ଗୋପାଳପୁର,୨ା୭: ଗଁା ଆଡକୁ ମାଡ଼ି ଆସୁଛି ସମୁଦ୍ର। ଏଭଳି ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲା ଗୋଳନ୍ଥରା ଥାନା ରାମେୟାପାଟଣା ଗ୍ରାମରେ। ଗତ ୫ ଦିନ ହେବ ସମୁଦ୍ରର ଉଚ୍ଚ ଜୁଆର ମାଡ଼ ହେବାରୁ ଏଲ. ଭୋଗରାଜୁ, ଏଲ.ଆପନା ଓ କେ.ଭୀମାଙ୍କର ୩ଟି ଘର ଭାଙ୍ଗିଯାଇଛି। ଏଥିଯୋଗୁ ଗ୍ରାମବାସୀ ଭୟଭୀତ ହୋଇ ପଡ଼ିଛନ୍ତି। ବାହୁଦା ନଦୀ ମୁହାଣ ସମୁଦ୍ରରେ ମିଶି ଦକ୍ଷିଣା ପବନ ହେବାରୁ ଦିଗ ପରିବର୍ତ୍ତନ କରି ଜୁଆର ରାମେୟାପାଟଣା ଗ୍ରାମ ଆଡ଼କୁ ମୁହଁାଇଲାଣି ବୋଲି ମତ୍ସ୍ୟଜୀବୀମାନେ କହିଛନ୍ତି। ପ୍ରତିବର୍ଷ ଏହି ସମୟରେ ଉଚ୍ଚ ଜୁଆର ମାଡ଼ି ଆସିବାରୁ ବହୁ ଘର ନଷ୍ଟ ହେବା ସହ ଧନ ହାନି ହେବାର ନଜିର ରହିଛି। ୨୦୧୬ରୁ ସମୁଦ୍ରର ଉଚ୍ଚ ଜୁଆର ମାଡ଼ିବା ଆରମ୍ଭ ହୋଇଥିଲା। ୨୦୧୯ରେ ୨୭ଘର ଭାଙ୍ଗିବା ସହ ଏକ ସାହି ସମୁଦ୍ରରେ ଲୀନ ହୋଇଯାଇଥିଲା। ଏହାର ପ୍ରତିକାର ପାଇଁ ପ୍ରଶାସନ ପକ୍ଷରୁ ବହୁବାର ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ତାହା କରାଯାଉ ନାହିଁ। ଗଁାକୁ ଜୁଆର ପାଣି ନ ପଶିବା ପାଇଁ ବାହୁଦା ମୁହାଣରେ ଅସ୍ଥାୟୀ ବାଲିବସ୍ତା ପକାଯାଇ ବ୍ୟାରିକେଡ୍ କରାଯାଇଥିଲା, କିନ୍ତୁ ଏହା ସାମୁଦ୍ରିକ ଝଡ଼ ପ୍ରଭାବରେ ଭାଙ୍ଗି ଯାଇଥିଲା। ଅନ୍ୟପଟେ ସମୁଦ୍ର ଉପକୂଳରେ ଥିବା ଲୋକମାନଙ୍କୁ ରାମେୟାପାଟଣାର କିଛି ଦୂରରେ ଓଡ଼ିଶା ଡିଜାଷ୍ଟର ରିକୋଭରି ପ୍ରୋଜେକ୍ଟ (ଓଡିଆରପି)ରେ ପକ୍କାଘର ଦିଆଯାଇଥିଲା। କିନ୍ତୁ ସେଠାକୁ ଯାତାୟାତର ସୁବିଧା ନ ଥିବାରୁ ଲୋକମାନେ ସେଠାରେ ନ ରହି ସମୂଦ୍ର କୂଳରେ ଘର କରି ମାଛ ମାରି ଜୀବିକା ନିର୍ବାହ କରୁଥିଲେ।
ଏହାର ସ୍ଥାୟୀ ସମାଧାନ ନ ହେଲେ ଆଗାମୀ ଦିନରେ ଉକ୍ତ ଗ୍ରାମ ସମୁଦ୍ର ପାଣିରେ ଲୀନ ହେବା ସମ୍ଭାବନା ରହିଛି। ପୂର୍ବରୁ ବିଭିନ୍ନ ସମୟରେ ଉଚ୍ଚସ୍ତରୀୟ ବୈଷୟିକ କମିଟି ଉକ୍ତ ସ୍ଥାନ ପରିଦର୍ଶନ କରିବା ସହ ସରକାରଙ୍କୁ ରିପୋର୍ଟ ମଧ୍ୟ ପ୍ରଦାନ କରିଛନ୍ତିି। ଗୁରୁବାର ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ ଜୟଦୀପ ପଣ୍ଡା, ଚିକିଟି ତହସିଲଦାର ବିଶ୍ୱ ରଞ୍ଜନ କହଁର ଓ ଅନ୍ୟ ଅଧିକାରୀମାନେ ମଧ୍ୟ ଘଟଣାସ୍ଥଳ ପରିଦର୍ଶନ କରିଛନ୍ତି। ନିର୍ବାହୀ ଯନ୍ତ୍ରୀ ପଣ୍ଡାଙ୍କ କହିବାନୁସାରେ, ୨୩ କୋଟି ଟଙ୍କା ବ୍ୟୟରେ ଏଠାରେ ସୁରକ୍ଷା ପ୍ରାଚୀର କରାଯିବା ପାଇଁ ସରକାର ଓ ପ୍ରଶାସନିକ ଅନୁମୋଦନ ପାଇଁ ପଠାଯାଇଛି। ଏହା ଅନୁମୋଦନ ହେଲେ ଖୁବ୍ଶୀଘ୍ର କାର୍ଯ୍ୟାରମ୍ଭ ହେବ ବୋଲି ପଣ୍ଡା ସୂଚନା ଦେଇଛନ୍ତି।
