ନୟାଗଡ଼ ଅଫିସ/ଓଡ଼ଗାଁ,୩ା୩(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ବ୍ଲକ ବରସାହି ପଞ୍ଚାୟତ ସିଙ୍ଗାରପୁର ଗାଁରେ ପ୍ରଧାନମନ୍ତ୍ରୀ ଆବାସ ଯୋଜନାରେ ମିଥ୍ୟା ସତ୍ୟପାଠରେ ଜାଲିଆତି କରାଯାଇଥିବା ପ୍ରାଥମିକ ତଦନ୍ତରୁ ଜଣାପଡିଛି। ଜଣକ ନାଁରେ ଆସିଥିବା ଆବାସ କାର୍ଯ୍ୟାଦେଶକୁ ଅନ୍ୟ ଜଣଙ୍କୁ ଦେଇ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ) ଓ ଗ୍ରାମ ରୋଜଗାର ସେବକ (ଜିଆରଏସ୍) ଫସିବାକୁ ଯାଉଛନ୍ତି। ତେବେ ପୂର୍ବତନ ସରପଞ୍ଚଙ୍କ ନାଁ ଜାଲିଆତିରେ ଆସୁଥିବାବେଳେ ସରକାରୀ ଭାବେ ପ୍ରମାଣ ଅଭାବରୁ ସେ ଖସି ଯାଇପାରନ୍ତି ବୋଲି ଜଣାପଡୁଛି। ଅନ୍ୟପକ୍ଷେ ସାର୍ଟିଫିକେଟ କେସ୍ କରାଯାଇ ଫର୍ଜରୀ କରି ହାତେଇଥିବା ଅନୁଦାନକୁ ସରକାର ଆଦାୟ କରିବେ। ଏଥିପାଇଁ ବ୍ଲକ ପ୍ରଶାସନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି। ତେବେ ସିଙ୍ଗାରପୁରରେ ଆବାସ ଯୋଜନାରେ ଘର ନ ଥାଇ ମରାମତି ପାଇଁ ୩ ହଜାର ଟଙ୍କା ଆସିବା ପରେ ଜାଲିଆତି ପଦାରେ ପଡିଛି।
ସିଙ୍ଗାରପୁର ଗାଁର ଗୀତା ନାୟକ ଅଭିଯୋଗ ଅନୁସାରେ, ମୋ ସ୍ବାମୀ ଗଣେଶଙ୍କୁ ଆବାସ ଯୋଜନାରେ କାର୍ଯ୍ୟାଦେଶ ମିଳିନି। ତେବେ ଆବାସ ଯୋଜନାରେ ଘର ମରାମତି ପାଇଁ ୩ ହଜାର ଟଙ୍କା କିପରି ଆସିଛି। ମୋ ପରିବାରର କୌଣସି ଲୋକ ସିଙ୍ଗାରପୁରରେ ରହୁନାହୁଁ। ଅର୍ଥ ଅଭାବ ଯୋଗୁ ଚାଳ ଛପର କରି ନ ପାରିବାରୁ ଘର ଭାଙ୍ଗିଗଲା। ପ୍ରାୟ ୮ ବର୍ଷ ହେଲାଣି ଗାଁ ଛାଡିଲୁଣି। ତେବେ ୨୦୧୬-୧୭ ଆର୍ଥିକ ବର୍ଷରେ ମୋ ସ୍ବାମୀଙ୍କ ନାଁରେ ଆବାସ କାର୍ଯ୍ୟାଦେଶରେ ଘର କିପରି କରାଗଲା। ଏଣୁ ଆବାସ ଯୋଜନାରେ ଜାଲିଆତି କରି ଘର ଚୋରି କରାଯାଇଛି ବୋଲି ଓଡ଼ଗାଁ ବିଡିଓଙ୍କ ନିକଟରେ ଅଭିଯୋଗ ହୋଇଥିଲା। ଏ ସମ୍ପର୍କରେ ଫେବୃୟାରୀ ୨୮ରେ ଧରିତ୍ରୀରେ ଖବର ପ୍ରକାଶ ପାଇଥିଲା। ପରେ ବିଡିଓ ଏହାର ତଦନ୍ତ ନିର୍ଦ୍ଦେଶ ଦେଇଥିଲେ। ତଦନ୍ତ ରିପୋର୍ଟ ଆସିବା ପରେ ଆବାସ ଯୋଜନା ଜାଲିଆତିର ଗୁମର ଖୋଲିଛି। ଏ ନେଇ ଓଡ଼ଗାଁ ବିଡିଓ ସନ୍ତୋଷ କୁମାର ଜେନା କୁହନ୍ତି, ସିଙ୍ଗାରପୁର ଆବାସ ଯୋଜନା ଦୁର୍ନୀତି ଘଟଣାରେ ତତ୍କାଳୀନ ସରପଞ୍ଚ, ପିଇଓ, ଗ୍ରାମ୍ୟ ରୋଜଗାର ସେବକଙ୍କ ଭୂମିକା ରହିଥିବା ତଦନ୍ତରୁ ଜଣାପଡିଛି। ତେବେ ବ୍ୟାଙ୍କରେ କେଉଁ କାଗଜାତ ଦାଖଲ କରାଯାଇ ଦୁର୍ନୀତି ହୋଇଛି ସେନେଇ କାଗଜାତ ବ୍ୟାଙ୍କକୁ ମଗାଯାଇଛି। ବ୍ୟାଙ୍କରୁ କାଗଜାତ ଆସିବା ପରେ ଜାତିଆତି କରି ହଡ଼ପ ହୋଇଥିବା ଅନୁଦାନ ଟଙ୍କାକୁ ସାର୍ଟଫିକେଟ କେସ୍ କରି ଆଦାୟ କରାଯିବ। ଅଭିଯୋଗକାରୀ ଗୀତାଙ୍କ ସ୍ବାମୀ ଗଣେଶଙ୍କ କାର୍ଯ୍ୟାଦେଶକୁ ସେହି ଗାଁର ଅନ୍ୟ ଜଣେ ଗଣେଶ ନାୟକ ମିଥ୍ୟା ସତ୍ୟପାଠ କରି ହଡ଼ପ କରିଛନ୍ତି। ଅନ୍ୟପକ୍ଷେ ପିଇଓ ଓ ଜିଆରଏସ୍ଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଜିଲା ପରିଷଦର ନିର୍ବାହୀ ଅଧିକାରୀଙ୍କୁ ଅବଗତ କରାଯିବ ବୋଲି ସେ କହିଛନ୍ତି।
