ଉମରକୋଟ, ୨୨।୧୧(ସ୍ବ.ପ୍ର.): ଆଧୁନିକ ଯୁଗରେ ନିଜର କାୟା ଓ ଆଧିପତ୍ୟ ବିସ୍ତାର ପାଇଁ ପରିବେଶ ସନ୍ତୁଳନକୁ ଅଣଦେଖା କରି ଜଙ୍ଗଲ ନଷ୍ଟ କରିବାକୁ କୁଣ୍ଠାବୋଧ କରୁନାହାନ୍ତି ଲୋକେ। କାଠ ମାଫିଆଙ୍କ ଲୋଲୁପ ଦୃଷ୍ଟି ମଧ୍ୟ ରହିଛି ଜଙ୍ଗଲ ଉପରେ। ଏଣୁ ଦିନକୁ ଦିନ ଜଙ୍ଗଲ କ୍ଷୟ ହେବାରେ ଲାଗିଛି। ନବରଙ୍ଗପୁର ଜିଲା ଉମରକୋଟ ବନ ବିଭାଗ ସରକାରଙ୍କ ଆମ ଜଙ୍ଗଲ ଯୋଜନା ମାଧ୍ୟମରେ ନୂତନ ଜଙ୍ଗଲ ସୃଷ୍ଟି କରି ପରିବେଶ ସନ୍ତୁଳନ କରିବାରେ ଏକ ମୁଖ୍ୟ ଭୂମିକା ଗ୍ରହଣ କରିଛି। ଲୋକଙ୍କ ସୁବିଧା ଓ ସୁସ୍ଥ ପରିବେଶ ପାଇଁ ବନ ବିଭାଗ ଗଛ ଲଗାଉଛି। ସ୍ଥାନୀୟ ଗ୍ରାମବାସୀ ଉକ୍ତ ଜଙ୍ଗଲକୁ ପାଳି କରି ସୁରକ୍ଷା ଯୋଗାଇ ଆସୁଛନ୍ତି। ନବରଙ୍ଗପୁର ଜିଲା ଉମରକୋଟ ବନଖଣ୍ଡ ଅଧୀନରେ ବେହେଡ଼ା ସଂରକ୍ଷିତ ଜଙ୍ଗଲ ରହିଛି। ତା’ ମଧ୍ୟରେ ସିରାଗୁଡା ଗ୍ରାମକୁ ଲାଗି ପ୍ରାୟ ୫୦ ହେକ୍ଟର ଜଙ୍ଗଲ ରହିଛି। ସିରାଗୁଡା ଗ୍ରାମବାସୀ ଏହି ଜଙ୍ଗଲକୁ ପ୍ରାୟ ୫୦ବର୍ଷ ହେବ ପାଳି କରି ସୁରକ୍ଷା ଦେଇ ଆସୁଛନ୍ତି। ଏହାକୁ ଦୃଷ୍ଟିରେ ରଖି ଉମରକୋଟ ବନଖଣ୍ଡ ଅଧିକାରୀ ପୂର୍ଣ୍ଣଚନ୍ଦ୍ର ନାୟକଙ୍କ ପ୍ରୋତ୍ସାହନରେ ଗ୍ରାମବାସୀଙ୍କୁ ନେଇ ଏକ ବନ ସୁରକ୍ଷା କମିଟି ଗତବର୍ଷ ନଭେମ୍ବର ୧୦ରେ ଗଠନ କରାଯାଇଛି। ଏହି କମିଟି ୫୦ ହେକ୍ଟର ମଧ୍ୟରୁ ୬ ରୁ ୭ ହେକ୍ଟର ଖାଲି ପଡ଼ିଥିବା ଜାଗାରେ ସିରାଗୁଡା ବନ ସୁରକ୍ଷା ସମିତି ଓ ଗ୍ରାମ୍ୟ ବିକାଶ ସଙ୍ଗଠନ ସହାୟତାରେ ୧୦ ହଜାରରୁ ଊର୍ଦ୍ଧ୍ୱ ଗଛ ଲଗାଇ ନୂତନ ଜଙ୍ଗଲ ସୃଷ୍ଟି କରିଛି। ବର୍ଷା ପାଣିକୁ କିପରି ସଂରକ୍ଷଣ କରାଯିବ ତାହାର ବ୍ୟବସ୍ଥା ମଧ୍ୟ କରାଯାଇଛି। ଏହାଦ୍ୱାରା ଗ୍ରାମର କେତେକ ଲାକ ମଧ୍ୟ ରୋଜଗାରକ୍ଷମ ହୋଇପାରିଛନ୍ତି। ଦିନକୁ ଦିନ ବିଭିନ୍ନ କାରଣରୁ ଜଙ୍ଗଲ କ୍ଷୟ ହେବାରେ ଲାଗିଛି। ଏହି ଯୋଜନାରେ ସରକାର ଅର୍ଥ ଅନୁଦାନ କରିଥିବା ବେଳେ ଗ୍ରାମ୍ୟ ବିକାଶ ସଂଗଠନ ସହାୟତା କରୁଛି। ବର୍ତ୍ତମାନ ପର୍ଯ୍ୟନ୍ତ ୨୦୨୧-୨୨ ଆର୍ଥିକ ବର୍ଷରେ ୩,୪୨,୬୫୦ ଟଙ୍କା ଖର୍ଚ୍ଚ ହୋଇଥିବା ସୂଚନା ଦେଇଛନ୍ତି ଉମରକୋଟ ବନଖଣ୍ଡ ଅଧିକାରୀ ପୂର୍ଣଚନ୍ଦ୍ର ନାୟକ। ଏଥିସହ ରତନଗୁଡା, ମୁଦିଗୁଡା ଗ୍ରାମରେ ମଧ୍ୟ ପ୍ରାୟ ୨୦ ହଜାରରୁ ଊର୍ଦ୍ଧ୍ୱ ଗଛ ଲଗାଇ ଜଙ୍ଗଲ ସୃଷ୍ଟି କରାଯାଇଥିବା ସେ କହିଛନ୍ତି। ବନ ବିଭାଗ ପକ୍ଷରୁ ଲୋକଙ୍କ ଜୀବନ ଜୀବିକା ପାଇଁ ଅନେକ କାର୍ଯ୍ୟକ୍ରମ ହାତକୁ ନେଇ ଲୋକଙ୍କୁ କର୍ମ ଯୋଗାଣ ପାଇଁ ଚେଷ୍ଟା ଚାଲିଛି ବୋଲି କହିଛନ୍ତି ଉମରକୋଟ ବନଖଣ୍ଡ ଅଧିକାରୀ।
