ପୁରୀ ଅଫିସ,୧।୩:ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ଅଡୁଆ ପରିସ୍ଥିତି ସୃଷ୍ଟି ହେବାରେ ଲାଗିଛି। ଶ୍ରୀମନ୍ଦିର ଚତୁଃପାର୍ଶ୍ୱର ୧୦୦ ମିଟର ପରିଧିରେ ନିର୍ମାଣ କାର୍ଯ୍ୟ ହୋଇପାରିବନାହିଁ ବୋଲି ନ୍ୟାଶନାଲ ମନୁମେଣ୍ଟ ଅଥରିଟି (ଏନ୍ଏମ୍ଏ) ସ୍ପଷ୍ଟ କରିବା ପରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ପ୍ରଶ୍ନ ଉଠିଛି। ଶ୍ରୀମନ୍ଦିର ନିକଟରେ ନିର୍ମାଣ କାର୍ଯ୍ୟ ହେଲେ ଶ୍ରୀମନ୍ଦିର ଭିତ୍ତିଭୂମି ଦୁର୍ବଳ ହେବା ଆଶଙ୍କା ରହୁଛି। ଗତ ସପ୍ତାହରେ ଭାରତୀୟ ପ୍ରତ୍ନତତ୍ତ୍ବ ସଂସ୍ଥା (ଏଏସ୍ଆଇ) ଡିଜି ଭି. ବିଦ୍ୟାଭାରତୀ ଓ ତାଙ୍କ ଟିମ୍ ପୁରୀ ଆସି ପରିକ୍ରମା ପ୍ରକଳ୍ପ ସମୀକ୍ଷା କରିବା ଅବସରରେ ଶ୍ରୀମନ୍ଦିର ପ୍ରଶାସନ ନିକଟରେ ଏହି ଯୁକ୍ତି ବାଢ଼ିଥିଲେ। ଅନ୍ୟପଟେ ଏଏସ୍ଆଇର ବିନା ଅନୁମୋଦନରେ ପରିକ୍ରମା ପ୍ରକଳ୍ପ କାର୍ଯ୍ୟ କିପରି ଚାଲିଛି ଏବଂ ଏନେଇ ଏଏସ୍ଆଇ କାହିଁକି ଚୁପ୍ ରହିଥିଲା ବୋଲି ସାଧାରଣରେ ପ୍ରଶ୍ନ ଉଙ୍କିମାରିଛି। ଇତିମଧ୍ୟରେ ଦକ୍ଷିଣଦ୍ୱାର, ପଶ୍ଚିମଦ୍ୱାର, ପୂର୍ବ-ଦକ୍ଷିଣ ଦ୍ୱାରରେ ନିର୍ମାଣ କାର୍ଯ୍ୟ ପାଇଁ ଖନନ ମଧ୍ୟ ହୋଇ ସାରିଲାଣି। ସୂଚନା ଅନୁଯାୟୀ, ନିର୍ମାଣ କାର୍ଯ୍ୟ ଆରମ୍ଭ ହେବା ପରେ ଏଏସ୍ଆଇ ପକ୍ଷରୁ ଶ୍ରୀମନ୍ଦିର ପ୍ରଶାସନକୁ ନୋଟିସ୍ ଜାରି କରାଯାଇଥିଲା। ଏହାସତ୍ତ୍ବେ କିଭଳି ପ୍ରଶାସନ କାର୍ଯ୍ୟ କରୁଛି ତାହାକୁ ନେଇ ଅନେକ ସାମାଜିକ ଓ ସାଂସ୍କୃତିକ ସଙ୍ଗଠନ ପ୍ରଶ୍ନ ଉଠାଇଛନ୍ତି। ନିର୍ମାଣ କାର୍ଯ୍ୟ ବନ୍ଦ କରିବା ପାଇଁ ଶ୍ରୀଜଗନ୍ନାଥ ଭକ୍ତ ପରିଷଦ ଦାବି କରିଛି। ଶ୍ରୀମନ୍ଦିର ପ୍ରତି ବିପଦ ଥିବା ସତ୍ତ୍ବେ ଖନନ କାର୍ଯ୍ୟ ନିନ୍ଦନୀୟ ବୋଲି ଶ୍ରୀଜଗନ୍ନାଥ ଭକ୍ତ ପରିଷଦର ଆବାହକ ସୂର୍ଯ୍ୟନାରାୟଣ ରଥ କହିଛନ୍ତି। ଅନ୍ୟପକ୍ଷରେ ସମ୍ପୂର୍ଣ୍ଣ ଘଟଣା ଉପରେ ଭାଜପାର ନୀରବତା ବୁଝାପଡ଼ୁନାହିଁ ବୋଲି ସାମାଜିକ କର୍ମୀ ଦିଲୀପ ବରାଳ କହିଛନ୍ତି। ଭାଜପା ପୂର୍ବରୁ ବଗଲା ଧର୍ମଶାଳା ଜମି ବିକ୍ରି ପ୍ରସଙ୍ଗରେ ରାଜ୍ୟ ସରକାରଙ୍କୁ ଘେରିଥିଲା। ଏପରି କି ରାଜ୍ୟ ନେତୃତ୍ୱମାନେ ବଗଲା ଧର୍ମଶାଳା ଆଗରେ ମାସେ କାଳ ଧାରଣା ଦେଇଥିଲେ। ଏହି ପ୍ରସଙ୍ଗରେ ଭାଜପା ନେତା ସମ୍ବିତ ପାତ୍ର ମଧ୍ୟ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତେବେ ବଗଲା ପ୍ରସଙ୍ଗ ଅପେକ୍ଷା ଶ୍ରୀମନ୍ଦିର ସୁରକ୍ଷା ପ୍ରସଙ୍ଗ ଅଧିକ ଗୁରୁତ୍ୱପୂର୍ଣ୍ଣ ଓ ସମ୍ବେଦନଶୀଳ ହୋଇଥିଲେ ମଧ୍ୟ ଭାଜପା ମୁହଁ ଖୋଲୁନାହିଁ। ଏଭଳି ଆଭିମୁଖ୍ୟ ଦ୍ୱାରା ପ୍ରଶାସନର ଭୁଲ୍କୁ ଘଣ୍ଟ ଘୋଡ଼ାଯାଉଛି ବୋଲି ଦିଲୀପ କହିଛନ୍ତି। ତେବେ ସରକାରଙ୍କୁ କଂଗ୍ରେସ ବିରୋଧ କରିଛି। କଂଗ୍ରେସ କର୍ମୀ ସ୍ବାଧୀନ ପଣ୍ଡା କହିଛନ୍ତି, ଏଏସ୍ଆଇ ନୋଟିସକୁ ବେଖାତିର କରି ନିର୍ମାଣ କାର୍ଯ୍ୟ ହେବା ବେଆଇନ। ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଥିବାବେଳେ ଏବେ ଏଏସ୍ଆଇର ଅନୁମୋଦନ ନ ଥିବା କଥା ଶୁଣି ରାଜ୍ୟ ସରକାରଙ୍କ ଉଦ୍ଦେଶ୍ୟ ଉପରେ ସନ୍ଦେହ ସୃଷ୍ଟି ହେଉଛି।
