ପୁରୀ ଅଫିସ, ୧୧ା୧୧: ଶ୍ରୀମନ୍ଦିରର ୮ ଦ୍ୱାର ରୁପା ଛାଉଣି ହେବ। ଜୟ ବିଜୟ, କଳାହାଟ, ବେହେରଣ, ସାତପାହାଚ, ପଶ୍ଚିମ ଭୋଗ ମଣ୍ଡପ, ନୃସିଂହ ମନ୍ଦିର, ମା’ ବିମଳା ଏବଂ ମା’ ମହାଲକ୍ଷ୍ମୀ ମନ୍ଦିରର ଗର୍ଭ ଦ୍ୱାରକୁ ରୁପା ଛାଉଣି କରାଯିବ। ସମସ୍ତ ଖର୍ଚ୍ଚ ଜଣେ ଦାତା ବହନ କରିବେ। ଏଥିପାଇଁ ଗଠିତ କମିଟିର ଦ୍ୱିତୀୟ ବୈଠକ ସୋମବାର ଅନୁଷ୍ଠିତ ହୋଇଥିଲା। ସେଥିରେ ଆଲୋଚନା ଅନୁଯାୟୀ, ରୁପା ଛାଉଣି ଡିଜାଇନ ନିମନ୍ତେ ମଙ୍ଗଳବାର ୧୦ ଜଣିଆ ଟିମ୍ ଶିଳ୍ପୀ ଗ୍ରାମ ରଘୁରାଜପୁର ଯାଇ ବିଭିନ୍ନ ଚିତ୍ରକଳା ଦେଖିଛନ୍ତି। ବିଭିନ୍ନ ଦ୍ୱାର କବାଟରେ କେଉଁ ପ୍ରକାର ଡିଜାଇନ୍ର ରୁପା ଛାଉଣି କରାଯିବ ପରଖିବା ସହ କେତେକ ପଟଚିତ୍ର ସଂଗ୍ରହ କରିଛନ୍ତି। ଏହାପରେ ଟିମ୍ ସଦସ୍ୟ ଶ୍ରୀମନ୍ଦିର ଯାଇ ଦ୍ୱାରଗୁଡ଼ିକୁ ଦେଖିଛନ୍ତି। ଶ୍ରୀମନ୍ଦିର ସଂସ୍କୃତି ଓ ପରମ୍ପରାକୁ ଅକ୍ଷୂର୍ଣ୍ଣ ରଖି କଳିଙ୍ଗ କଳା, ସ୍ଥାପତ୍ୟ ଆଧାରରେ ଡିଜାଇନ ଚୂଡ଼ାନ୍ତ କରାଯିବ ବୋଲି ସୂଚନା ମିଳିଛି।
କମିଟିର ଦ୍ୱିତୀୟ ବୈଠକରେ ରୁପା ଡିଜାଇନ ସଂକ୍ରାନ୍ତରେ କୌଣସି ନିଷ୍ପତ୍ତି ହୋଇପାରି ନ ଥିଲା। ତେଣୁ ମଙ୍ଗଳବାର ସ୍ବତନ୍ତ୍ର ଟିମ୍ର ସଦସ୍ୟମାନେ ପଟଚିତ୍ରର ଅନ୍ତୁଡ଼ିଶାଳ କୁହାଯାଉଥିବା ରଘୁରାଜପୁର ଗ୍ରାମକୁ ଯାଇ ବିଭିନ୍ନ ଚିତ୍ରକଳା ଦେଖିବା ସହ କେତେକ ଡିଜାଇନ ସଂଗ୍ରହ କରିଛନ୍ତି। ସେମାନେ ଶ୍ରୀଜଗନ୍ନାଥ ସଂସ୍କୃତି ଏବଂ କଳିଙ୍ଗ କଳା ସ୍ଥାପତ୍ୟକୁ ବହନ କରୁଥିବା ଶତଦଳ ପଦ୍ମ, ଓଲଟା ପଦ୍ମ, ଫୁଟା ପଦ୍ମ, ଅବର୍ଣ୍ଣନୀୟ ପଦ୍ମ ଓ ସହସ୍ରଦଳ ପଦ୍ମର ଡିଜାଇନ ସଂଗ୍ରହ କରିଛନ୍ତି। ଆସନ୍ତା ୧୯ ତାରିଖରେ କମିଟିର ତୃତୀୟ ବୈଠକ ବସିବ। ଏଥିରେ ଏହି ଡିଜାଇନଗୁଡ଼ିକ ଉପସ୍ଥାପନ କରାଯିବା ପରେ ଯାହାକିଛି ଚୂଡ଼ାନ୍ତ ନିଷ୍ପତ୍ତି ନିଆଯିବାର ସମ୍ଭାବନା ରହିଛି। ଏହି ଟିମ୍ରେ ଶ୍ରୀମନ୍ଦିର ପରିଚାଳନା କମିଟିର ୪ ସଦସ୍ୟ, ୨ ସେବାୟତ ଏବଂ ଦାତାଙ୍କ ପକ୍ଷରୁ ୪ଜଣ ପ୍ରତିନିଧି ସାମିଲ ଥିଲେ। ଉକ୍ତ ଟିମ୍ ଡିଜାଇନ ସଂଗ୍ରହ କରିଥିବାରୁ ପଟଚିତ୍ରଶିଳ୍ପୀଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି।
