେଇ ବାରମ୍ବାର ଦାବି ସତ୍ତ୍ବେ କିଛି ପଦକ୍ଷେପ ନିଆଯାଉ ନାହିଁ। ଏନେଇ ଗ୍ରାମବାସୀ ରାସ୍ତା ଉପରେ ଧାନ ରୋଇ ସୋମବାର ପ୍ରତିବାଦ କରିଛନ୍ତି। ଏହା ସହିତ ଗ୍ରାମର ଏକ ପ୍ରତିନିଧି ଦଳ ଜିଲାପାଳଙ୍କ ଅଫିସକୁ ଆସିଥିଲେ । ଜିଲାପାଳ ମୋନିଷା ବାନାର୍ଜୀଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଧା ଟପ୍ପୋଙ୍କୁ ସ୍ମାରକପତ୍ର ପ୍ରଦାନ କରି ତୁରନ୍ତ ରାସ୍ତା ମରାମତି କରିବକୁ ଗ୍ରାମବାସୀ ଦାବି କରିଥିଲେ।
ସ୍ମାରକପତ୍ରରେ ଉଲ୍ଲେଖ ରହିଛି, ଗନିଆଁପାଲି ପଞ୍ଚାୟତ ଅଧୀନ ଉପରୋକ୍ତ ରାସ୍ତା ଉପରେ ୨୦୧୪ରେ ଗ୍ରାମ୍ୟ ଉନ୍ନୟନ(ଆର୍ଡି) ବିଭାଗ ଦ୍ୱାରା ମୋରମ ପକାଯାଇଥିଲା। ୨୦୧୮ରେ ରାସ୍ତାର ୨ କି.ମି ପର୍ଯ୍ୟନ୍ତ ପିଚୁ କାମ କରାଯାଇ କାର୍ଯ୍ୟ ବନ୍ଦ କରି ଦିଆଯାଇଥିଲା। ୨୦୨୦ରେ ଏହି ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଅନ୍ତର୍ଭୁକ୍ତ କରାଯାଇ ୨କି.ମି ରାସ୍ତା କାମ ହୋଇଥିଲା । ତେବେ ରାସ୍ତା ଆରମ୍ଭର ଯେଉଁସ୍ଥାନରେ ସୂଚନା ଫଳକ ଲାଗିଛି, ସେହିସ୍ଥାନରେ ଜେସିବି ମେଶିନ ଦ୍ୱାରା ରାସ୍ତାକୁ କଟାଯାଇଛି ଏବଂ କାମ କରାଯାଇ ନ ଥିବା ଯୋଗୁ ଉକ୍ତ ରାସ୍ତାରେ ଯିବା ଆସିବା କରି ହେଉ ନ ଥିବା ଗ୍ରାମବାସୀ କହିଛନ୍ତି। ଫଳରେ ରାସ୍ତାକୁ ତୁରନ୍ତ ଲୋକଙ୍କ ଯାତାୟାତ ଉପଯୋଗୀ କରିବାକୁ ଗ୍ରାମବାସୀ ଦାବି କରିଛନ୍ତି। ଆସନ୍ତା ୭ ଦିନ ମଧ୍ୟରେ ଏହା କରା ନ ଗଲେ ଗ୍ରାମବାସୀ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି। ତୁଲସୀରାମ ସେଠ, ଦେବେନ୍ଦ୍ରେ ସାହୁ, ଘନଶ୍ୟାମ ବେହେରା, କୃଷ୍ଣଚନ୍ଦ୍ର ବେହେରା, ସରୋଜ ସାହୁ ପ୍ରମୁଖ ସ୍ମାରକପତ୍ର ପ୍ରଦାନ ପାଇଁ ଜିଲାପାଳଙ୍କ ଅଫିସକୁ ଆସିଥିଲେ ।
