ନିରାକାରପୁର,୧୧।୧୨(ଡି.ଏନ୍.ଏ.): ବିଜ୍ଞାନ ଯୁଗରେ ବି ଲୋକେ ବୈଦ୍ୟଙ୍କ ଉପରେ ନିର୍ଭର କରିବା ସହ ଆୟୁର୍ବେଦ ପଦ୍ଧତିର ଚିକିତ୍ସାକୁ ଭରସା କରୁଛନ୍ତି। ତେଣୁ କେତେଜଣ ବୈଦ୍ୟ ପରିବାର ନିଜର କୌଳିକ ବୃତ୍ତିକୁ ଜାବୋଡି ଧରିଛନ୍ତି। ଖୋର୍ଦ୍ଧା ଜିଲା ଟାଙ୍ଗୀ ବ୍ଲକ ଡିଆ ପଞ୍ଚାୟତର ‘ଭୋଇସାହି’ ହେଉଛି ଏଭଳି ଗାଁଟିଏ, ଯେଉଁଠି ଅଧିକାଂଶ ପରିବାର ଚେରମୂଳିରୁ ଔଷଧ ପ୍ରସ୍ତୁତ କରିବା ସହ ରୋଗୀଙ୍କ ଉପଚାର କରିଥାନ୍ତି। ଏଥିପାଇଁ ଭୋଇସାହି ଲୋକମୁଖରେ ବୈଦ୍ୟର ଗାଁ ଭାବେ ପରିଚୟ ପାଇଛି।
କବିରାଜ ନାରାୟଣ ମହାନ୍ତିଙ୍କ କିବାନୁଯାୟୀ, ଭୋଇ ବଂଶୀୟ ରାଜାଙ୍କ ଶାସନ ସମୟରେ ରାଜାଙ୍କ ପରିବାରର କେହି ସଦସ୍ୟ ଅର୍ଶ ରୋଗରେ ଆକ୍ରାନ୍ତ ହୋଇଥିଲେ। ଜେଜେଙ୍କ ଜେଜେବାପା ତାଙ୍କୁ ଚିକିତ୍ସା କରି ରୋଗ ଭଲ କରିଥିଲେ। ସେଥିଲାଗି ରାଜା ତାଙ୍କୁ ‘ଭୋଇ’ ଉପାଧି ଦେଇଥିଲେ। ସେବେଠାରୁ ଏହି ଗ୍ରାମ ଭୋଇସାହି ନାମକରଣ ହୋଇଥିଲା। ଏହି ଗ୍ରାମରେ ପ୍ରବେଶ କରୁ କରୁ ଦେଖିବାକୁ ମିଳେ, କିଏ ଗଛର ପତ୍ର ସଂଗ୍ରହ କରୁଛି ତ’ ଆଉ କିଏ ଚେରମୂଳି ଖରାରେ ଶୁଖାଉଛି। ଆଉ କିଏ ହେମଦସ୍ତା ଓ ଢିଙ୍କିରେ ଚେରମୂଳି କୁଟୁଛନ୍ତି। ଏମାନଙ୍କ ପାଖରେ ଉଚ୍ଚଶିକ୍ଷାର ଡିଗ୍ରୀ ନ ଥିଲେ ମଧ୍ୟ ଅନେକ ରୋଗ ନିବାରଣ କରିବାରେ ରହିଛି ପାରଦର୍ଶିତା। ପାରମ୍ପରିକ ଭାବେ ଚେରମୂଳିରୁ ଔଷଧ ପ୍ରସ୍ତୁତ କରିବା ସହ ରୋଗୀଙ୍କ ଉପଚାର କରି ସେଥିରୁ ଉପାର୍ଜିତ ଅର୍ଥରେ କବିରାଜମାନେ ସେମାନଙ୍କର ପରିବାର ଚଳାଇଥାନ୍ତି। ମାତ୍ର ଚେରମୂଳିର ମୂଲ୍ୟ ଦିନକୁ ଦିନ ବୃଦ୍ଧି ପାଉଥିବାରୁ ଏହାକୁ କିଣି ପରିବାର ଚଳାଇବା କଷ୍ଟକର ହୋଇପଡିଛି। ଫଳରେ ଗ୍ରାମର କେତେଜଣ ଲୋକ ଏହି କୌଳିିକ ବୃତ୍ତିକୁ ଛାଡ଼ି ମୂଲ ଲାଗୁଛନ୍ତି। ସରକାରଙ୍କ ପକ୍ଷରୁ ଆର୍ଥିକ ସହାୟତା ନ ମିଳିଲେ ଏହି ବୃତ୍ତି ଲୋପ ପାଇଯିବ ବୋଲି ଜୟକୃଷ୍ଣ ମହାନ୍ତି କହିଛନ୍ତି। ପୂର୍ବରୁ ଗ୍ରାମ ନିକଟରେ ଥିବା ଚିତ୍ରକୂଟ ପାହାଡ଼ରୁ କିଛି ଚେରମୂଳି ସଂଗ୍ରହ କରାଯାଉଥିଲା। କିନ୍ତୁ ଏବେ ଆଉ ସମ୍ଭବ ହେଉନାହିଁ। ଯେଉଁ ଚେରମୂଳି ବଜାରରେ ମିଳୁଛି ତାହା ଉଚ୍ଚା ଦରରେ ବିକ୍ରି ହେଉଛି। ଚେରମୂଳି କିଣି ରୋଗୀଙ୍କ ସେବା ସହ ପରିବାର ଚଳାଇବା କଷ୍ଟକର ହୋଇପଡୁଛି ବୋଲି କବିରାଜ ବାଲୁଙ୍କେଶ୍ୱର ମହାନ୍ତି କହିଛନ୍ତି। ପ୍ରତ୍ୟେକ ବର୍ଷ ଏହି ଗ୍ରାମରେ କାର୍ତ୍ତିକ କୃଷ୍ଣ ତ୍ରୟୋଦଶୀରେ ଧନ୍ବନ୍ତରୀଙ୍କ ପୂଜା କରାଯାଇଥାଏ। କବିରାଜମାନେ ଉପସ୍ଥିତ ରହି ପୁରାଣ ଶାସ୍ତ୍ର ପାଠ କରିବା ସହ ପାରମ୍ପରିକ ଚିକିତ୍ସା ବିଜ୍ଞାନ ସମ୍ପର୍କରେ ଆଲୋଚନା କରିଥାନ୍ତି। ଏହି ଗ୍ରାମରେ ନୂତନ ଓ ପୁରାତନ ରୋଗର ଆୟୁର୍ବେଦ ପଦ୍ଧତିରେ ସଫଳ ଚିକିତ୍ସା କରାଯାଇଥାଏ।
