ନୂଆଦିଲ୍ଲୀ: ମଙ୍ଗଳବାର ଦେଶର ପୁଞ୍ଜିବଜାରରେ କାରବାର ଉନ୍ନତ ରହିଛି। ବମ୍ବେ ଷ୍ଟକ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ଏହି ସମୟରେ ପ୍ରାୟ ୪୪୬ ପଏଣ୍ଟ ବଢିଥିବା ନଜରକୁ ଆସିଛି। ବିଶ୍ୱ ବଜାରରେ କାରବାର ଉନ୍ନତ ହେବା ଯୋଗୁ ବିଏସ୍ଇରେ ଷ୍ଟକ୍ କାରବାର ବେଶ୍ ଉନ୍ନତ ହୋଇଛି। ଦିନ ମଧ୍ୟରେ ସେନ୍ସେକ୍ସ ୪୪,୬୦୨ ପଏଣ୍ଟକୁ ବଢ଼ିଥିଲା। ବିଏସ୍ଇ ସୂଚକାଙ୍କ ୪୪୬ ପଏଣ୍ଟ(୧.୦୧%) ବଢିବା ଯୋଗୁ କାରବାର ଶେଷ ବେଳକୁ ଏହା ୪୪,୫୨୩ ପଏଣ୍ଟ ସ୍ତରରେ ରହିଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜର ନିଫ୍ଟି ୧୨୯ ପଏଣ୍ଟ ଉଚ୍ଚରେ ରହି ୧୩,୦୫୫ ପଏଣ୍ଟ ସ୍ତରରେ ରହିଛି।
ଆକ୍ସିସ ବ୍ୟାଙ୍କ, ମହିନ୍ଦ୍ରା ଆଣ୍ଡ ମହିନ୍ଦ୍ରା, ଏଚ୍ଡିଏଫ୍ସି ବ୍ୟାଙ୍କ, ଆଇଟିସି ଏସ୍ବିଆଇ, ଆଇସିଆଇସିଆଇ ବ୍ୟାଙ୍କର ଷ୍ଟକ୍ କାରବାର ବେଶ୍ ଭଲ ରହିଥିବା ନଜରକୁ ଆସିଛି। ଏଚ୍ଡିଏଫ୍ସି, ଟାଇଟାନ, ନେସ୍ଲେ ଇଣ୍ଡିଆ, ଭାରତୀ ଏୟାରଟେଲ, ଓଏନ୍ଜିସି ଭଳି କମ୍ପାନୀ କାରବାର କ୍ଷତି ସହିଛନ୍ତି। ଏନ୍ଏସ୍ଇ ପ୍ଲାଟ୍ଫର୍ମରେ ବ୍ୟାଙ୍କ, ଘରୋଇ ବ୍ୟାଙ୍କ, ଅଟୋ, ଫାଇନାନ୍ସିଆଲ ସର୍ଭିସ୍ର ଶେୟାର ଭଲ କାରବାର ହାସଲ କରିଛି। କୋଭିଡ୍ ୧୯ ଟିକା ଆସିବା ଖବର ବଜାରରେ ଆଶା ଭରି ଦେଇଛି। ସେହିଭଳି ଅର୍ଥ ବ୍ୟବସ୍ଥାଗୁଡିକୁ ଖୋଲିବା ଲାଗି ପଦକ୍ଷେପ ନିଆଯାଉଥିବାରୁ ଏହା ନିବେଶକଙ୍କ ଉପରେ ସକାରାତ୍ମକ ମନୋଭାବ ସୃଷ୍ଟି କରିଛି। ଭାରତକୁ ଭାକ୍ସିନ ଆଣିବା ନେଇ ସେରମ ଇନ୍ଷ୍ଟିଚ୍ୟୁଟ୍ ଘୋଷଣା କରିଛି। ଏଭଳି ସ୍ଥିତିରେ ଭାରତରେ କରୋନାର ଦ୍ୱିତୀୟ ଲହର ଆରମ୍ଭ ହୋଇଥିବାରୁ ନିବେଶକ ଆଶଙ୍କାରେ ରହିଥିବା ବଜାର ବିଶେଷଜ୍ଞ କହିଛନ୍ତି।
