ନୂଆଦିଲ୍ଲୀ: ଆଗ୍ରହ ଥିଲେ ବୟସ କେବେ କୌଣସି କାମ ପାଇଁ ବାଧକ ସାଜେନି। ଏହାର ଏକ ଉଦାହରଣ ହେଉଛନ୍ତି ୟୁଟ୍ୟୁବର ଶାନ୍ତା ପିଲାଇ। ୮୫ ବର୍ଷ ବୟସରେ ୟୁଟ୍ୟୁବର ହୋଇ ଏବେ ସେ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି।
ଶାନ୍ତା ପିଲାଇ ଆଜି ଜଣେ ପ୍ରତିଷ୍ଠିତ ୟୁଟ୍ୟୁବର। ‘ଟେକିଫାଇ ଆଟ୍ ୮୫’ ନାମରେ ତାଙ୍କର ଏକ ୟୁଟ୍ୟୁବ ରହିଛି। ଏହି ଚ୍ୟାନେଲ ମାଧ୍ୟମରେ ଶାନ୍ତା ଏବେ ଲୋକମାନଙ୍କୁ ବେଶ୍ ସୁନ୍ଦରଭାବେ ନୂଆ ନୂଆ ଟେକ୍ନୋଲୋଜି ସମ୍ପର୍କରେ ଶିକ୍ଷା ଦେଉଛନ୍ତି। ବଡ଼ କଥା ହେଉଛି ଶାନ୍ତାଙ୍କୁ ଏବେ ବୟସ ହେଉଛି ୮୫ ବର୍ଷ ଆଉ ସେ ଏହି ବର୍ଷ ହିଁ ତାଙ୍କ ଚ୍ୟାନେଲ ଆରମ୍ଭ କରିଛନ୍ତି। ଚ୍ୟାନେଲ ଆରମ୍ଭ କରିବାର ମାତ୍ର କେଇ ମାସ ମଧ୍ୟରେ ସେ ଯେଉଁଭଳି ଲୋକପ୍ରିୟତା ହାସଲ କରିଛନ୍ତି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସୋସିଆଲ ମିଡିଆରେ ଏବେ ତାଙ୍କୁ ମିଳିଛି ସ୍ବତନ୍ତ୍ର ପରିଚୟ। ନୂଆ ଟେକ୍ନୋଲୋଜିକୁ ଶାନ୍ତା ଏତେ ସୁନ୍ଦର ଆଉ ସରଳଭାବେ ବୁଝାଇ ତାଙ୍କ ଚ୍ୟାନେଲରେ ଅପ୍ଲୋଡ୍ କରୁଛନ୍ତି ଯେ ଦର୍ଶକମାନେ ବେଶ୍ ପ୍ରଭାବିତ ହୋଇପାରୁଛନ୍ତି। ସେଥିପାଇଁ ତାଙ୍କ ଚ୍ୟାନେଲର ଦର୍ଶକଙ୍କ ସଂଖ୍ୟା ଖୁବ୍ ଶୀଘ୍ର ବଢ଼ିବାରେ ଲାଗିଛି। ସୋସିଆଲ ମିଡିଆରେ ତାଙ୍କ ଶିଖାଇବାର ଦକ୍ଷତାକୁ ଲୋକେ ଖୁବ୍ ପ୍ରଶଂସା କରୁଛନ୍ତି। ଶାନ୍ତା ଏହି ବର୍ଷ ଅଗଷ୍ଟ ମାସରେ ହିଁ ତାଙ୍କ ଚ୍ୟାନେଲ ଆରମ୍ଭ କରିଥିଲେ, ଆଉ ପ୍ରଥମ ଭିଡିଓରୁ ହିଁ ତାଙ୍କର ଫଲୋଅରଙ୍କ ସଂଖ୍ୟା ବହୁତ ବଢ଼ିବାରେ ଲାଗିଥିଲା। ଆଉ ତା’ପରେ ଶାନ୍ତା ଯାହା ବି ଭିଡିଓ ଅପଲୋଡ୍ କରୁଥିଲେ ତାଙ୍କ ଚ୍ୟାନେଲର ଦର୍ଶକଙ୍କ ସଂଖ୍ୟା ବହୁତ ବଢ଼ିଥିଲା ଏବଂ ତାଙ୍କୁ ବହୁ ପ୍ରଶଂସା ବି ମିଳିପାରିଥିଲା। ବାର୍ଦ୍ଧକ୍ୟ ବୟସରେ ବି ଶାନ୍ତା ଯୁବପିଢ଼ିଙ୍କ ସହ ତାଳ ଦେଇ ପ୍ରସିଦ୍ଧି ଅର୍ଜନ କରି ପାରିଛନ୍ତି।
