ଜଳେଶ୍ୱର, ୨୮।୯(ଡି.ଏନ.ଏ.)-ଚଳିତବର୍ଷ ସୁବର୍ଣ୍ଣରେଖା ନଦୀରେ ୩ଥର ବନ୍ୟାପାଣି ଆସି ଉପକୂଳବର୍ତ୍ତୀ ଅଞ୍ଚଳରେ ପ୍ରଭୂତ କ୍ଷତି ଘଟିଛି। ବାଲେଶ୍ୱର ଜିଲା ଜଳେଶ୍ୱର ଅଞ୍ଚଳରେ ଥିବା ସୁବର୍ଣ୍ଣରେଖା ନଦୀବନ୍ଧର ୩ଟି ସ୍ଥାନରେ ଅତଡ଼ା ଖସୁଥିବା ନଜରକୁ ଆସିଛି। ନଦୀବନ୍ଧ ଏବେ ବିପଦସଙ୍କୁଳ ଅବସ୍ଥାରେ ଥିବା ଏଥିରୁ ସ୍ପଷ୍ଟ ହେଉଛି। ବନ୍ୟା ପୂର୍ବରୁ ଗୋଟିଏ ସ୍ଥାନର ମରାମତି ଲାଗି କାର୍ଯ୍ୟାଦେଶ ଦିଆଯାଇଥିବା ବେଳେ ଅନ୍ୟ ୨ଟିକୁ ରାଜ୍ୟର ଉଚ୍ଚ କ୍ଷମତାସମ୍ପନ୍ନ ବିଶେଷଜ୍ଞ ଦଳ ମଞ୍ଜୁରୀ ଦେଇଛନ୍ତି। ଏହା ମରାମତି ନ ହେଲେ ପରିସ୍ଥିତି ଜଟିଳ ହେବାର ଆଶଙ୍କା ରହିଛି ।
ଜଳେଶ୍ୱର ବ୍ଲକ ଅଧୀନ ସୁବର୍ଣ୍ଣରେଖା ନଦୀ ଦକ୍ଷିଣ ପାର୍ଶ୍ୱରେ ଥିବା ମାଳିପାଳଠାରେ ନଦୀବନ୍ଧ ମରାମତି ଲାଗି ୩୩ଲକ୍ଷ ୫୮ହଜାର ଟଙ୍କାର କାର୍ଯ୍ୟାଦେଶ ଦିଆଯାଇଥିଲେ ମଧ୍ୟ ତାହା ଆରମ୍ଭ ହୋଇନାହିଁ । ସେଠାରେ ନଦୀବନ୍ଧ ସୁରକ୍ଷା ଦିଆ ନ ଗଲେ ନଦୀର ପଶ୍ଚିମପଟେ ମହାବିଲା ଖାଳ ଗତି କରିଥିବାରୁ ନଦୀର ଗତିପଥ ପରିବର୍ତ୍ତନ ହେବାର ସମ୍ଭାବନା ରହିଛି। କିନ୍ତୁ କାର୍ଯ୍ୟ ଆରମ୍ଭ ହୋଇ ନ ଥିବାରୁ ବନ୍ୟା ବେଳେ ଲୋକେ ଭୟଭୀତ ଅବସ୍ଥାରେ କାଳାତିପାତ କରୁଛନ୍ତି । ସେହିପରି ନଦୀର ପୂର୍ବପଟେ ଜମାଳପୁର ନିକଟ ସାନରାଉତପଡ଼ାଠାରେ ସ୍ପର ଓ ପଥରପ୍ୟାକିଂ ଲାଗି ୬ କୋଟି ୬୬ ଲକ୍ଷ ୪୮ ହଜାର ଟଙ୍କାର ପ୍ରକଳ୍ପକୁ ଟିଏସି ଅନୁମୋଦନ କରିଛି। ସେହିପରି ବିରିଷପୁରଠାରେ ଅନ୍ୟ ଏକ ପ୍ରକଳ୍ପ ଲାଗି ୧୮କୋଟି ୩୧ଲକ୍ଷ ୨୪ହଜାର ଟଙ୍କାର ପ୍ରକଳ୍ପକୁ ଟିଏସି ଅନୁମୋଦନ କରିଥିଲେ ମଧ୍ୟ ୩ବର୍ଷ ଧରି ଅର୍ଥ ଅଭାବରୁ କାର୍ଯ୍ୟ ହୋଇପାରୁନାହିଁ। ଗତ ୫ଦିନ ତଳେ ଦେଖାଦେଇଥିବା ସୁବର୍ଣ୍ଣରେଖାରେ ବନ୍ୟା ଯୋଗୁ ଲକ୍ଷ୍ମଣନାଥ ନିକଟରେ ଉକ୍ତ ବନ୍ଧର ୨ଟି ସ୍ଥାନରେ ବଡ଼ ବଡ଼ ଅତଡ଼ା ଖସିଛି । ସୂଚନାଯୋଗ୍ୟ ୨୦୦୮ରେ ପ୍ରଳୟଙ୍କରୀ ବନ୍ୟାରେ ଏହି ବନ୍ଧ ବିଭିନ୍ନ ସ୍ଥାନରେ ଧୋଇଯିବା ପରେ ଏହାର ମରାମତି କରାଯାଇଥିଲା। ଏହି ବନ୍ଧକୁ ସୁଦୃଢ଼ କରାଯିବାକୁ ସ୍ଥାନୀୟ ଜନପ୍ରତିନିଧି ଓ ବୁଦ୍ଧିଜୀବୀମାନେ ଦାବି କରିଛନ୍ତି ।
