ଧର୍ମଶାଳା,୩ା୩(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ବ୍ଲକ ଅଧୀନ ତରଞ୍ଜିଆ ପଞ୍ଚାୟତର ନୂଆ ପୋଖରୀ ନିର୍ମାଣ ଓ ଗଙ୍ଗାଧରପୁର ପଞ୍ଚାୟତ ଇମାମନଗର ଗ୍ରାମରେ ରାସ୍ତା ନିର୍ମାଣରେ ହୋଇଥିବା ଦୁର୍ନୀତିର ପୁଣି ଖୋଳତାଡ଼ ଆରମ୍ଭ କରିଛି ଭିଜିଲାନ୍ସ। ଯାଜପୁର ଭିଜିଲାନ୍ସ ଡିଏସ୍ପି ସୁଶୀଲ ଏକ୍କା ଓ ଇନ୍ସପେକ୍ଟର ଅନସୂୟା ସେନାପତିଙ୍କ ନେତୃତ୍ୱରେ ଏକ ବୈଷୟିକ ଦଳ ଗୁରୁବାର ଆସି ଉଭୟ ସ୍ଥାନରେ ତଦନ୍ତ କରିଛନ୍ତି। ତଦନ୍ତକାରୀ ଅଧିକାରୀ ଦମକଳ ବାହିନୀ ଡଙ୍ଗା ସାହାଯ୍ୟରେ ପୋଖରୀ ମାପ ଚୁପ କରିବା ସହିତ ଗଙ୍ଗାଧରପୁର ପଞ୍ଚାୟତରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା(ଏମ୍ଜିଏନ୍ଆର୍ଇଜିଏସ୍)ରେ ହୋଇଥିବା ରାସ୍ତାକୁ ମଧ୍ୟ ମାପଚୁପ କରିଛନ୍ତି।
ସୂଚନାଯୋଗ୍ୟ, ଯାଜପୁର କ୍ଷୁଦ୍ର ଜଳସେଚନ ବିଭାଗ ଦ୍ୱାରା ୨୦୧୯/୨୦ ଆର୍ଥିକ ବର୍ଷରେ ତରଞ୍ଜିଆ ପଞ୍ଚାୟତର ଖାତା ନଂ.୨୨୫, ପ୍ଲଟ ନଂ.୧୫୧୮ ପୋଖରୀ ପୁନରୁଦ୍ଧାର କରାଯାଇ ୨୪ଲକ୍ଷ ୯୯ ହଜାର ଟଙ୍କା ବ୍ୟୟ କରାଯାଇଥିବା ଦର୍ଶାଯାଇଥିଲା। କିନ୍ତୁ ସେହି ଆର୍ଥତ୍କ ବର୍ଷରେ ତରଞ୍ଜିଆ ପଞ୍ଚାୟତ ପକ୍ଷରୁ ଚତୁର୍ଦ୍ଦଶ ଅର୍ଥ କମିଶନ ଅନୁଦାନରୁ ୩ ଲକ୍ଷ ୫୦ ହଜାର ବ୍ୟୟ ଅଟକଳ କରି ୩ ଲକ୍ଷ ୪୬ ହଜାର ୫୦୦ ଟଙ୍କା ବ୍ୟୟରେ ସମାନ ସ୍ଥାନରେ ପୋଖରୀ ପୁନରୁଦ୍ଧାର କରାଯାଇଥିବା ଦର୍ଶାଇ ସମସ୍ତ ଟଙ୍କା ହଡ଼ପ ହୋଇଥିବା ଲୋକାୟୁକ୍ତଙ୍କ ନିକଟରେ ଅଭିଯୋଗ ହୋଇଥିଲା। ଘଟଣାର ତଦନ୍ତ ପାଇଁ ଲୋକାୟୁକ୍ତଙ୍କ ନିଜସ୍ବ ତଦନ୍ତକାରୀ ସଂସ୍ଥା ଡାଇରେକ୍ଟର ଅଫ ଇନ୍କ୍ୱାରି ତଦନ୍ତ କରି ରିପୋର୍ଟ ପ୍ରଦାନ କରିଥିଲା। ତେବେ ଏହି ତଦନ୍ତରେ ଲୋକାୟୁକ୍ତ ଅସନ୍ତୋଷ ପ୍ରକଟ କରିଥିଲେ। ପରେ ଲୋକାୟୁକ୍ତଙ୍କ ନିର୍ଦ୍ଦେଶରେ ଭିଜିଲାନ୍ସ ଟିମ୍ ଏହି ମାମଲାର ତଦନ୍ତ କରି ବ୍ଲକର ତତ୍କାଳୀନ ସହକାରୀ ଯନ୍ତ୍ରୀ ପ୍ରଶାନ୍ତ କୁମାର ମହାନ୍ତି, କନିଷ୍ଠ ଯନ୍ତ୍ରୀ ବ୍ରହ୍ମାନନ୍ଦ ପଣ୍ଡା, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ମହେଶ୍ୱର ମହାନ୍ତି, ତତ୍କାଳୀନ ସରପଞ୍ଚ ସୁଶାନ୍ତ ସେଠୀଙ୍କ ବିରୋଧରେ ବିଭିନ୍ନ ସଙ୍ଗିନ ଦଫା ଲଗାଇ ଏକ ମାମଲା ରୁଜି କରିଛି। ସେହିପରି ଗଙ୍ଗାଧରପୁର ପଞ୍ଚାୟତ ଇମାମନଗର ଗ୍ରାମର ଅକ୍ଷୟ କୁମାର ପାଳଙ୍କ ଘରଠାରୁ ସୁନାକର ରାଉତଙ୍କ ଘର ପର୍ଯ୍ୟନ୍ତ ମାଟି ରାସ୍ତା ନିର୍ମାଣ ପାଇଁ ଏମ୍ଜିଏନ୍ଆର୍ଇଜିଏସ୍ରେ ୨୦-୨୧ ଆର୍ଥତ୍କ ବର୍ଷରେ ସାମିଲ କରାଯାଇଥିଲା। ୫୦୦ ମିଟର ରାସ୍ତା ପାଇଁ ୫ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା। ଏହି ରାସ୍ତା ନିର୍ମାଣରେ ୨ ଲକ୍ଷ ୯୪ ହଜାର ୩୩୬ ଟଙ୍କା ବିଲ୍ କରାଯାଇଥିବାବେଳେ ବାସ୍ତବ କ୍ଷେତ୍ରରେ ମାତ୍ର ୨୩୯.୬୩ କ୍ୟୁବିକ ମାଟି ପକାଯାଇ ୪୧ ହଜାର ୭୨୨ ଟଙ୍କା ଖର୍ଚ୍ଚ କରି ସ୍ବଚ୍ଛଳ ବର୍ଗ ବ୍ୟକ୍ତିଙ୍କ ନାମରେ ଜବ୍ କାର୍ଡ ଜରିଆରେ ୨ ଲକ୍ଷ ୫୨ ହଜାର ୬୧୪ ଟଙ୍କା ହଡ଼ପ କରାଯାଇଥିବା ତଦନ୍ତ ପରେ ଧରା ପଡ଼ିଥିଲା। ଭିଜିଲାନ୍ସ ଲୋକାୟୁକ୍ତଙ୍କ ନିର୍ଦ୍ଦେଶକ୍ରମେ ଗଙ୍ଗାଧରପୁର ପଞ୍ଚାୟତ ତତ୍କାଳୀନ ସରପଞ୍ଚ ରୀନା ମଲ୍ଲିକ, ସହକାରୀ ଯନ୍ତ୍ରୀ ଯତୀନ୍ଦ୍ର ମୋହନ ସ୍ବାଇଁ, କନିଷ୍ଠ ଯନ୍ତ୍ରୀ ପ୍ରଶାନ୍ତି ଗଡ଼ନାୟକ, ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ନିର୍ମଳ ଚନ୍ଦ୍ର ପଣ୍ଡା ଓ ଗ୍ରାମ ରୋଜଗାର ସେବକ ଚିନ୍ମୟୀ କରଙ୍କ ନାମରେ ମଧ୍ୟ ଫୌଜଦାରି ମାମଲା ରୁଜୁ କରିଛି। ଏହି ଦୁଇଟି କାର୍ଯ୍ୟରେ ବ୍ୟାପକ ଦୁର୍ନୀତି ହୋଇଥିବା ନେଇ ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରା ଲୋକାୟୁକ୍ତଙ୍କ ଦ୍ୱାରସ୍ଥ ହୋଇଥିଲେ। ତଦନ୍ତ ନେଇ ଅଧିକାରୀମାନେ କୌଣସି ପ୍ରତିକ୍ରିୟା ଦେଇନାହାନ୍ତି। କିଛିଦିନ ତଳେ ଭିଜିଲାନ୍ସ ବିଭାଗ ପକ୍ଷରୁ ଏକ ଟିମ୍ ଉଭୟ ସ୍ଥାନକୁ ଆସି ତଦନ୍ତ କରିଥିଲା।
