ବାରିପଦା ଅଫିସ,୨୭।୧୧: ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟରେ ଶୁକ୍ରବାରଠାରୁ ବାଘ ଗଣନା ଆରମ୍ଭ ହୋଇଛି। ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଏମ୍ ଜଗଜୟାନନ୍ଦଙ୍କ ନେତୃତ୍ୱରେ ଉତ୍ତର ଓ ଦକ୍ଷିଣ ଡିଭିଜନରେ ଥିବା ରେଞ୍ଜ ଅଫିସରମାନେ ଗଣନା କାର୍ଯ୍ୟରେ ସାମିଲ ହୋଇଛନ୍ତି। ୧୭୪ ଷ୍ଟେଶନ ମାଧ୍ୟମରେ ମୋଟ ୮୮୦ କର୍ମଚାରୀ ଏଥିର ସହଯୋଗ କରୁଛନ୍ତି। ନୂଆ ଟେକ୍ନୋଲୋଜି ବ୍ୟବହାର ପୂର୍ବକ ବିକଶିତ ମୋବାଇଲ ଆପ ମାଧ୍ୟମରେ ଏଥର ବିନା କାଗଜ କଲମରେ ଗଣନା କରାଯାଉଛି। ଡିସେମ୍ବର ୫ ପର୍ଯ୍ୟନ୍ତ ୧୦ ଦିନ ଧରି ଏହି ଗଣନା ଚାଲିବ।
ବାଘ ସହିତ ସମସ୍ତ ବନ୍ୟପ୍ରାଣୀଙ୍କ ସଂଖ୍ୟା, ଶିକାରର ଘନତା, ହାତୀ ସଂଖ୍ୟା ଆକଳନ ଓ ସେମାନଙ୍କ ବାସସ୍ଥାନ ଆଦି ସର୍ବେକ୍ଷଣ କରାଯାଉଛି। ସେହିପରି କାର୍ନିଭୋର ସାଇନ ସର୍ଭେ, ଟ୍ରାନ୍ସେକ୍ଟ ସର୍ଭେ, ହାବିଚାଟ ପ୍ଲଟ ସର୍ଭେ, ପେଲେଟ ସର୍ଭେ, ଶାଗୁଣା ଓ ଅନ୍ୟାନ୍ୟ ପକ୍ଷୀଙ୍କ ସର୍ଭେ ପାଇଁ ବିଭିନ୍ନ ସ୍ଥାନରେ ଅତ୍ୟାଧୁନିକ ୫ଶହ କ୍ୟାମେରା ଲଗାଯାଇଛି। ପ୍ରଥମ ଦିନରେ ଏକ କଲରାପତରିଆ ବାଘକୁ ଠାବ କରାଯାଇଥିବା ନେଇ ବିଭାଗ ସୂଚନା ଦେଇଛି। ସର୍ବଭାରତୀୟ ବ୍ୟାଘ୍ର ଗଣନା(ଆକଳନ) କାର୍ଯ୍ୟକ୍ରମ ୨୦୦୬ରୁ ଆରମ୍ଭ ହୋଇଥିବା ବେଳେ ଏହା ପ୍ରତି ୪ବର୍ଷକୁ ଚକ୍ର ହିସାବରେ ନିଆଯାଇ ପରିଚାଳିତ ହେଉଛି। ୨୦୨୨ ଜାନୁୟାରୀ ମାସରେ ପଞ୍ଚମ ଚକ୍ର ଗଣନା ବା ଆକଳନ ଅନ୍ତିମ କାର୍ଯ୍ୟକ୍ରମ ଶେଷ ହେବ। ସମସ୍ତ ସର୍ଭେ ତଥ୍ୟ ମିଶାଇ ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷ(ଏନ୍ଟିସିଏ) ଦ୍ୱାରା ୨୦୨୨ ଜୁଲାଇ ୨୯ ଗ୍ଲୋବାଲ ଟାଇଗର ଦିବସରେ ଗଣନାର ପୂର୍ଣ୍ଣାଙ୍ଗ ରିପୋର୍ଟ ପ୍ରକାଶ ପାଇବ ବୋଲି ଜଗଜୟାନନ୍ଦ କହିଛନ୍ତି।
