ପୁରୀ ଅଫିସ, ୧୨ା୪:ପୁରୀ ବାଲିଗୁଆଳିଠାରେ ସୋମବାର ଶ୍ରୀଜଗନ୍ନାଥ ମେଡିକାଲ କଲେଜର ଲୋକାର୍ପଣ ଉତ୍ସବରେ ଏହି କଲେଜର ପ୍ରଥମ ବର୍ଷର ଏମ୍ବିବିଏସ୍ ଛାତ୍ରୀଛାତ୍ର ଉପସ୍ଥିତ ଥିଲେ। ସେମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଆଲୋଚନା କରିଥିଲେ। ଏହି ଅବସରରେ କେତେଜଣ ଛାତ୍ର ନିଜ ସଂଘର୍ଷର କାହାଣୀ ବଖାଣିଥିଲେ। ବାଲେଶ୍ୱରର ରାଧାବଲ୍ଲଭ ବେହେରା କହିଛନ୍ତି, ତାଙ୍କ ବାପା ଜଣେ ଭାଗ ଚାଷୀ। ସରକାରୀ ବିଦ୍ୟାଳୟର ଛାତ୍ରୀଛାତ୍ରଙ୍କ ପାଇଁ ୧୫ ପ୍ରତିଶତ ସଂରକ୍ଷଣ ଆଧାରରେ ସେ ଶ୍ରୀଜଗନ୍ନାଥ ମେଡିକାଲ କଲେଜରେ ପାଠ ପଢ଼ିବାର ସୁଯୋଗ ପାଇପାରିଛନ୍ତି। ଏଥିପାଇଁ ସେ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି। ନିଷ୍ଠାପର ଭାବେ ଡାକ୍ତରୀ ଶିକ୍ଷା ସାରି ରାଜ୍ୟବାସୀଙ୍କ ସ୍ବାସ୍ଥ୍ୟ ସେବା କ୍ଷେତ୍ରରେ କାମ କରିବେ ବୋଲି ରାଧାବଲ୍ଳଭ କହିଛନ୍ତି। ସେହିପରି ମୟୂରଭଞ୍ଜ ଜିଲାରୁ ଆସିଥିବା ଭଟ୍ଟ ହେମ୍ବ୍ରମ୍ ମଧ୍ୟ ମୁଖ୍ୟମନ୍ତ୍ରୀଙ୍କୁ ନିଜ ପାଠପଢ଼ା ଜୀବନ ଓ ପରିବାରର ସଂଘର୍ଷ ସମ୍ପର୍କରେ କହିଛନ୍ତି। ସେ ଏକ ଅନୁନ୍ନତ ଅଞ୍ଚଳର ଗରିବ ଆଦିବାସୀ ଘରର ପିଲା। ତାଙ୍କ ମାତାପିତା ଦିନମଜୁରିଆ ଭାବେ କାମ କରି ପରିବାର ପ୍ରତିପୋଷଣ କରୁଛନ୍ତି। ପରିବାରର ୮ଜଣ ସଦସ୍ୟଙ୍କ ଭରଣପୋଷଣ ବୋଝ ତାଙ୍କ ମାତାପିତାଙ୍କ ପାଇଁ ଅସହ୍ୟ ହୋଇପଡ଼େ। ସେ ନିଜର ନିଷ୍ଠା ଓ ରାଜ୍ୟ ସରକାରଙ୍କ ସହଯୋଗରେ ମେଡିକାଲ କଲେଜରେ ଭର୍ତ୍ତି ହୋଇପାରିଛନ୍ତି। ଏଥିଲାଗି ସେ ରାଜ୍ୟ ସରକାରଙ୍କ ୧୫ ପ୍ରତିଶତ ସଂରକ୍ଷଣ ଯୋଜନାକୁ ପ୍ରଶଂସା କରିଛନ୍ତି। ଅପହଞ୍ଚ ଅଞ୍ଚଳର ଗରିବ ଓ ମେଧାବୀ ଛାତ୍ରୀଛାତ୍ର ମେଡିକାଲ କଲେଜରେ ପଢ଼ିବାର ସୁଯୋଗ ପାଇବା ତାଙ୍କ ପାଇଁ ଗର୍ବର କଥା ବୋଲି ପ୍ରତ୍ୟୁତ୍ତରରେ ମୁଖ୍ୟମନ୍ତ୍ରୀ କହିବା ସହ ସେମାନଙ୍କୁ ଶୁଭେଚ୍ଛା ଜଣାଇଥିଲେ।
