ପୁରୀ ଅଫିସ,୭ା୬:ପୁରୀ ଜିଲା ଅବକାରୀ ବିଭାଗର ମୋବାଇଲ ସ୍କ୍ବାଡ୍ ଇନ୍ସପେକ୍ଟର ସଞ୍ଜୟ କୁମାର ପଣ୍ଡା ଉଭୟ ପୁରୀ ପୋଲିସ ଓ ଜିଲା ଅବକାରୀ ଅଧୀକ୍ଷକଙ୍କ ବିରୋଧରେ ଦୁର୍ନୀତି ଅଭିଯୋଗ ଆଣିବା ପରେ ଏହି ଦୁଇ ବିଭାଗର ଭୂମିକା ସନ୍ଦେହ ଘେରକୁ ଆସିଛି। ଏଭଳି ସ୍ଥିତିରେ ଅଭିଯୋଗକାରୀ ଇନ୍ସପେକ୍ଟର ପଣ୍ଡାଙ୍କ ମୁଣ୍ଡ ଦୋଷ ଥିବା କହି ଅବକାରୀ ଅଧୀକ୍ଷକ ନିଜ ଉପରୁ ଦୋଷ ଛଡ଼ାଇବାକୁ ଚେଷ୍ଟା କରିବା ଘଟଣା ହଟଚମଟ ସୃଷ୍ଟି କରିଛି। ଅନ୍ୟପକ୍ଷରେ ସୋସିଆଲ ମିଡିଆରେ ପଣ୍ଡାଙ୍କ ନିର୍ଭୀକ ଅଧିକାରୀ ଛବି ଏବଂ ‘ଯିଏ ସତ କୁହେ ସେ ପାଗଳ’ ପୋଷ୍ଟ ଟ୍ରେଣ୍ଡ କରିବାରେ ଲାଗିଛି।
ରାଜ୍ୟ ଅବକାରୀ କମିଶନରଙ୍କୁ ଗତ ୪ ତାରିଖରେ ଚିଠି ଲେଖି ଇନ୍ସପେକ୍ଟର ପଣ୍ଡା ଅଭିଯୋଗ କରିଥିଲେ ଯେ, ଅବକାରୀ ବିଭାଗ ଚଢ଼ାଉ କରୁଛି, ମାତ୍ର ପୁରୀ ପୋଲିସ ନିଶାବେପାରୀଙ୍କଠାରୁ ଟଙ୍କା ନେଇ ସେମାନଙ୍କୁ ଛାଡ଼ିଦେଉଛି। ଫଳରେ ସେମାନେ ଅବକାରୀ ବିଭାଗକୁ ଡରୁନାହାନ୍ତି। ଅବକାରୀ ବିଭାଗରେ ପୋଲିସ ବିଭାଗର ହସ୍ତକ୍ଷେପ ବଢ଼ୁଛି। ସେହିଭଳି ସୀମିତ ସଂଖ୍ୟକ କର୍ମଚାରୀ, କମ୍ ଦରମା ସାଙ୍ଗକୁ କ୍ବାର୍ଟର୍ସ, ଗାଡ଼ି, ସରକାରୀ ପ୍ରୋତ୍ସାହନ କିମ୍ବା ମେଡାଲ କିଛି ନାହିଁ। ପୁରୀ ଅବକାରୀ ଅଧୀକ୍ଷକ ମଧ୍ୟ କୌଣସି କଥାକୁ ଗୁରୁତ୍ୱର ସହ ନେଉନାହାନ୍ତି ଓ ପୋଲିସର ହସ୍ତକ୍ଷେପକୁ ବିରୋଧ କରୁନାହାନ୍ତି ବୋଲି ପଣ୍ଡା ଅଭିଯୋଗ କରିଥିଲେ। ତେବେ ଏ ସମ୍ପର୍କରେ ଅବକାରୀ ଅଧୀକ୍ଷକ ଅମରେନ୍ଦ୍ର ଜେନା କହିଛନ୍ତି, ଗତ ୨ତାରିଖରେ ପ୍ରଥମ ଥର ପାଇଁ ପଣ୍ଡା ଯେଉଁ ପତ୍ର ଦେଇଥିଲେ ସେଥିରେ ମହିଳା କନଷ୍ଟେବଳ ନିଯୁକ୍ତି ଆବଶ୍ୟକ ଥିବା ଉଲ୍ଲେଖ ଥିଲା। ପୁରୀରେ ସବୁଠାରୁ ଅଧିକ ବ୍ରାଉନସୁଗାର ଜବତ ହେଉଛି। ନିକଟରେ ୪ କିଲୋ ବ୍ରାଉନସୁଗାର ଜବତ ହୋଇଥିଲା। ପୋଲିସକୁ ବଟି ଦେଇ ନିଶାବେପାରୀମାନେ କାର୍ଯ୍ୟ କରୁଥିବା ଅଭିଯୋଗ ସମ୍ପର୍କରେ ପଣ୍ଡା ମୋତେ ପୂର୍ବରୁ କେବେ ଅବଗତ କରାଇ ନାହାନ୍ତି। ଯଦି ଏଭଳି ଘଟଣା ତାଙ୍କ ନଜରରେ କେଉଁଠାରେ ଆସିଥିଲା, ତେବେ ମୋତେ କାହିଁକି ଜଣାଇଲେ ନାହିଁ। ନିଜ ଦୋଷ ଦୁର୍ବଳତାକୁ ଘୋଡ଼ାଇବା ପାଇଁ ଆଉ କାହା ଉପରେ ଦୋଷ ଲଦିବା କଥା ନୁହେଁ। ପଣ୍ଡାଙ୍କ ଅଭିଯୋଗର କୌଣସି ସତ୍ୟତା ନାହିଁ। ସେହିପରି ପୋଲିସ ଲାଞ୍ଚ ନେଉଥିବା ନେଇ ମୋ’ ପାଖରେ କୌଣସି ସୂଚନା ନାହିଁ। ପୋଲିସ ସହଯୋଗରେ କାମ ହେଉଛି। ପ୍ରତି ମାସରେ ପୋଲିସ ଓ ଅବକାରୀ ବିଭାଗ ପକ୍ଷରୁ ଯୁଗ୍ମ ତଦନ୍ତ କରାଯାଉଛି। ନିର୍ଦ୍ଦିଷ୍ଟ ପୋଲିସ କର୍ମଚାରୀଙ୍କ ବିରୋଧରେ ଅଭିଯୋଗ ଅଣାଯିବା କଥା। ସାମୂହିକ ଭାବେ ପୁରୀ ପୋଲିସକୁ ଦୋଷ ଦେବା ଉଚିତ୍ ହୋଇନାହିଁ। ଇନ୍ସପେକ୍ଟର ପଣ୍ଡା ମାନସିକ ରୋଗରେ ଆକ୍ରାନ୍ତ ହୋଇ ଔଷଧ ଖାଉଥିବା ତାଙ୍କ ଭଉଣୀ ଓ ସ୍ତ୍ରୀ ପୂର୍ବରୁ କହିଥିଲେ। ତେବେ ତାଙ୍କ ମାନସିକ ସ୍ଥିତି ସମ୍ପର୍କରେ ମୁଁ ସ୍ପଷ୍ଟ ଭାବେ କହିପାରିବି ନାହିଁ। ସେହିଭଳି ଗତ ୨ତାରିଖରେ ଜଣେ ମହିଳା ସବ୍ଇନ୍ସପେକ୍ଟର ତାଙ୍କ ବିରୋଧରେ ଦୁର୍ବ୍ୟବହାର ଅଭିଯୋଗ ଆଣିଥିଲେ ବୋଲି ଜେନା କହିଛନ୍ତି। ଅନ୍ୟପକ୍ଷରେ ଇନ୍ସପେକ୍ଟର ପଣ୍ଡା କହିଛନ୍ତି, ଅବକାରୀ ଅଧୀକ୍ଷକ ନିଜକୁ ବଞ୍ଚାଇବାକୁ ଯାଇ ମୋତେ ପାଗଳ ସଜାଉଛନ୍ତି। ସତ ସମସ୍ତଙ୍କ ସମ୍ମୁଖରେ ରହିଛି। ମୋର ମାନସିକ ସ୍ଥିତି ଖରାପ ଥିବା ସତ୍ତ୍ବେ ଏନେଇ କୌଣସି କାର୍ଯ୍ୟାନୁଷ୍ଠାନ ହୋଇ ନ ଥିଲା କାହିଁକି। ଏବେ ସତ କହିବା ପରେ ମୋତେ ପାଗଳ ସଜାଇବାକୁ ଚେଷ୍ଟା କରାଯାଉଛି। ଏନେଇ ପୁରୀ ଅତିରିକ୍ତ ଏସ୍ପି ମିହିର ପଣ୍ଡା କହିଛନ୍ତି, ଏଭଳି ଅଭିଯୋଗ ସମ୍ପର୍କରେ ମୋ’ ନିକଟରେ କିଛି ସୂଚନା ନାହିଁ। ପୋଲିସ କର୍ମଚାରୀ ଓ ଅଧିକାରୀମାନେ ଦୁର୍ନୀତିରେ ସାମିଲ ନୁହନ୍ତି। ପୁରୀ ପୋଲିସ ନିଷ୍ଠାପର ଭାବେ କାର୍ଯ୍ୟ ସମ୍ପାଦନ କରୁଛି। ସେହିପରି ରାଜ୍ୟ ଅବକାରୀ କମିଶନର ଆଶିଷ କୁମାର ସିଂ କହିଛନ୍ତି, ଏନେଇ ମୋ ନିକଟକୁ କୌଣସି ଚିଠି ଆସିନାହିଁ। ତେବେ ଗଣମାଧ୍ୟମରୁ ମୁଁ ଏ ବିଷୟରେ ଜାଣିବାକୁ ପାଇଛି। ଏହାକୁ ଆଧାର କରି ପୁରୀ ଜିଲାପାଳଙ୍କୁ ରିପୋର୍ଟ ମଗାଯିବ ବୋଲି ସେ ପ୍ରକାଶ କରିଛନ୍ତି। ଏହି ଘଟଣା ସମ୍ପର୍କରେ ଅନୁଧ୍ୟାନ କରାଯିବ ବୋଲି ଅବକାରୀ ମନ୍ତ୍ରୀ ଅଶ୍ୱିନୀ ପାତ୍ର କହିଛନ୍ତି।
ଅନ୍ୟପକ୍ଷରେ ପୁରୀବାସୀ ଇନ୍ସପେକ୍ଟର ପଣ୍ଡାଙ୍କୁ ଜଣେ ସ୍ବଚ୍ଛ ଓ ନିର୍ଭୀକ ଅଧିକାରୀ ବୋଲି ଦର୍ଶାଇ ସୋସିଆଲ୍ ମିଡ଼ିଆରେ ତାଙ୍କ ଫଟୋ ପୋଷ୍ଟ କରୁଛନ୍ତି। ନିଜେ ସରକାରୀ ଅଧିକାରୀ ହୋଇ ମଧ୍ୟ ପ୍ରଶାସନ ଉପରେ ପ୍ରଶ୍ନ ଉଠାଇବାର ସାହସ ତାଙ୍କର ଥିବାରୁ ତାଙ୍କୁ ଜଣେ ନିର୍ଭୀକ ଅଧିକାରୀ ଭାବେ ଚିତ୍ରଣ କରାଯାଉଛି। ‘ଯିଏ ସତ କୁହେ ସିଏ ପାଗଳ’ ବୋଲି ଲେଖି ସୋସିଆଲ ମିଡ଼ିଆରେ ପଣ୍ଡାଙ୍କୁ ସମର୍ଥନ କରାଯାଉଛି।
