ଜୟପୁର,୨୯।୫(ପବନ ପାଣିଗ୍ରାହୀ): ହିତାଧିକାରୀଙ୍କୁ ବିଭିନ୍ନ ସରକାରୀ ଯୋଜନାର ଅର୍ଥ ସହ ନିଶ୍ଚିତ କର୍ମନିଯୁକ୍ତ ଯୋଜନାର ଜମା ଟଙ୍କାକୁ ଆତ୍ମସାତ ଘଟଣାରେ ପୋଷ୍ଟମାଷ୍ଟରଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯାଇଛି। ଏହି ଘଟଣାରେ ନବରଙ୍ଗପୁର ଜିଲା ଝରିଗାଁ ସବପୋଷ୍ଟ ଅଫିସର ତତ୍କାଳୀନ ପୋଷ୍ଟମାଷ୍ଟର ଗୌରାଙ୍ଗ ସରକାରଙ୍କୁ ନିଲମ୍ବିତ କରିଛନ୍ତି ଜୟପୁର ଡିଭିଜନର ବରିଷ୍ଠ ଡାକ ଅଧିକ୍ଷକ ସତ୍ୟବାଦୀ ବିଶାଳ।
ସୂଚନା ଅନୁସାରେ, ହିତାଧିକାରୀଙ୍କ ଲକ୍ଷାଧିକ ଟଙ୍କା ଜମା ଖାତାରୁ ଚଞ୍ଚକତା କରି ଅନ୍ୟତ୍ର ଜମା କରି ଟଙ୍କା ଲୁଟ କରିଥିବା ସମ୍ପୃକ୍ତ ପୋଷ୍ଟମାଷ୍ଟରଙ୍କ ନାଁରେ ଅଭିଯୋଗ କରିଥିଲେ। ଏପରିକି ପୂର୍ବତନ ଏମ୍ପି ତଥା ବରିଷ୍ଠ ବିଜେଡି ନେତା ପ୍ରଦୀପ ମାଝୀ ଓ ବରିଷ୍ଠ ବିଜେଡି ନେତା ରବିନାରାୟଣ ନନ୍ଦ କୋରାପୁଟ ଜିଲାରେ ୫୦ କୋଟିର ନିଶ୍ଚିତ କର୍ମନିଯୁକ୍ତ ଯୋଜନାରେ ଟଙ୍କା ସହ ଅନ୍ୟାନ୍ୟ ସରକାରୀ ଯୋଜନାର ଡିବିଟି ପାଣ୍ଠିର ଆତ୍ମସାତ କରିଥିବା ଅଭିଯୋଗ କରିଥିଲେ।
ଅଭିଯୋଗ ଅନୁଯାୟୀ ଜୟପୁର ଡାକ ଡିଭିଜନ ଅଧୀନରେ ନବରଙ୍ଗପୁର ଜିଲାର ଝରିଗାଁ, କୋଡିଙ୍ଗା, ଡାବୁଗାଁ ତିନି ପୋଷ୍ଟ ଅଫିସରେ ଏନଆରଇଜିଏସ ଭଳି ଅନେକ ସରକାରୀ ସହାୟତା ରାଶିର ଦୁରୁପଯୋଗ କରି ଗରିବଙ୍କ ଟଙ୍କା ଠକି ନେଇଥିଲେ ଖୋଦ ବିଭାଗୀୟ ଅଧିକାରୀ। ଏପରି ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଥିଲା ଡାକବିଭାଗ। ସେପଟେ ଘଟଣାରେ ଅନ୍ୟ ଦୁଇ ପୋଷ୍ଟମାଷ୍ଟରଙ୍କ ବିରୋଧରେ ତଦନ୍ତ ଚାଲିଛି।
Dharitri – Odisha’s No.1 Odia Daily
