ରାଉରକେଲା,୪।୮(ସଙ୍ଗୀତା ଜେନା): ଇସ୍ପାତ ସହର ରାଉରକେଲାରେ ଲଗାଣ ବର୍ଷା ଜନଜୀବନକୁ ଅସ୍ତବ୍ୟସ୍ତ କରିପକାଇଛି। ବୁଧବାର ପ୍ରବଳ ବର୍ଷା ଯୋଗୁ ବିଭିନ୍ନ ଅଞ୍ଚଳ ଜଳାର୍ଣ୍ଣବ ହୋଇପଡିଥିଲା। ମନ୍ଦିରା ଡ୍ୟାମ୍ ୧୧ଟି ଗେଟ୍ ଖୋଲିଥିବା ବେଳେ ଉପରମୁଣ୍ଡରେ ଅତ୍ୟଧିକ ବର୍ଷା ଯୋଗୁ କୋଏଲ ଓ ବ୍ରାହ୍ମଣୀ ନଦୀର ଜଳସ୍ତର ବୃଦ୍ଧି ପାଇଛି। ଝାଡ଼ଖଣ୍ଡରୁ ଆସିଥିବା କୋଏଲ ଓ ଶଙ୍ଖ ନଦୀରେ ବନ୍ୟାଜଳ ପ୍ରବାହିତ ହେଉଛି। ଝାଡ଼ଖଣ୍ଡ ଉପରମୁଣ୍ଡରେ ବର୍ଷା ସହ ଡ୍ୟାମ୍ ତଥା ବ୍ୟାରେଜ ଗୁଡ଼ିକରୁ ବନ୍ୟାଜଳ ଛଡ଼ାଯାଇଥିବାରୁ ବନ୍ୟାପାଣି ବିଭିନ୍ନ ଅଞ୍ଚଳରେ ପଶିଛି। ଗୁରୁବାର ସକାଳୁ ସହରରେ ବର୍ଷାର ପ୍ରକୋପ କମ୍ ଥିବା ବେଳେ ବାଲୁଘାଟ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏଥିପାଇଁ ପଲପଲ ବସ୍ତି ସମେତ ଅନ୍ୟ ଅଞ୍ଚଳର ଲୋକଙ୍କୁ ସତର୍କ କରାଯାଇଛି। ଅପରପକ୍ଷେ ସ୍ଥାନୀୟ ଲୋକେ ବନ୍ୟାଜଳ ଦେଖିବାକୁ ଯିବା ସହ ମାଛ ମାରିବାର ମଜା ନେଉଥିବା ଦେଖାଯାଇଛି।
ପ୍ରଭାବିତ ଅଞ୍ଚଳରେ ରାଜନେତା
ରାଜନୈତିକ ବ୍ୟକ୍ତିଙ୍କ ପାଇଁ ବନ୍ୟା ଏକ ସୁଯୋଗ ଆଣିଛି । ଏହି କ୍ରମରେ ରଘୁନାଥପାଲିର ପ୍ରାକ୍ତନ ବିଧାୟକ ପ୍ରାର୍ଥୀ ପ୍ରଶାନ୍ତ ସେଠୀ ବୁଧବାର ଠାରୁ ସେକ୍ଟର-୨୦ ପମ୍ପ ହାଉସ ବସ୍ତି, କୋଏଲନଗର ଇଣ୍ଟର ବସ୍ତି ଆଦି ପରିଦର୍ଶନ କରିବା ସହ ସ୍ଥାନୀୟ ସମସ୍ୟା ସମାଧାନ ପାଇଁ ଆର୍ଏସ୍ପି କର୍ତ୍ତୃପକ୍ଷଙ୍କ ସହଯୋଗ ଲୋଡ଼ିଛନ୍ତି। ସେହିପରି ଗୁରୁବାର ସକାଳେ ମଧ୍ୟ ସେଠୀ ଓ ତାଙ୍କ ସମର୍ଥକମାନେ ସେକ୍ଟର-୭ ମୁଣ୍ଡାରୀ ବସ୍ତି, ବିନ୍ ବସ୍ତି, ଭିଏସ୍ଏସ୍ ପଲ୍ଲୀ, ସୁବାସପାଲି ଅଞ୍ଚଳ ପରିଦର୍ଶନ କରିଛନ୍ତି। ପ୍ରଶାସନ ପକ୍ଷରୁ ଜରିପାଲ ବ୍ୟବସ୍ଥା କରାଯାଇଥିବା ସେ ସୂଚନା ଦେଇଛନ୍ତି। ସେହିପରି ଗୁରୁବାର ସକାଳେ ରଘୁନାଥପାଲି ବିଧାୟକ ସୁବ୍ରତ ତରାଇ ସେକ୍ଟର-୨୦ ପମ୍ପ ହାଉସ ବସ୍ତି ପରିଦର୍ଶନ କରି ଲୋକଙ୍କ ସମସ୍ୟା ବୁଝିଥିଲେ। ନାଳନର୍ଦ୍ଦମା ସଫେଇ ସହ ବସ୍ତିରୁ ଜଳ ନିଷ୍କାସନ ପାଇଁ ଆର୍ଏସ୍ପି ସହରସେବା ଜିଏମ୍ ବିଜୟ ଯୋଯୋ ଏବଂ ବିଦ୍ୟୁତ୍ ସରବରାହ ପାଇଁ ବିଭାଗୀୟ କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ। ଅନୁରୂପ ଭାବେ ବିଜେଡି ନଗର ସଭାପତି ଗଗନ ପଣ୍ଡାଙ୍କ ନେତୃତ୍ୱରେ ଏକ ଟିମ୍ ରାଉରକେଲା ନିର୍ବାଚନମଣ୍ଡଳୀ ଅଧୀନ ମାଲଗୋଦାମ, ଖଟାଲ ବସ୍ତି ଓ ଅନ୍ୟ ଅଞ୍ଚଳକୁ ପରିଦର୍ଶନ କରିଛନ୍ତି। ଏହି ଟିମ୍ର ବୁବୁଲି ରାଉତ, ଲକ୍ଷ୍ମୀ ସିଂ, ମାନସ ପାତ୍ର ପ୍ରମୁଖ ଆରଏମସି ସହଯୋଗରେ ନାଳନର୍ଦ୍ଦମା ସଫେଇ କରି ଜଳ ନିଷ୍କାସନ କରାଇଥିଲେ। ସୂଚନାଯୋଗ୍ୟ, ଶିଳ୍ପାଞ୍ଚଳର ମୁଣ୍ଡାରୀ ବସ୍ତି, ପମ୍ପ ହାଉସ ବସ୍ତିରେ ଘର ଭାଙ୍ଗିବା ସହ ମାଲଗୋଦାମ ଖଟାଲ ବସ୍ତିିରେ ଜଣେ ମହିଳାଙ୍କ ଘର ଭୁଶୁଡ଼ି ପଡିଥିବା ଜଣାପଡ଼ିଛି।
ବିପର୍ଯ୍ୟସ୍ତ ସ୍ବେରେଜ ବ୍ୟବସ୍ଥା
ଦୁଇଦିନ ଲଗାଣ ବର୍ଷା ଛେଣ୍ଡ ଅଞ୍ଚଳରେ ସ୍ବେରେଜ ବ୍ୟବସ୍ଥାର ଅସଲ ମୁଖା ଖୋଲିଦେଇଛି। କଳିଙ୍ଗ ବିହାର ଏମ୍ଆଇ ବ୍ଲକରେ ବୁଧବାର ସନ୍ଧ୍ୟାରେ ମୂଷଳଧାରାରେ ବର୍ଷା ହେବାରୁ ସ୍ବେରେଜ ପଏଣ୍ଟଗୁଡ଼ିକ ଓଭର ଫ୍ଲୋ ହୋଇଥିଲା। ସେହିପରି ୨୦ରୁ ଊର୍ଦ୍ଧ୍ୱ ପଏଣ୍ଟର ସମାନ ଅବସ୍ଥା ହୋଇଥିବା ଲୋକେ ଅଭିଯୋଗ କରିଛନ୍ତି। ଅନୁରୂପ ଭାବେ କଳିଙ୍ଗ ବିହାର ଅଞ୍ଚଳରେ ଘରେ ପାଣି ପଶିଯିବା ସହ ରାସ୍ତାରେ ବହୁଥିବା ଦେଖିବାକୁ ମିଳିଛି।
