ଖୋର୍ଦ୍ଧା ଅଫିସ,୨୨।୧: ଖୋର୍ଦ୍ଧା ଜିଲାରେ ସରକାରୀ ଜମି, ଗ୍ରାମ୍ୟ ଜଙ୍ଗଲ ଏବଂ କାଜୁ ଜଙ୍ଗଲରୁ ପଥର ମାଫିଆମାନେ ମାଙ୍କଡ଼ା ପଥର ଓ ମୋରମ ଚାଲାଣ କରୁଥିବାବେଳେ ଏବେ ସେମାନଙ୍କ ଲୋଲୁପ ଦୃଷ୍ଟି ଗାଁ ଶ୍ମଶାନ ଜମି ଉପରେ ପଡ଼ିଛି। ଗତ କିଛିଦିନ ହେଲା ଖୋର୍ଦ୍ଧା ନିକଟ ବ୍ରଜମୋହନପୁର ଗ୍ରାମର ଶ୍ମଶାନ ଜମିରୁ ବେଆଇନ ଭାବେ ପଥର କଟାଚାଲିଛି। ମାଫିଆ ମାନେ ପଥର କାଟି ଚାଲାଣ କରୁଥିବାରୁ ଶ୍ମଶାନ ଜମି ଏବେ ମାଟିରେ ମିଶିବାକୁ ବସିଲାଣି। କେତେକ ସ୍ଥାନରେ ୫୦ ଫୁଟରୁ ଊର୍ଦ୍ଧ୍ୱ ଗଭୀର ଗାତ ସୃଷ୍ଟି ହୋଇଛି। ମୃତଦେହ ଦାହ ଲାଗି ଗ୍ରାମବାସୀ ହଇରାଣ ହେଉଛନ୍ତି। ଗ୍ରାମବାସୀ ବେଆଇନ ପଥର ଚାଲାଣକୁ ବିରୋଧ କଲେ ମାଫିଆମାନେ ନାଲି ଆଖି ଦେଖାଉଛନ୍ତି ବୋଲି ଗୁରୁବାର ଗ୍ରାମବାସୀ ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏ ନେଇ ସେମାନେ ଜିଲାପାଳଙ୍କୁ ଏକ ଦାବିପତ୍ର ଦେଇଛନ୍ତି।
ପଥର ମାଫିଆଙ୍କ ଆତଙ୍କରାଜରୁ ଗ୍ରାମବାସୀଙ୍କୁ ସୁରକ୍ଷା ଦେବା ସହ ନୂତନ ଶ୍ମଶାନ ଜମି ଯୋଗାଇଦେବା ଲାଗି ସେମାନେ ଦାବି କରିଛନ୍ତି। ଖୋର୍ଦ୍ଧା ଜିଲାର ଖୋର୍ଦ୍ଧା, ଜଟଣୀ, ଭୁବନେଶ୍ୱର, ବେଗୁନିିଆ, ବୋଲଗଡ଼ ଓ ଟାଙ୍ଗୀ ପ୍ରଭୃତି ଅଞ୍ଚଳରେ ଏକର ଏକର କାଜୁ ଜଙ୍ଗଲ, ଗ୍ରାମୀଣ ଜଙ୍ଗଲ, ସରକାରୀ ଜମିରୁ ପଥର କଟାଚାଲିଛି। ଫଳରେ ଜଙ୍ଗଲ ନଷ୍ଟ ହେବା ସହ ପରିବେଶ ପ୍ରତିକୂଳ ପ୍ରଭାବ ମଧ୍ୟ ପଡୁଛି। ଗୋଚାରଣ ପାଇଁ ସ୍ଥାନ ଅଭାବ ପଡ଼ିିଲାଣି। ପ୍ରଶାସନ ମଧ୍ୟ ରାଜସ୍ବ ହରାଉଛି। ତେଣୁ ପ୍ରଶାସନ ଓ ପୋଲିସ ପକ୍ଷରୁ ତୁରନ୍ତ ଦୃଢ କାର୍ଯ୍ୟାନୁଷ୍ଠାନ
ଗ୍ରହଣ ପାଇଁ ଅଞ୍ଚଳବାସୀ ଦାବି କରିଛନ୍ତି।
