ଢେଙ୍କାନାଳ ଅଫିସ,୨୮।୪: ହାତୀଙ୍କ ଉପସ୍ଥିତି ନାହିଁ। ତଥାପି ମନକୁ ମନ ବାଜୁଛି ସାଇରନ୍। ହାତୀ ଥିବା ଭୟରେ ଯାନବାହନ, ଯାତ୍ରୀ ଅଯଥାରେ ଅଟକି ରହୁଛନ୍ତି, ଯାହାକୁ ନେଇ ଢେଙ୍କାନାଳ ଜିଲା ୫୫ନଂ. ଜାତୀୟ ରାଜପଥରେ ଅସ୍ବାଭାବିକ ସ୍ଥିତି ସୃଷ୍ଟି ହୋଇଛି।
ସୂଚନାଯୋଗ୍ୟ, ୫୫ନଂ. ଜାତୀୟ ରାଜପଥର ଅଧିକାଂଶ ସ୍ଥାନରେ ହାତୀ ଚଳପ୍ରଚଳ କରୁଛନ୍ତି। ପଥଚାରୀ ଏବଂ ଯାନବାହନ ଚାଳକଙ୍କୁ ଏ ନେଇ ସତର୍କ କରାଇବା ଉଦ୍ଦେଶ୍ୟରେ ପାଲଲହଡ଼ାର ଏକ ଘରୋଇ ସଂସ୍ଥା ଦ୍ୱାରା ପ୍ରସ୍ତୁତ ସାଇରନ୍ ଏବଂ ସତର୍କ ସଙ୍କେତ ଦେଉଥିବା ଲାଇଟ୍ ସଦର ଥାନା ଅନ୍ତର୍ଗତ ତେନ୍ତୁଳିଆପଡା ନିକଟରେ ରାଜପଥ କଡ଼ରେ ଲଗାଯାଇଥିଲା। ହାତୀପଲ ରାଜପଥ ଉପରକୁ ଆସିଲେ ସାଇରନ୍ ଆପଣାଛାଏ ବାଜୁଥିଲା। ଏଥିସହ ନାଲିବତି ଜଳି ଉଠୁଥିଲା। ହେଲେ ଗୁରୁବାର ହାତୀଙ୍କ ଉପସ୍ଥିତି ନ ଥିବା ସତ୍ତ୍ୱେ ଉକ୍ତ ସାଇରନ୍ ଆପେଆପେ ବାଜିଉଠିବା ସହ ନାଲି ଲାଇଟ୍ ଜଳୁଥିବା ଦେଖିବାକୁ ମିଳିଥିଲା। ଫଳରେ ଯାନବାହନ ଚାଳକ ଭୟଭୀତ ହୋଇ ଗାଡ଼ି ଅଟକାଇ ଦେଉଥିଲେ। ଏଭଳି ବୈଷୟିକ ତ୍ରୁଟି ସମ୍ପର୍କରେ ବନ କର୍ମଚାରୀଙ୍କ ନିକଟରେ କୌଣସି ସୂଚନା ନ ଥିବା ଜଣାପଡ଼ିଛି।
ଘଟଣା ସମ୍ପର୍କରେ ଜିଲା ବନଖଣ୍ଡ ଅଧିକାରୀ (ଡିଏଫ୍ଓ) ସୁମିତ କର କୁହନ୍ତି, ବର୍ଷା ଯୋଗୁ ପାଣି ପଶିଯାଇଥିବାରୁ ଏଭଳି ସମସ୍ୟା ଉପୁଜି ଥାଇପାରେ। ଏ ନେଇ କୌଣସି ସୂଚନା ନାହିଁ। ତଥାପି କ’ଣ ହୋଇଛି ଅନୁଧ୍ୟାନ କରାଯିବ ବୋଲି ଡିଏଫ୍ଓ କହିଛନ୍ତି।
