କେନ୍ଦୁଝର,୧୪ା୫(ସ୍ବ.ପ୍ର.): ସାହାରପଡ଼ା ବ୍ଲକ ଅନ୍ତର୍ଗତ ବିଲା ରାମଚନ୍ଦ୍ରପୁର ସରକାରୀ ହାଇସ୍କୁଲର ମାଟ୍ରିକ ପରୀକ୍ଷା ଦାୟିତ୍ୱରେ ଥିବା କେନ୍ଦ୍ର ଅଧୀକ୍ଷକ ଏବଂ ଡେପୁଟି କେନ୍ଦ୍ର ଅଧୀକ୍ଷକଙ୍କୁ ଜଣେ ଅଭିଭାବକଙ୍କ ସମେତ ଅନ୍ୟମାନେ ୭ ତାରିଖରେ ପରୀକ୍ଷା ସରିବା ପରେ କେନ୍ଦ୍ର ବାହାରେ କାହିଁକି କପି ଦେଲ ନାହିଁ ବୋଲି କହି ଆକ୍ରମଣ କରିଥିଲେ। ଏହି ଘଟଣା ପରେ କେନ୍ଦ୍ର ଅଧୀକ୍ଷକ ଜ୍ୟୋତ୍ସ୍ନାରାଣୀ ସିଂ ଏବଂ ଡେପୁଟି କେନ୍ଦ୍ର ଅଧୀକ୍ଷକ ଚିତ୍ତରଞ୍ଜନ ସାହୁ ତୁରୁମୁଙ୍ଗା ଥାନାରେ ଏତଲା ଦେଇଥିଲେ। ଏତଲା ଆଧାରରେ ପୋଲିସ ଲୁଙ୍ଗା ଗ୍ରାମର ଅଜିତ୍ କୁମାର ବାରିକଙ୍କୁ ଗିରଫ କରିଥିବାବେଳେ ଅନ୍ୟମାନେ ଫେରାର ଅଛନ୍ତି। ଏହି ଘଟଣା ପରେ ବିଲା ରାମଚନ୍ଦ୍ରପୁର ହାଇସ୍କୁଲର ବିଜ୍ଞାନ (ସିବିଜେଡ) ଶିକ୍ଷୟିତ୍ରୀ ଜ୍ୟୋତ୍ସ୍ନାରାଣୀ ଏବଂ କଳା ଶିକ୍ଷକ ଚିତ୍ତରଞ୍ଜନ ଜିଲାପାଳ ଏବଂ ଜିଲା ଶିକ୍ଷାଧିକାରୀଙ୍କୁ ନିଜ ଜୀବନ ପ୍ରତି ବିପଦ ଥିବା ଦର୍ଶାଇ ଅଭିଯୋଗପତ୍ର ଦେଇ ଅନ୍ୟତ୍ର ବଦଳି ପାଇଁ ପ୍ରାର୍ଥନା କରିଥିଲେ। ଏହି ଆଧାରରେ ଜ୍ୟୋତ୍ସ୍ନାରାଣୀଙ୍କୁ ଫକୀରପୁର ହାଇସ୍କୁଲ ଏବଂ ଚିତ୍ତରଞ୍ଜନଙ୍କୁ ଘଟଗାଁ ବ୍ଲକ ହଳଧରପୁର ୟୁଜି ହାଇସ୍କୁଲକୁ ଡେପୁଟେଶନ କରାଯାଇଛି। ତେବେ ସେମାନଙ୍କୁ ଡେପୁଟେଶନରେ ପଠାଯିବା ଫଳରେ ରାମଚନ୍ଦ୍ରପୁର ସ୍କୁଲରେ ଶିକ୍ଷକ ସମସ୍ୟା ଦେଖାଦେଇଛି। ଏଣୁ ବଦଳି ନ କରି କାହିଁକି ଡେପୁଟେଶନରେ ପଠାଗଲା ଏବଂ ଉକ୍ତ ସ୍ଥାନରେ ଅନ୍ୟ ଦୁଇ ଜଣଙ୍କୁ ନିୟୋଜିତ କରା ନ ଗଲା ସେ ନେଇ ସ୍ଥାନୀୟ ଲୋକ ପ୍ରଶ୍ନ ଉଠାଇଛନ୍ତି। ଫଳରେ ଏନେଇ ପାଠପଢ଼ା ବ୍ୟାହତ ଆଶଙ୍କା କରି ଗ୍ରାମରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
