ଯାତାୟାତର ଏକ ବଡ଼ ମାଧ୍ୟମ ହେଉଛି ଟ୍ରେନ୍। ଯେକୌଣସି ଦେଶ ହେଉନା କାହିଁକି ରେଳ ଧାରଣା ଉପରେ ଚାଲୁଥିବା ଏହି ଟ୍ରେନ୍ ସବୁଠି ଏକ ଶସ୍ତା ଓ ସୁଗମ ଯାତାୟାତର ମାଧ୍ୟମ ଭାବେ ପରିଚିତ। ଆଜିକାଲି ବିଭିନ୍ନ ବିଶେଷତ୍ୱ ଥିବା ଟ୍ରେନ୍ ଚାଲୁଛି। କାହାର ସ୍ପିଡ୍ ଅଧିକ ତ କେଉଁ ଟ୍ରେନ୍ ପାହାଡ଼ିଆ ଅଞ୍ଚଳରେ ଯାଏ। କେଉଁ ଟ୍ରେନ୍ ହୋଇଥାଏ ବହୁତ ଲକ୍ଜୁରିୟସ୍। ତେବେ ଜାଣନ୍ତିକି ଏମିତି ବି ଏକ ଟ୍ରେନ୍ ଅଛି, ଯାହା ତା’ର ଟ୍ରାକ୍ ଉପରେ ନ ଯାଇ, ଯାଇଥାଏ ରେଳଧାରଣାର ତଳଭାଗରେ ଝୁଲନ୍ତା ଅବସ୍ଥାରେ। ଆଉ ଏଇ ଅଜବ ଟ୍ରେନ୍ ଜର୍ମାନୀରେ ଦେଖିବାକୁ ମିଳେ। ଏଥିରେ ଯାତ୍ରା କରିବାର ମଜା ଅଲଗା। ଏହାକୁ ଦେଖିଲେ ମନରେ ଆସେ ଏଇ ଝୁଲନ୍ତା ଟ୍ରେନ୍ ଖସି ପଡ଼ିବନି ତ! ହେଲେ ଏଥିରେ ଯାତ୍ରା କରିବା ଯେତିକି ନିରାପଦ ସେତିକି ମଜାଦାର ମଧ୍ୟ। ସେଇଥିପାଇଁ ବିଭିନ୍ନ ସ୍ଥାନରୁ ପର୍ଯ୍ୟଟକ ଆସନ୍ତି ଏହି ଓଲ୍ଟା ପୋଲ୍ଟା ଟ୍ରେନ୍ରେ ବସି ଭିନ୍ନ ଏକ ଅନୁଭବ ସାଉଁଟିବା ପାଇଁ। ଜର୍ମାନୀର ଏହି ଟ୍ରାକ୍ ଓ ଟ୍ରେନ୍ ତିଆରି ହେବାର ୧୨୧ ବର୍ଷ ହୋଇଗଲାଣି। ଉକ୍ତ ଟ୍ରେନ୍ ୧୯୦୧ରେ ଆରମ୍ଭ ହୋଇଥିଲା। ତେବେ ଏଭଳି ରେଳପଥ ନିର୍ମାଣ କରିବା ପଛର କାରଣ ହେଉଛି, ଏହି ଟ୍ରେନ୍ର ରୁଟ୍ ଆରମ୍ଭ ହେବା ପୂର୍ବରୁ ହିଁ ସହର ବହୁତ ଡେଭେଲପ୍ ହୋଇସାରିଥିଲା। ତେଣୁ ଟ୍ରାକ୍ କରିବା ଲାଗି ସ୍ଥାନ ନ ଥିଲା। ଶେଷରେ ରେଳ ଟ୍ରାକ୍ ଭୂମିରେ ନ କରି ବ୍ରିଜ୍ ପରି ନର୍ମାଣ କରି ଝୁଲନ୍ତା ଅବସ୍ଥାରେ ଟ୍ରେନ୍ ଯିବାର ଯୋଜନା କରାଗଲା। ୧୩.୩ କିମିର ଉକ୍ତ ଟ୍ରେନ୍ ରୁଟ୍ରେ ଟ୍ରେନ୍ଟି ଝୁଲନ୍ତା ଅବସ୍ଥାରେ ନଦୀ, ଝରଣା, ରାସ୍ତା ଆଦି ଅତିକ୍ରମ କରି ଯାଇଥାଏ। ଆଉ ପର୍ଯ୍ୟଟକ ଏହାର ବେଶ୍ ମଜା ଉଠାଇଥାନ୍ତି।
