ରଘୁନାଥପୁର, ୮।୭(ରାଜେନ୍ଦ୍ର ନାରାୟଣ ସିଂହ): ବିଦ୍ୟୁତ୍ ସମସ୍ୟା ପ୍ରତିବାଦରେ ୭ ଦଫା ଦାବି ନେଇ ରଘୁନାଥପୁରର ଟିପିସିଓଡିଏଲ କାର୍ଯ୍ୟାଳୟକୁ ଶୁକ୍ରବାର ସ୍ଥାନୀୟ ବିଦ୍ୟୁତ୍ ଉପଭୋକ୍ତା ସଂଘ ପକ୍ଷରୁ ଘେରାଉ କରାଯାଇଛି। ସଂଘ ସଭାପତି ରଞ୍ଜନ କୁମାର ମହାନ୍ତି ଓ ସମ୍ପାଦକ ଗୋବିନ୍ଦ ଜେନା ଏହାର ନେତୃତ୍ୱ ନେଇଥିଲେ। ଆଗାମୀ ୧୫ ଦିନ ମଧ୍ୟରେ କୌଣସି ପ୍ରତିକାର କରା ନ ଗଲେ ବାଧ୍ୟହୋଇ ରାଜରାସ୍ତାକୁ ଓଲ୍ହାଇବାକୁ ସେମାନେ ଚେତାବନୀ ଦେଇଛନ୍ତି। ଏନେଇ ଟିପିସିଓଡିଏଲ କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା କରାଯାଇ ସଂଘ ପକ୍ଷରୁ ଏସ୍ଡିଓଙ୍କ ଅନୁପସ୍ଥିତିରେ ଯନ୍ତ୍ରୀ ହୃଷିକେଶ ଦାସଙ୍କୁ ଲିଖିତ ଅବଗତ କରାଯିବା ସହ ଏସ୍ଇ ପାରାଦୀପ, ଶକ୍ତିମନ୍ତ୍ରୀ ଓ ସଚିବ ଏବଂ ୫-ଟି ସଚିବଙ୍କୁ ଡାକଯୋଗେ ଲିଖିତ ଅଭିଯୋଗ ପ୍ରେରଣ କରାଯାଇଛି। ଏହି ଅବସରରେ ସଂଘ କର୍ମକର୍ତ୍ତା ବିନୋଦ ବିହାରୀ ମହାନ୍ତି କହିଛନ୍ତି, ରଘୁନାଥପୁର ଅଞ୍ଚଳରେ ଲୋଭୋଲ୍ଟେଜ ଓ ଅଘୋଷିତ ବିଦୁତ କାଟ ଏକ ଚିରନ୍ତନ ସମସ୍ୟା। ଏହାଛଡା ୧୧ ଓ ୩୩ କେଭି ଲାଇନ ମେଣ୍ଟେନାନ୍ସ ଆଳରେ ମନମୁଖୀଭାବେ ବିଦୁତ ସଂଯୋଗ କଟାଯାଉଛି। ଦୀର୍ଘବର୍ଷ ତଳୁ ରଘୁନାଥପୁର ଅଞ୍ଚଳରେ ଏକ ବିଦୁତ ଷ୍ଟ୍ରକ୍ଚର ନିର୍ମାଣ ପାଇଁ ଦାବି ହୋଇ ଆସୁଥିଲେ ସୁଧା ସରକାର ଏହାକୁ କର୍ଣ୍ଣପାତ କରୁନାହାନ୍ତି ବୋଲି ସାମାଜିକ କର୍ମୀ ସରିତ ମହାପାତ୍ର କହିଛନ୍ତି। ସେହିପରି ସୌଭାଗ୍ୟ ଯୋଜନାରେ ଅନ୍ତର୍ଭୁକ୍ତ ହୋଇ ମଧ୍ୟ ଅଧିକାଂଶ ଲୋକ ବିଦ୍ୟୁତ ସଂଯୋଗରୁ ବଞ୍ଚିତ ହୋଇଛନ୍ତି। ଏହାଛଡା ଟ୍ରାନ୍ସଫର୍ମରଗୁଡ଼ିକ ମଧ୍ୟ କାର୍ଯ୍ୟକ୍ଷମ ହୋଇପାରି ନାହିଁ ବୋଲି ଅଭୟ ସାମନ୍ତରାୟ ପ୍ରକାଶ କରିଛନ୍ତି। ସେହିପରି ଠିକ ସମୟରେ ମିଟର ରିଡିଂ କରା ନ ଯାଇ ମନଇଚ୍ଛା କରାଯାଉଛି ବୋଲି ରାଜେଶ କୁମାର ସ୍ବାଇଁ ଓ ଜଗନ୍ନାଥ ମହାପାତ୍ର ଅଭିଯୋଗ କରିଛନ୍ତି। ଦୀର୍ଘବର୍ଷ ଧରି ଦାୟିତ୍ୱରେ ଥିବା ଅଧିକାରୀ ଓ କେତେଜଣ କର୍ମଚାରୀ ଗୋଟିଏ ସ୍ଥାନରେ ରହି ନିଜର ଆସନକୁ ମଜବୁତ କରିବା ସହ ଲୋକଙ୍କ ଅଭିଯୋଗକୁ ଅଣଦେଖା କରୁଛନ୍ତି ବୋଲି ଅଭିଯୋଗ ହୋଇଥିଲା। ଏନେଇ କାର୍ଯ୍ୟାନୁଷ୍ଠାନ ନେବା ସହ ଅନ୍ୟାନ୍ୟ ସମସ୍ୟା ସମାଧାନ ଲାଗି ପଦକ୍ଷେପ ନେବାକୁ ଦାବ କରାଯାଇଛି। ଏହି ପ୍ରତିବାଦ ସଭାରେ ଚନ୍ଦ୍ରଶେଖର ସିଂହ, ପୂର୍ଣ୍ଣଚନ୍ଦ୍ର ସ୍ବାଇଁ, ଅରୁଣ ସ୍ବାଇଁ, ନାରଣ ସିଂହ, ଉତ୍ତମ ବେହୁରା, ପ୍ରମୁଖ ଉପସ୍ଥିତ ଥିଲେ।
