ନୂଆଦିଲ୍ଲୀ,୧୨।୧: ତାମିଲନାଡୁରେ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଏବଂ ରାଜ୍ୟପାଳ ଆର.ଏନ ରବିଙ୍କ ମଧ୍ୟରେ ତିକ୍ତତା ବଢିବାରେ ଲାଗିଛି। ରାଜ୍ୟପାଳ ରବିଙ୍କ ସମ୍ପର୍କରେ ଏକ ଚିଠି ସରକାରଙ୍କ ତରଫରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପ୍ରଦାନ କରାଯାଇଛି। ତେବେ ଏହି ଚିଠିରେ କ’ଣ ଅଛି ତାହା ପ୍ରକାଶ କରାଯାଇ ନାହିଁ।
ଡିଏମକେ ଏମ୍ପି ଟିଆର ବାଲୁ କହିଛନ୍ତି, ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ଦ୍ୱାରା ଲିଖିତ ଚିଠିକୁ ରାଜ୍ୟ ଆଇନ ମନ୍ତ୍ରୀ ଏସ ରଘୁପତି ରାଷ୍ଟ୍ରପତିଙ୍କୁ ପ୍ରଦାନ କରିଛନ୍ତି। ତାମିଲନାଡୁ ମୁଖ୍ୟମନ୍ତ୍ରୀ ଚିଠିରେ ଯାହା ଲେଖିଛନ୍ତି, ରାଷ୍ଟ୍ରପତିଙ୍କୁ ଏ ବିଷୟରେ ଅବଗତ କରାଯାଇଛି। ରାଜ୍ୟପାଳ ବିଧାନସଭାରେ ଯାହା କରିଥିଲେ, ତାହା ଗୃହର ସାମ୍ବିଧାନିକ ବ୍ୟବସ୍ଥା ଏବଂ ନିୟମ ବିରୁଦ୍ଧ ଅଟେ।
ରାଜ୍ୟପାଳ ବିଧାନସଭା ଅଧିବେଶନରେ ତାଙ୍କ ଅଭିଭାଷଣରେ କିଛି ଗୁରୁତ୍ୱପୂର୍ଣ୍ଣ ଅଂଶ ଛାଡିଥିଲେ। ଏହି ଅଭିଭାଷଣକୁ ରାଜ୍ୟ ସରକାର ପ୍ରସ୍ତୁତ କରିଥିଲେ। ଏହା ପରେ ସିଏମ ଏମ.କେ ଷ୍ଟାଲିନ ଦୁଃଖ ପ୍ରକାଶ କରିଥିଲେ ଏବଂ ମୂଳ ଭାଷଣକୁ ରେକର୍ଡରେ ନେବାକୁ ଏକ ସଂକଳ୍ପ ପାରିତ କରିଥିଲେ। ଏହା ପରେ ରାଜ୍ୟପାଳ ଆର.ଏନ ରବି ଗୃହ ଛାଡି ବାହାରକୁ ପଳାଇଥିଲେ।
